Ньюкаслын ахлах дасгалжуулагч Эдди Хау Аваргуудын лигт шалгарах эрхээ баталгаажуултлаа тайвшрахгүй гэж мэдэгдлээ.
Премьер лигийн сүүлийн хоёр долоо хоногийн өмнө Ньюкасл гуравдугаар байрт бичигдэж байгаа бөгөөд сүүлийн тоглолтуудад өндөр үр дүн үзүүлээд байна. Тэд ням гарагт хоёрдугаар байрт яваа Арсеналтай тоглох бөгөөд ялалт байгуулвал математик тооцооны гайхамшиг тохиохгүй л бол Европын топ тэмцээнд ирэх улиралд оролцох эрхээ баталгаажуулах юм.
Гэсэн ч Хау багийнх нь хувьд одоохондоо баярлах болоогүй хэмээн анхааруулжээ.
Тэрээр хэлэхдээ:
“Бид хараахан шалгараагүй. Байдал тоглолтоос тоглолтод өөрчлөгдөж болдог. Тиймээс бид дараагийн тоглолтдоо бүх анхаарлаа төвлөрүүлж, ялахын төлөө зүтгэх ёстой.
Бэлтгэл сайн болсон. Тоглогчдын анхаарал төвлөрөлт ч хангалттай байна. Хүрсэн амжилт бол албан ёсоор биелсэн цагтаа л амжилт байдаг. Бид зорьсон зорилгодоо төвлөрч, анхаарлаа сарниулах ёсгүй.”
Eddie Howe on chasing UCL qualification:
“It’s not done yet. The picture can change game to game and I think we’ve got to be really focused on our next game and trying to win it. We have been, our preparation has been good and the focus is there from the players. Nothing is… pic.twitter.com/WGI6ljaqLV
— Newcastle United (@NUFC) May 16, 2025
Ботманы оролцоо эргэлзээтэй, Ньюкасл бүрэн бүрэлдэхүүнтэй очихгүй
Ньюкасл Арсеналын талбайд бүрэн бүрэлдэхүүнтэй гарахгүй бололтой.
Хагас хамгаалагч Жоэлинтон улирлын үлдсэн тоглолтуудад оролцохгүй байх магадлалтай байгаа бол Киэрэн Триппьерийн хувьд бэртэл нь тоглолтод оролцох эсэхэд томоохон эргэлзээ үүсгэж байна. Харин Нидерландын төвийн хамгаалагч Свен Ботманы өвдгөнд асуудал гарсан бөгөөд тоглолтын өмнөхөн шийдвэр гаргах гэнэ.
Хау түүний талаар хэлэхдээ:
“Тэр өвдгөндөө хүчтэй цохилт авсан. Энэ амралтын өдрүүдэд тоглож чадах эсэх нь одоогоор тодорхойгүй байгаа ч бид түүнд сэргэх боломж олгоно. Бид ноцтой бэртэл гэж үзэхгүй байгаа. Ботман үнэхээр азгүй байлаа. Түүний байрлалд ийм цохилт, гэмтэл авах нь элбэг. Хоёр дараалсан тохиолдолд таагүй байдлаар гэмтэл авсан.”
“Киэрэний хувьд энэ долоо хоногт тоглохгүй байх магадлал өндөр. Гэхдээ том бэртэл биш, хөнгөн булчин чангарсан байдалтай.”
“Жо Уиллокийн хувьд бүрэн хаахгүй, бага зэрэг боломж бий гэж харж байна.”
Жижиг бүрэлдэхүүн гэдэг эрсдэл дагуулдаг
Сүүлийн улирлуудад Ньюкаслын зүгээс жижиг бүрэлдэхүүнтэй тоглох бодлого барьж ирсэн бөгөөд энэ улиралд ч гол тоглогчид гэмтэл авахаас амжилттай сэргийлж чадсан.
Гэвч Хау энэхүү хандлага нь заримдаа эрсдэл дагуулдгийг хүлээн зөвшөөрчээ.
“Нэгдүгээр сарын наймааны цонх ч үүнд нөлөөлсөн. Бид хоёр тоглогчоо алдаж, бүрэлдэхүүн маань улам багассан. Гэсэн ч бид энэ улиралд бага бүрэлдэхүүнийг амжилттай удирдаж чадсан. Тоглолтын тоо бага байсан нь ч бэртлээс сэргийлэхэд тус болсон. Ихэнх тоглогчоо эрүүл байлгаж чадсан нь сайн хэрэг.”
“Гэсэн ч улиралд 1-2 тоглогчийн бэртэл зайлшгүй гардаг. Харин дараалсан бэртлүүд гарвал манай бүрэлдэхүүн маш хурдан нимгэрч харагдаж эхэлдэг. Улирлын төгсгөл хүртэл гол хүчээ хадгалахын төлөө залбирах л үлдлээ.”
