Холимог тулааны ертөнцөд нэр хүндтэй Кёожи Хоригүчи тун удахгүй UFC-д эргэн ирэх товтой байсан ч Азербайжаны Баку хотод болох тэмцээний хуваариас гэнэт хасагдаж, Тагир Уланбековтой хийхээр байсан тулаанд өөр тамирчин орлон оролцох болсон билээ.
Анхнааc шалтгааныг олон нийтэд зарлаагүй ч, Хоригүчигийн олон жилийн турш бэлтгэлжүүлсэн American Top Team багийн ахлах дасгалжуулагч Майк Браун энэ талаар MMA Fighting сайтад дэлгэрэнгүй тайлбар өгчээ.
“Хамрын хавирганы мөгөөрс урагдсан. Бэлтгэл маш сайн явж байсан, UFC-д эргэн ирж байгаад бид маш их баяртай байсан. Гэхдээ Кёожи өдөр бүр шаргуу, шууд тулаан шиг бэлтгэл хийдэг тамирчин. Харамсалтай нь ийм гэмтэл гарлаа” гэж Браун мэдэгдлээ.
“Хавирганы урагдал хүндэрсэн тул хөдөлгөөн бүр маш их өвдөлт өгч байсан. Эдгэрэх хугацаа нь 6-8 долоо хоног, яг тулалдах өдрүүдтэй давхцаж байлаа. Бид долоо хоног хүлээгээд дахин оролдсон ч боломжгүй байсан. Тиймээс тулаанаа хойшлуулах шаардлагатай болсон.”
Эдгэрэл бүрэн болж, бэлтгэлдээ эргэн орсноор Кёожи зургадугаар сар эсвэл долоодугаар сарын эхээр бүрэн формдоо орох төлөвтэй байгаа бөгөөд UFC-д эргэн ирэх нь урьдаар тооцоолж байснаас тийм ч хол хойшлохгүй аж.
Брауны хэлснээр Хоригүчи Уланбековтой тулалдахад хэрхэн бэлдсэн шигээ, UFC өөр хэнийг ч тавьсан бэлэн байгаа. “Тэр үнэхээр хэнийг ч сөрж тулах чадвартай. UFC хэнтэй ч тааруулсан хамаагүй. Тулаанд л орно” гэжээ.
34 настай энэ туршлагатай тамирчин өмнө нь UFC-д 7-1 гэсэн амжилт үзүүлж байсан. Ганц ялагдлаа 2015 онд тухайн үеийн аварга Деметриус Жонстонгоор амссан. Түүнээс хойш тэрээр Японы RIZIN болон Bellator холбоонд тулалдан, хоёр холбооны аварга болсон билээ.
Тэрбээр эргэн ирж буйдаа баяртай байгаагаа илэрхийлж, UFC-ийн дэвжээнд дахин нэрээ дуурсгахаар зорьж байна. Харин түүнд нэг хүндрэлтэй зүйл тулгарч болзошгүй нь 125 фунтын /flyweight – Хөнгөн жин/ ангилалд найз, багийн анд Александар Пантожа аваргын бүсийг эзэмшдэг.
Ийм нөхцөл байдал ихэвчлэн багийн нөхөрлөлийг хагалж байсан ч Пантожа өөрөө Хоригүчиг аварга болоход нь том хувь нэмэр оруулсан гэж үздэг бөгөөд түүнтэй бүсийн төлөө тулалдах бол нэр төрийн хэрэг гэж хэлжээ.
“Бид бүсийн төлөө тулалдвал нэр төрийн хэрэг. Бүс байхгүй бол би түүнтэй тулалдахгүй. Харин бүсийн төлөө бол ярилцах боломжтой. Кёожитэй хамт бэлтгэл хийхэд манай бүх багийнхан харж зогсдог. Энэ бол надад жинхэнэ бэлэг л гэсэн үг” хэмээн Пантожа энэ дөрөвдүгээр сард өгсөн ярилцлагадаа дурдсан юм.
Майк Брауны хувьд багийн анд нарын хоорондох тулааныг дэмждэггүй ч Хоригүчи, Пантожа, мөн American Top Team-ийн өөр нэг гишүүн болох ONE Championship-ийн хуучин аварга Адриано Мораес нарын харилцаа онцгой гэдгийг онцолсон.
“Би ийм нөхөрлөлийг өмнө нь хэзээ ч харж байгаагүй. Эдгээр гурван тамирчин Пантожа, Кёожи, Адриано бүгд дэлхийн шилдгүүд. ONE FC, UFC, Bellator/RIZIN-ийн аваргууд. Гэтэл бүгд маш даруу, биeэ тоодоггүй. Үнэхээр сайхан залуус. Баг дотороо бие биеэ хүндэлдэг” гэж Браун өгүүлжээ.
Тэрбээр Хоригүчиг дахин UFC-ийн дэвжээнд, дэлхийн хамгийн том тайзан дээр гарч ирэх гэж байгаад үнэхээр баяртай байгаагаа илэрхийлсэн. “RIZIN-д Япон, хэдхэн орон л хардаг. Харин UFC-г дэлхий хардаг. Тийм ч болохоор Кёожи энэ анхаарлыг хүртэх бүрэн эрхтэй. Тэр үүнийг үнэхээр зохих ёсоор хүртэх ёстой” гэж Майк Браун онцолжээ.
