Жүдэ Беллингэмийн сүүлчийн мөчид хийсэн гайхалтай гоол Мадридыг 2:1 харьцаатайгаар ялалт байгуулахад хүргэж, тоглолтын хувь заяаг эргүүлэв. Хэдийгээр Винисиус Жуниор улаан хуудас авсны улмаас 10 тоглогчтой үлдсэн ч тэдний тууштай байдал эхний хагасын хожигдлыг гайхалтайгаар даван туулж чадлаа.
Тоглолтын эхний хагаст Валенсиа илүү идэвхтэй тоглож, 27 дахь минутад тэргүүллийг авсан юм. Тьерри Коррейя баруун жигүүрээр боломж олгож, Хави Гуэрра руу дамжуулалт өгөв. Гуэррагийн эхний цохилтыг Тибо Куртуа хаасан ч Хюго Дуро хурдан хариу үйлдэл үзүүлж, бөмбөгийг хаалганд оруулснаар Валенсиад 1:0 харьцаагаар тэргүүлэл авчирсан.
Карло Анчелоттигийн удирдсан Реал Мадрид эхний хагаст төдийлөн давамгайлж чадалгүй байсан бол Валенсиагийн сөрөг довтолгоонууд илүү аюултай байлаа. Зочид эхний хагаст хамгийн боломжит гоолын оролдлогоо Федерико Вальвердегийн хүчтэй цохилтоор хийсэн ч Валенсиагийн хаалгач Столе Димитриевски түүний цохилтыг итгэлтэйгээр хааж чадсан юм.
🏁 @valenciacf_en 1-2 @realmadriden
— Real Madrid C.F. 🇬🇧🇺🇸 (@realmadriden) January 3, 2025
⚽ 27' Hugo Duro
⚽ 85' @lukamodric10
⚽ 90'+5' @BellinghamJude#ValenciaRealMadrid | @Emirates pic.twitter.com/rOkM4NtxKq
Реал Мадрид баг бөмбөгийн эзэмшлээр давамгайлсан ч довтолгооны төгсгөлд хурц, шийдэмгий байдал дутсанаар эхний хагасыг хожигдож дуусгасан.
Хоёрдугаар хагас эхэлмэгц Лос Бланкос илүү идэвхтэй тоглолт үзүүлсэн ч боломжуудыг ашиглаж чадалгүй байсаар бухимдалтай болж эхлэсэн юм.
53 дахь минутад Килиан Мбаппег торгуулийн талбайд унагаснаар Реал Мадрид торгуулийн цохилт хийх боломжтой болсон ч Жүдэ Беллингэмийн цохилт шон мөргөн, Валенсиаг “аварлаа.”
79 дэх минутад Винисиус Жуниор улаан хуудас авснаар Реал Мадридын хувьд нөхцөл байдал бүр ч хүндэрсэн юм.
Бразил тоглогч Столе Димитриевскитэй ширүүн маргаан өрнүүлж, түүний нүүрийг түлхсэн нь VAR-ийн шүүлтийн дараа шийтгэл авчирлаа. 10 тоглогчтой болсон Реал Мадридад цаг, санаачилга дуусч буй мэт харагдаж байв.
Гэсэн хэдий ч баг нь тоглогчдын тооны хувьд цөөрсөн ч Реал Мадрид 85 дахь минутад тэнцээний гоолыг хийж чадлаа. Жүдэ Беллингэм тоглолтын турш гол үүрэг гүйцэтгэсэн бөгөөд төгс дамжуулалтаар Лука Модричийг олсон юм.
Сэлгээгээр орж ирсэн Харват тоглогч хаалганы ойролцоо хурдлан орж, бөмбөгийг Димитриевскийн хажуугаар шургуулан 1:1 харьцаатай болгож тэнцүүллээ.
Тэнцээний гоол Реал Мадридыг дахин сэргээж, хоёрдугаар хагасын ихэнхэд хамгаалалтад төвлөрсөн Валенсиаг сүүлийн минутад асар их дарамтад оруулав.
Тоглолт тэнцээгээр өндөрлөх шиг санагдаж байсан ч нэмэлт цагийн 5 дахь минутад Беллингэм Валенсиагийн хамгаалалтын алдааг ашиглан ялалтын гоолыг оруулав.
Хюго Гильямоны сулхан дамжуулалт Димитриевскиг барьц алдуулж, Беллингэм бөмбөгийг авч, тайван гэгч нь хаалганы доод буланд орууллаа.
Месталья цэнгэлдэх нам гүм болж, өсвөр насны тоглогч ялалтыг баталгаажуулсан гоолынхоо баярыг тэмдэглэсэн юм.
101greatgoals.com
