Уильям Салиба, Юрриен Тимбер нар Арсеналын энэ улирлын сүүлийн тоглолт болох Ням гарагт Саутгемптоны эсрэг хийх тоглолтод оролцохгүй гэж клуб мэдээллээ.
Францын хамгаалагч Салиба өнгөрсөн амралтын өдрүүдэд Ньюкаслын эсрэг тоглолтод хөлний арын булчингийн сунгалт аван, хагас цагийн дараа сэлгээнд гарсан. Тэрээр өнөөдөр зарлагдсан Үндэсний шигшээ багийн Nations League-ийн бүрэлдэхүүнд ч багтсангүй.
Харин Тимбер шагайн бэртлийн улмаас хагалгаанд орж, зун амралтаар бүрэн эдгэхээр төлөвлөж байна.
Injury update on William Saliba and Jurrien Timber 👇
— Arsenal (@Arsenal) May 21, 2025
Түүний хувьд энэ улирал гайхалтай эргэн ирэлт болсон. Арсеналд ирснийхээ дараа урд өвдөгний холбоос тасарсан хүнд гэмтлийн улмаас анхны улирлаа үндсэндээ алгассан ч, энэ улиралд нийт 48 тоглолтод оролцож, багийн амжилтад томоохон хувь нэмэр оруулжээ.
Арсеналын ахлах дасгалжуулагч Микел Артета beIN Sports-д өгсөн ярилцлагадаа:
“ACL гэмтлийн дараа бүтэн жил талбайд гараагүй тоглогч ийм улирлыг үднэ гэдэг бол гайхалтай зүйл. Бид зүгээр нэг тоглогч биш, жинхэнэ манлайлагч, маш онцгой зан чанартай хүнтэй гэрээ байгуулсан” хэмээн онцолсон байна.
Салиба Арсеналын дээд амжилтыг шинэчиллээ
Премьер лигт дэд байрт шалгарч, Аваргуудын лигийн хагас шигшээд хүрсэн Арсеналын хамгаалалтын баганын гол цөм нь Уильям Салиба байлаа.
Тэрбээр энэ улиралд 51 тоглолтод оролцсон бөгөөд үүний үр дүнд Премьер лигийн “Улирлын шилдэг залуу тоглогч”-ийн шагналд нэр дэвшээд байна. Мөн клубийн төлөө хийсэн эхний 100 тоглолтдоо хамгийн олон ялалт байгуулсан тоглогч болж, 68 тоглолтод Арсенал ялалт байгуулжээ.
Арсеналын дасгалжуулагч Микел Артета түүний тухай:
“Бид түүний хэрхэн ахиж, хөгжиж, одоо ямар түвшинд хүрснийг харсаар байна.
Эдгээр статистик үзүүлэлтүүд бол үнэхээр гайхалтай. Түүнд сурах зүйл, хөгжих боломж маш их бий. Бид олон жилийн турш түүнтэй хамт ажиллах боломжтой тоглогчтой болсон” хэмээн онцолжээ.
