Реал Мадридын од Винисиус Жуниорт зориулсан баримтат кинонд гарсан хэсэгтэй холбоотойгоор Валенсиа клуб хуулийн хүрээнд гомдол гаргаж болзошгүйг мэдэгдэв. Тус кинонд 2023 оны тавдугаар сард Месталья цэнгэлдэхэд болсон арьс өнгөөр ялгаварласан үйлдлийг дүрсэлсэн нь клубын фэнүүдийг буруугаар харуулсан гэж үзэж байна.
Уг тоглолтын үеэр Винисиус хэсэг үзэгчдийн зүгээс доромжлол амссаныхаа дараа нулимстайгаар талбайг орхисон. Тэрхүү хэрэгтэй холбоотойгоор гурван Валенсиа хөгжөөн дэмжигч арьс өнгөөр ялгаварлан гадуурхсан хэргээр буруутгагдаж, найман сарын хорих ял авсан юм. Энэ нь Испанид ийм төрлийн гэмт хэрэгт оноосон анхны ял болсон билээ.
Гэвч Валенсиа клуб баримтат кинонд тухайн өдрийн үйл явдлыг буруу, нэг талыг барьсан байдлаар дүрсэлсэн хэмээн үзэж, Netflix платформ дээр “Vini Jr.” киноны сурталчилгаа хийгдсэнтэй холбогдуулан хүчтэй мэдэгдэл гаргалаа.
As a response to injustice and falsehoods made towards the Valencia CF fanbase, the club have made a demand in writing to the producers of the documentary regarding their portrayal of what occurred at Mestalla, which does not correspond with reality. Truth and respect for our… https://t.co/ZdqjfHIPw1
— Valencia CF (@valenciacf_en) May 19, 2025
Мэдэгдэлд:
“Валенсиа клубын хөгжөөн дэмжигчдийг шударга бусаар, худал дүрсэлсэн явдлын хариуд бид уг киноны продюсеруудад бичгээр шаардлага хүргүүлсэн. Кинонд дүрслэгдсэн зүйл бодит байдалтай нийцэхгүй байна. Үнэн, манай фэнүүдийн нэр хүндэд хүндэтгэлтэй хандах ёстой. Бид нөхцөл байдалд тохирсон хуулийн арга хэмжээ авах эрхээ хадгалж байна.” гэжээ.
Клуб мэдэгдлийн төгсгөлд #RESPECT гэх хаштаг нэмж, байр сууриа тодотгосон юм.
2022-23 болон 2023-24 оны улирлын хугацаанд Ла Лига нийт 16 удаагийн арьс өнгөөр ялгаварласан үйлдлийг Винисиустай холбоотойгоор прокурорт шилжүүлсэн байна.
