Жэйми Варди “Лестер Сити”-гийн төлөөх сүүлчийн тоглолтдоо 200 дахь гоолоо оруулж, клубын түүхэнд өөрийн нэрийг дахин тод бичүүллээ. Түүний энэ амжилтыг Рүүд ван Нистелрой “Агуу тоглогч”-ийн хэмжээнд үнэлсэн юм.
2015–2016 оны улиралд “Лестер”-ийг Премьер лигийн түүхэн аварга болгож байсан Варди улирлын сүүлийн гэртээ хийх тоглолтын өмнө хүндэтгэлийн хонгилоор гарч ирэн, “Ипсвич Таун”-тай тоглосон. Хэдий хоёр баг ирэх улиралд Чемпионшипт өрсөлдөх болсон ч “Кинг Пауэр” цэнгэлдэх хүрээлэнд болсон 2-0 харьцаатай ялалт багийн хөгжөөн дэмжигчдэд мартагдашгүй оройг бэлэглэлээ.
28 дахь минутад Варди Жэймс Жастины дамжуулалтаар бөмбөг хүлээн авч, Дара О’Шиагийн хөлийн завсраар цохин гоолдсон нь түүний 500 дахь тоглолтодоо оруулсан 200 дахь гоол болж түүхэнд үлдэв. Харин 69 дэх минутад Кейси МакАтээр хоёр дахь гоолыг нэмсэний дараа Вардиг 80 дахь минутад сэлгээнд суулгаж, хөгжөөн дэмжигчдийн талархлыг хүлээв. Тэрээр ирэх ням гарагт болох “Борнмут”-ын эсрэг тоглолтод оролцохгүй.
Рүүд ван Нистелрой хэлэхдээ:
“500 дахь тоглолтдоо 200 дахь гоолоо оруулж байгаа хүн бол маргаангүй агуу тоглогч. Варди бол энэ клубт онцгой байр суурь эзэлдэг тоглогч мөн. Хожмын өдөр бид энэ үеийг дурсахдаа бахархах болно. Тэр зөвхөн гол тоглогч биш, багийн сэтгэл зүйг авч явдаг удирдагч байсан” хэмээн онцоллоо.
Фулхэм наймдугаар байр руу дөхөж, Европын тэмцээний найдлагаа хадгаллаа
Премьер лигийн наймдугаар байр энэ улиралд Европын тэмцээнд оролцох эрх өгөх боломжтой хэвээр байна. Энэ нь “Челси” Конференцийн лигийг түрүүлж, лигт эхний тавд багтаагүй тохиолдолд хэрэгжих юм.
“Фулхэм” энэ боломжийг амьд хадгалах зорилгоор “Брентфорд”-ыг 3-2 онооны харьцаатай хожиж, өрнөд Лондоны өрсөлдөгчөөсөө ердөө нэг онооны зайд ойртлоо.
Тэд 16 дахь минутад Рауль Хименесийн толгойн гоолоор тэргүүлсэн ч зургаан минутын дараа Брайан Мбуемо хариу цохилт хийж, тоог тэнцүүлсэн. Мбуемо 28 дахь минутад торгуулийн цохилтоос боломж алдсан ч 43 дахь минутад Йоан Висса “Брентфорд”-ыг дахин тэргүүлүүлсэн.
Гэсэн ч хоёрдугаар хагасын богино хугацаанд Том Кэйрни толгойгоор гоолдож, удалгүй Харри Уилсон алсаас гайхалтай цохилт хийснээр “Фулхэм” хожлыг авч чадлаа.
Ийнхүү “Фулхэм” наймдугаар байрт өрсөлдөх боломжтой хэвээр үлдсэн бол “Брайтон” даваа гарагт “Ливерпүүл”-тэй, “Борнмут” мягмар гарагт “Манчестер Сити”-тэй тоглох бөгөөд аль аль нь “Брентфорд”-ыг гүйцэх боломжтой байна. Европын бүсийн өрсөлдөөн ирэх ням гарагт эцэслэх юм.
