Дасгалжуулагч Карло Анчелотти хамгаалалтын алдаануудыг шүүмжлэн, тоглолтын үр дүн бүхэлдээ түүнд сэтгэл дундуур байдал төрүүлснийг илэрхийлсэн байна. Гэсэн хэдий ч тэрбээр довтлогч Килиан Мбаппегийн тоглолтыг эерэгээр үнэлж, Мбаппе 5 дахь минутад гайхалтай гоол оруулсныг онцолжээ. Гэвч Барселонагийн Ламин Ямал, Роберт Левандовски, Рафинья, Алехандро Балде нар гоол оруулж, эхний хагас Жедда хотод 4:1-ийн харьцаатай өндөрлөсөн байна.
“Бид хөлбөмбөг тоглохыг хичээх ёстой байсан, гэхдээ эхний хагаст үүнийг огт хийсэнгүй” хэмээн Анчелотти Movistar сувагт AS-ээр дамжуулан ярьжээ. Хагас үеийн завсарлагаар тоглогчдодоо юу хэлснийг асуухад тэрээр:
“Урт дамжуулалтыг ашиглаж чадсан ч энэ нь манай үндсэн санаа байх ёсгүй байсан. Үндсэн санаа бол хөлбөмбөг тоглох явдал байв. Би тэдэнд тоглолтод ялагдаж болно гэж хэлсэн ч эхний хагас шиг хүлцэнгүй байдлаар хэзээ ч ялагдаж болохгүй гэдгийг ойлгуулахыг хичээсэн” гэжээ.
Мадрид vs Барселона
Рафинья тоглолтын 48 дахь минутад тооны харьцааг 4:1 болгосны дараа Реал Мадрид багахан найдвар олж авсан юм. Барселонагийн хаалгач Войцех Шчесный Мбаппегийн замыг хаасны улмаас улаан хуудас авч, талбайгаас хөөгдсөн нь 56 дахь минут байв.
Гэсэн хэдий ч Европын аваргуудын сөрөг довтолгоо Родриго 60 дахь минутад чөлөөт цохилтоор гоол оруулснаар зогсож, Барселона өнгөрсөн улирлын 4:1-ээр ялагдсан финалын хариугаа авч чаджээ.
“Бид бодит байдалтай эвлэрэх ёстой” гэж Анчелотти хэлэв. “Бид сайн хамгаалж чадсангүй. Тэд гоолуудыг хэтэрхий амархан хийлээ. Багийн хэмжээнд ч, хувь хүний түвшинд ч хангалттай ажилласангүй.
Энэ ялагдал биднийг гунигтай, сэтгэл гонсгор болгож байна. Манай хөгжөөн дэмжигчид ч бас бидэнтэй адил гунигтай байгаа. Гэхдээ би хэнийг ч буруутгахыг хүсэхгүй. Арын шугам хамгаалалтаа сайн зохион байгуулж чадсангүй. Баг хангалттай нягт бус байлаа.
Энэ тоглолт эхнээсээ дуустал сайн болоогүй. Бид илүү хүнтэй байсан ч ямар ч боломжийг бий болгож чадсангүй. Би бүхэл тоглолтоос сэтгэл дундуур байна” гэж тэрээр онцолжээ.
Ла Лига: Мадридын тоглолтууд
Одоогийн Испанийн аварга Реал Мадрид Ла Лигт Барселонагаас таван оноогоор илүү, харин хүснэгтийг тэргүүлж буй Атлетико Мадридаас нэг онооны зөрүүтэй байна.
Аваргуудын лигийн аваргууд пүрэв гарагт (20:30 цагт) Испанийн цомын 16-ийн шатанд Сельта Вигог гэртээ хүлээн авах бол ням гарагт (15:15 цагт) лигийн 14-р байранд буй Лас Пальмасын багийг талбайдаа угтан тоглох юм.
“Улирал дуусахад хангалттай хугацаа байгаа учраас бид урагш харж, тэмцэх хэрэгтэй” гэж Анчелотти хэлээд, “Одоо гэртээ харьж, сайтар бодож, пүрэв гарагийн тоглолтод бэлтгэнэ” гэж нэмж онцолжээ.
101greatgoals.com
