Арсеналын менежер Микел Артета хөлөө эдгэж байх хугацаандаа бие бялдлаа өөрчилж чадсан Кай Хавертцыг онцлон магтжээ.
Хавертц хоёрдугаар сард Дубайд болсон улирлын дундын бэлтгэлийн үеэр хөлийн арын булчиндаа гэмтэл авч, түүнээс хойш талбайд гараагүй байгаа. Түүнийг энэ улиралд дахин тоглох эсэх нь тодорхойгүй байсан ч 24 настай тоглогч ням гарагт Ньюкаслын эсрэг хийх тоглолтод эргэн гарах магадлалтай болсон байна.
Фенүүд саяхан Эмирэйтс цэнгэлдэх хүрээлэнд болсон нээлттэй бэлтгэлийн үеэр Хавертцийн илт булчинлаг болсон биеийг анзаарчээ. Харин Артета түүний энэ өөрчлөлт санамсаргүй зүйл биш хэмээн тайлбарлав.
“Түүний бие махбодод жинхэнэ өөрчлөлт гарсан” хэмээн Артета ярьжээ. “Сүүлийн гурван жил маш шахуу хуваарьтай байсны улмаас ийм боломж түүнд гараагүй. Харин энэ удаад тэр энэ завшааныг ашиглахыг үнэхээр хүссэн.”
“Манай биеийн тамирын багийнхан түүний биеийн онцлог, хөгжүүлэх боломжийг нь нарийн тайлбарлаж өгсөн. Энэ нь зөвхөн бие махбодоор бус, сэтгэлзүйд нь ч эерэгээр нөлөөлж, талбай дээр илүү үр дүнтэй тоглогч болох нөхцөл болсон.”
“Тэр үүнийг бүрэн хүлээн зөвшөөрч, маш шаргуу ажилласан. Одоо та түүний биеийн байдал, бэлтгэл дээрх байдалд харж болно. Тэр бүр сүүлийн 10 жилийн турш манай спорт зааланд бүртгэгдсэн бүх биеийн тамирын үзүүлэлтүүдийг эвдэж чадсан.”
Kai Havertz, Declan Rice and Jorginho RETURN to training. 🔙 pic.twitter.com/6vgtITXA8J
— AFTV (@AFTVMedia) May 14, 2025
“Хүч, тэсрэлт, булчингийн масс, биеийн зарим чадваруудын сайжралт, түүний авхаалж самбаа үнэхээр гайхалтай. Би саяхан эмчилгээний багийнхантай ярьж суухад тэд энэ талаар онцолж байсан” хэмээн Артета хэллээ.
Мөн тэрбээр Хавертц багийн бүрэлдэхүүнд багтаагүй үедээ ч багийн нөхдөдөө эерэг нөлөө үзүүлж байсныг онцолсон бөгөөд түүний хандлага бусад тоглогчдын хувьд шинэ жишиг тогтоосон гэдгийг хэлжээ.
“Энэ улиралд бидэнд тулгарсан нөхцөл байдлыг харгалзан үзвэл бүх тоглогчид маань гайхалтай хүчин чармайлт гаргасан. Сүүлийн гэртээ хийх тоглолт бол үргэлж онцгой мөч байдаг. Энэ бол бидний Аваргуудын лигийн эрхээ баталгаажуулах боломж.”
“Багт багтаагүй тоглогч ийм сэтгэлгээтэй байна гэдэг тэр зөвхөн өөрийнхөө бус, бусдын түвшинг ч өргөсөн гэсэн үг. Учир нь бусад бэртэлтэй тоглогчид түүнийг хараад ‘Би ингэж ажиллахгүй бол муухай харагдана’ гэж бодож эхэлсэн. Энэ бол бидний төлөвшүүлж буй соёлын нэг хэсэг.”
“Ийм тоглогчид гараанд тоглохгүй байсан ч багийн түвшинг өсгөж байвал бид талархах ёстой. Учир нь дараагийн хүн тэр түвшинд хүрэхгүй бол илт мэдэгдэнэ. Харин энэ нь бидний багийг улам хүчирхэг болгоно.”
101greatgoals.com
