NBA-ийн гайхалтай онцлог бол бусад лигүүдээс ялгаатай нь тоглоомын дүрэм байнга хувьсаж, хөгждөг явдал. Өмнө нь багууд гарааны 2–3 супер одоор бүрэлдэхүүнээ босгож, тэднийг дэмжих үүрэг гүйцэтгэх энгийн тоглогчдыг ардаа бүрдүүлдэг байсан.
Харин одоо Оклахома Сити Тандер, Индиана Пэйсерс, Бостон Селтикс зэрэг багуудын амжилтыг харахад, бүх байрлалд авьяастай тоглогчдоор дүүрсэн өргөн бүрэлдэхүүнтэй байж л амжилтад хүрч байна. Эдгээр багуудын сэлгээний олон хувилбарыг давах тун хэцүү болсныг тоглолтууд баталж байна.
Энэ тухай NBA-ийн домогт тоглогчид болох Пол Пирс, Кевин Гарнетт нарын ярилцлагын сүүлийн дугаарт онцлон хэлэлцжээ. Гарнетт “Их гурвал”-ын эрин үе дууссан гэж мэдэгдсэн бөгөөд одоо зөвхөн гурван одтой байгаад амжилтад хүрэх боломжгүй болсныг хэлсэн юм.
“Оклахомагийн жор байна, Бостоны хийсэн ажил байна, Индианагийн хийж байгаа ажил байна. Одоо бүрэлдэхүүнд гүнзгий байдал чухал. Гурван хүнтэй байхад хангалтгүй. Одоо есөн тоглогч хэрэгтэй болсон” хэмээн нэг удаагийн аварга хэлжээ.
Тэрээр яриагаа Индианаг онцолж, багийн гүнзгий бүрэлдэхүүн, тоглолтын минутын хуваарилалт маш тэнцвэртэй байгааг магтсан юм. “Тэд 9–10 тоглогчийг үр дүнтэй ашиглаж байна. Пэйсерсийн хэн ч 34 минутаас дээш тоглож байгаа гэж би бодохгүй байна” хэмээн Селтикс, Вулвзын домог хэлжээ.
Пирс энэ үеэр шинэ Хамтын хэлэлцээрийн талаар хөндөж, “Их гурвал”-д супер гэрээ өгөх нь одоо багуудын хувьд хүндрэлтэй болсныг дурдсан. Гарнетт ч “Өгөх боломжтой ч үр дүнгүй. Тэр нь бүх зүйлийг чинь сулруулдаг” хэмээн санал нэгтэй байгаагаа илэрхийлж, урт хугацааны багийн тогтвортой байдлын талаарх чухал санааг онцолжээ.
Гэхдээ Тандер бол Пэйсерсээс ч илүү тод жишээ. Индиана дорнод бүсийн финалд ердөө ганц хожлоор дөхсөн бөгөөд тэр амжилтаа бүрэн хэмжээгээр хүртэж байна. Харин Тандер улирал даяар давамгайлсан хүч байсан бөгөөд плейоффт ч тогтмол чансаатай тоглолт үзүүлж байна.
Денвер Наггетстай хийсэн 7 тоглолтын өрсөлдөөнтэй цувралыг эс тооцвол Тандерын Шэй Гилжес-Александер, Жален Уильямс, Чет Холмгрен, Лу Дорт, Аарон Уиггинс, Айзея Хартенштайн, Алекс Карузо нарын бүрэлдэхүүн өрсөлдөгч багуудад толгойны өвчин болж байна. Одоогоор 2025 оны NBA-гийн финал Тандерын алдах боломжтой титэм болж хувирчээ.
Гэсэн ч Гарнетт зөв зүйлийг онцолж байна. Хэрвээ NBA-ийн бусад багууд өрсөлдөхийг хүсэж байвал ганц од тоглогчид тулгуурласан баг бүрдүүлэлтээр хол явах боломжгүй. Энэ нь багууд драфтад улам нухацтай, нууц хөзрөө олж хөгжүүлж чадахуйц нөөц тоглогч олоход төвлөрөх шаардлагатай болж буйг харуулж байна.
Тоглоомын үзэсгэлэнт хувьслын дараагийн бүлэг ийнхүү эхэлж байна. Хэрвээ Пэйсерс Нью-Йоркийг хожиж, Тандертай учрах юм бол аль багийн гүнзгий бүрэлдэхүүн давамгайлахыг бид харах болно.
