Абдулайе Дукурэ улирлын дараа Эвертон клубийг орхих болсноо баталж, “би үүрд Эвертоны хүн хэвээр байх болно” хэмээн сэтгэлээ илэрхийллээ.
Эвертон түүний гэрээнд багтсан нэг жилийн сунгалтын боломжоос татгалзсан бөгөөд 32 настай тоглогч 2020 онд Уотфордоос £20 саяын ($25.5 сая) үнээр ирснээс хойш 165 тоглолтод оролцжээ.
Тэрбээр 2023 онд Премьер лигт үлдэх сүүлчийн тоглолтод Борнмутын эсрэг хожлын ганц гоолыг оруулж, багтаа үлэмж тус хүргэсэн нь мартагдашгүй дурсамж болж үлдсэн юм.
ONCE A BLUE , ALWAYS A BLUE 💙 pic.twitter.com/YaBncexTZ3
— Abdoulaye Doucouré (@abdoudoucoure16) May 20, 2025
Дукурэ өнөөдөр X платформд дараах нийтлэлийг хуваалцжээ:
“Сайн уу, Эвертоны үнэнч фенүүд ээ. Энэ улирлын төгсгөлд би багийг орхих болсноо та бүхэнтэй хуваалцахыг хүсэж байна. Эвертонд өнгөрүүлсэн гайхалтай таван жилийн дараа миний аялал дуусах гэж байна.
Эвертон надад ихийг өгсөн. Сүүлийн таван жил амар байгаагүй ч энэ багт тоглоно гэдэг миний хувьд мөрөөдөл байлаа. Энэ багийг орхино гэдэг гунигтай мэдрэмж төрүүлж байгаа ч, надад болон багт шинэ хуудсыг эхлүүлэх цаг ирсэн гэж бодож байна. Клуб надад өгсөн бүх зүйлд би үргэлж талархаж явах болно.
Багтай гэрээ байгуулах боломж гарч ирэхэд би маш их баярлаж байсан. Миний хамгийн сайхан дурсамж бол яах аргагүй Борнмутын эсрэг гоол, тэр гоолоороо багийг Премьер лигт үлдээсэн мөч.
Энэ бол миний болон гэр бүлийн минь хувьд, мөн багийн хувьд ч гайхалтай агшин байсан. Би Эвертоны фенүүдийг, энэ клубийг үгүйлэх болно. Та бүхэнд дамжуулах хамгийн чухал зүйл бол би өдөр бүрийн бэлтгэл, тоглолт бүрт өөрийгөө бүрэн дайчилж, бүхнээ зориулсан гэдгээ хэлмээр байна” хэмээн бичжээ.
Дукурэ: Энэ газрыг үнэхээр үгүйлнэ
Ням гарагт Саутгемптоныг 2-0-ээр хожсон тоглолт нь Гүдисон Парк цэнгэлдэхэд Эвертон хийсэн сүүлчийн тоглолт болж, Абдулайе Дукурэ сэлгээнд гарах үеэрээ сэтгэл хөдлөлөө нууж чадалгүй, үзэгчдийн сэтгэлийг гүн хөдөлгөсөн юм.
Тэрбээр дараах мэдэгдлийг нэмж хийжээ:
“Эвертоны өмсгөлийг өмсөх бүртээ би үргэлж бахархаж байсан. Гүдисон Паркд тоглох мэдрэмж хэзээд онцгой байлаа.
Би аль болох олон тоглолтод хожихын төлөө өөрийгөө бүрэн дайчилсан. Энэ газрыг үнэхээр санах байх. Шинэ цэнгэлдэхдээ баг маань амжилттай тоглоосой гэж чин сэтгэлээсээ хүсье.
Эвертон одоо миний амьдралын салшгүй хэсэг болсон. Би үүрд “Блю” хэвээр байх болно. Үргэлж энэ багийг дэмжих болно. Ирээдүй нь гэрэлтэй байгаасай гэж хүсэж байна” хэмээн хэлжээ.
Дукурэ Лийдс рүү явах уу?
Мали улсын шигшээ багийн хагас хамгаалагч Дукурэ дөнгөж дэвшээд буй Лийдс Юнайтед багийн сонирхлыг татаж байгаа тухай цуу яриа гарч эхэлжээ.
Тэрбээр Эвертоныг орхиж буй ганц тоглогч биш бөгөөд түүний хамт Ашли Янг, Асмир Бегович, Жоао Виржиния нар мөн явж байна. Харин Идрисса Гейе, Доминик Калверт-Льюин, Майкл Кийн нарын гэрээний ирээдүйн талаар одоогоор ямар нэг шийдвэр албан ёсоор зарлагдаагүй байна.
