Хэрэв та өчүүхэн өдөөгч зүйлээс болж найтааж байгаа бол таны хамрын хөндийд бусдаас өөр төрлийн бичил биетүүд оршин байдаг бололтой. Олон улсын судлаачдын багийнхан өвсний харшил болон астматай хүмүүсийн хамрын хөндийд өвөрмөц төрлийн мөөгөнцөр байдаг гэдгийг илрүүлжээ. Харшилт ринит буюу өвсний харшил, астма нь барууны орнуудад хамгийн түгээмэл архаг амьсгалын замын өвчнүүд юм. Дэлхий даяар өвсний харшил 400 сая гаруй, астма 260 сая орчим хүнд нөлөөлдөг. Судлаачид эдгээр өвчний боломжит шалтгааныг судлахын тулд 339 хүүхэд, залуусын хамрын дээжийг судалж үзжээ. Үүнд 47 нь харшилт риниттэй, 155 нь харшилт ринит болон астматай, 12 нь зөвхөн астматай, 125 нь эрүүл хүмүүс байжээ. Судалгааны үр дүнд харшилт риниттэй хүмүүсийн хамрын бичил биетүүдийн бүтэц эрүүл хүмүүсийнхээс өөр болохыг тогтоожээ. Эдгээр хүмүүсийн хамарт мөөгөнцрийн олон төрөл зүйл элбэг байдаг байна. Харшилт риниттэй хүмүүсийн хамрын дээжинд мөөгөнцрийн олон янз байдал, бүтэц эрүүл хүмүүсийнхээс их байсан гэж Португалийн Порто их сургуулийн дархлаа судлаач Луис Делгадо дүгнэжээ. Энэ нь харшилт ринит нь амьсгалын замын дээд хэсгийн бичил биетүүдийн олон янз байдал, бүтцэд нөлөөлж болохыг харуулж байна. Судалгааны багийнхан мөн өвчтэй хүмүүсийн хамрын мөөгөнцрүүдийн хооронд илүү олон экологийн харилцаа байгааг олж тогтоожээ. Судлаачид илүү элбэг тохиолдсон мөөгөнцрийн төрлүүдэд Malassezia, Aspergillus, Candida, Penicillium зэрэг нь багтаж байв. Эдгээр мөөгөнцрүүд нь харшил үүсгэгч, өвчин үүсгэгч гэж танигдсан байдаг. Судлаачид мөн амьсгалын замын өвчтэй хүмүүсийн бодисын солилцооны өөрчлөлтийг судалсан. Эрүүл хүмүүсийнхээс ялгаатай нь эдгээр хүмүүсийн 5-аминоимидазол рибонуклеотид молекулын үйлдвэрлэл ихэссэн байсан нь тодорхойлогдсон. Гэхдээ эдгээр бичил биетүүдийн өөрчлөлт өвчний шалтгаан уу эсвэл үр дагавар уу гэдгийг хугацааны туршид ажиглах шаардлагатай гэж судлаачид зөвлөсөн. Энэ судалгаа “Frontiers in Microbiology” сэтгүүлд нийтлэгдсэн байна.
