2025 оны 5-р сарын 23-нд хөөрсөн Космос 2588 нэртэй Оросын хиймэл дагуул дугуй хэлбэртэй тойрог замд орж, АНУ-ын USA 338 тагнуулын хиймэл дагуулын ойролцоо байрлажээ. Энэ байршил нь санаатайгаар мөрдөх зорилготой байж болзошгүй гэх таамгийг төрүүлж байгаа бөгөөд энэ нь ОХУ өмнө нь ч ижил аргаар хиймэл дагуул “араас дагуулж” ажиглаж байсан тохиолдлын үргэлжлэл байж магадгүй гэж мэргэжилтнүүд үзэж байна.
АНУ-ын Сансрын командлалын төлөөлөгч Breaking Defense-д “Оросын саяхны хөөргөлт АНУ-ын засгийн газрын хиймэл дагуулын ойролцоо байрласан нь батлагдаж байна. ОХУ сансар дахь аюулгүй байдал, тогтвортой байдалд заналхийлж болзошгүй эсрэг системүүдийг хөгжүүлж, туршиж, байршуулсаар байна. Бид энэ хөөргөлттэй холбоотой аливаа сэжиг бүхий үйлдлийг анхааралтай ажиглах болно” хэмээн ярьжээ.
Slingshot Aerospace компанийн мэдээлснээр Космос 2588 нь NIVELIR нэртэй цэргийн хиймэл дагуул бөгөөд магадгүй кинетик зэвсэг тээж яваа байж болзошгүй. Түүний USA 338-тай зэрэгцэн байрласан байдал нь уг дагуул санаатайгаар түүнийг ажиглаж эсвэл мөрдөж байгааг илтгэж байж болох аж.
Тус компанийн хиймэл дагуулын ажиглалтаас үзвэл Космос 2588 арай өндөр тойрог замд оршиж, ойролцоогоор дөрвөн өдөр тутамд USA 338-тай тун ойр зөрдөг байна. Энэ хоёр хиймэл дагуул 100 км хүрэхгүй зайд буюу 62 милийн зайд хүртэл дөхдөг гэж Нидерландын Делфт Технологийн их сургуулийн сансар судлалын мэргэжилтэн Марко Лангбройк X сүлжээнд бичжээ.
USA 338 хиймэл дагуулын тойрог замын нарийн мэдээлэл олон нийтэд ил болоогүй ч, Interesting Engineering сайтын мэдээлснээр АНУ-ын Үндэсний тагнуулын газрын KH цувралын Crystal нэртэй цахим ажиглалтын сүлжээний нэг хэсэг байх магадлалтай.
ОХУ өмнө нь ч ижил шинжтэй хиймэл дагуул хөөргөж байсан удаатай. 2023 оны дөрөвдүгээр сард нэгэн Оросын хиймэл дагуул АНУ-ын нууц цэргийн хиймэл дагуулын араас дагасан байж болзошгүй. Мөн 2022 оны наймдугаар сард хөөргөсөн Космос 2558 нь USA 326 нэртэй цэргийн дагуулын яг ижил тойрог замд орсон. 2020 онд Космос 2542 нь USA 245 нэртэй тагнуулын хиймэл дагуулыг ойроос дагаж байжээ.
Гэсэн ч АНУ ч бүрэн гэмгүй биш. 2017 оны зургадугаар сард АНУ-ын USA 276 хиймэл дагуул Олон Улсын Сансрын Станц руу ердөө 6.4 км зайтай дөхсөн удаатай. Түүнчлэн 1998 онд сонирхогчид сансар тагнах зорилгоор ашиглагдсан байж болзошгүй АНУ-ын өөр нэгэн хиймэл дагуулыг илрүүлж байв.
Оросын эдгээр хиймэл дагуулууд нь бусад дагуулыг устгах чадвартай эсрэг зэвсэг хөгжүүлэх стратегийн нэг хэсэг байж болзошгүй. 2021 оны арваннэгдүгээр сард ОХУ хуучин Зөвлөлтийн хиймэл дагуулыг буудаж устгаж, олон мянган хог хаягдал сансарт үүсгэсэн. Үүний улмаас НҮБ пуужингаар эсрэг хиймэл дагуулын туршилтыг хориглох тогтоол батлахад хүрсэн бөгөөд уг санаачилгыг АНУ-ын Байдены засаг захиргаа манлайлан дэмжсэн юм. Энэхүү тогтоолд нийт 155 улс дэмжиж саналаа өгсөн бол ОХУ, Хятад, Куба, Сири, Иран зэрэг есөн улс эсэргүүцжээ.
“Сүүлийн таван жилд дөрөв дэх удаагаа АНУ-ын оптик тагнуулын хиймэл дагуултай нэгэн тойрог замд Оросын дагуулыг байрлууллаа. Энэ бол санаандгүй тохиолдол биш, харин зориуд хийж буй үйлдэл” хэмээн Лангбройк X сүлжээнд тэмдэглэжээ.
gizmodo.com
