Үнэнтэй нүүр тулсан эгэл эмэгтэй
Киноны гол дүр — Лилли Ледбеттер нь Алабама мужийн Гудиерын дугуйн үйлдвэрийн ахлах ажилтан байсан энгийн нэгэн гэрийн эзэгтэй. 1979 онд үйлдвэрийн шугам дээрээс ажлаа эхлүүлсэн тэрбээр дараагийн 20 жилд шаргуу хөдөлмөрлөсөн ч удирдах албан тушаалд дэвших бүрт нь дарагдсаар байв. Удирдлагуудын итгэлийг даасан, туршлагатай ажилтан байсан ч үйлдвэрт ажиллаж буй цорын ганц эмэгтэй дарга нь байсан нь олон хүний дургүйцлийг төрүүлдэг байлаа.
Хамгийн хүнд үе нь түүний эрчүүдтэй харьцуулахад цалин хоёр дахин бага байгааг мэдсэн мөч. Тэр өөрийнхөө гэр бүлийнхэнд шударга хандлага хүссэнээс биш дуулиан дэгдээхийг хүсээгүй ч эцэстээ тэр шударга ёсны бэлгэ тэмдэг болж хувирна.
Кларксоны дүр бүтээх арга барил
Жүжигчин Патриша Кларксон энэ дүрийг “Хоцрогдсон үс засалт,” энгийн нэгэн ажилчин эмэгтэйн хөдөө нутгийн шударга, ухаалаг дүр төрхөөр амилуулжээ. Тэр Лиллигийн дотоод хүч, эргэлзээгүй шийдэмгий байдлыг илтгэхээс гадна энгийн хүний цөхрөл, эргэлзээг ч гярхай мэдрүүлсэн. Лилли өөрийгөө баатар гэж боддоггүй, шударга ёсны төлөө тэмцэгч болохоор зорьсон нэгэн ч биш. Гэхдээ тэр хэзээ ч шантардаггүй.
Шүүхийн танхимаас Конгресс хүртэл
Лилли анх хуулийн фирмд очиход хэргийг нь авч хэлэлцэх боломжгүй гэсэн хариу авдаг. Гэвч нэгэн өмгөөлөгчийн тусламжтайгаар шүүхэд очиж, хэдэн сая долларын нөхөн төлбөр авч чадах нь тэр. Гэвч компани давж заалдаж, шийдвэр цуцлагдана. Ингээд тэр дахин эхлэл рүү буцна. Уг хэрэг эцэстээ АНУ-ын Дээд шүүхэд хүрч, тэнд ч бас няцаагддаг.
Гэсэн ч түүний түүх хэвлэл мэдээллээр цацагдаж, нийт эмэгтэйчүүдийн цалингийн тэгш бус байдлын эсрэг тэмцлийн билэг тэмдэг болж хувирна. Улмаар 2009 онд Ерөнхийлөгч Барак Обама гарын үсэг зурсан “Lilly Ledbetter Fair Pay Act” хуулийг батлуулахад Лилли өөрөө оролцсон байдаг.
“Lilly” – Үзэгчдийн сэтгэлд дуудлага өгсөн бүтээл
Кино найруулагч Рейчел Фелдман энэ бүтээлийг сонгодог улс төрийн тууль биш, харин эгэл хүмүүсийн туулдаг шүүхийн шат дараалал, бюрократ саадыг илүү үнэн бодитоор харуулжээ. Лиллигийн нөхөр хорт хавдартай болох, хүү нь гэр бүлээ орхих зэрэг хувийн сорилтууд түүнийг бүрэн золиослогч бус, бидэнтэй адилхан хүн гэдгийг илүү ойлгуулна.
Киноны гол зөрчил нь эрх зүйн нарийн заалтад оршдог: цалингийн тэгш бус байдал бүр нь ялгаварлал мөн үү, эсвэл анхны цалингаас хойш 180 хоногийн дотор нэхэмжлэх ёстой байсан уу? Лилли энэ бүх шатыг туулж, оролдлого бүрийнхээ дараа итгэлээ алдах шахсан ч хэзээ ч найдвараа бүрэн алддаггүй.
Шударга ёс бол жирийн хүмүүсээс эхэлдэг
“Lilly” кино энгийн нэгэн эмэгтэйн шударга ёсны төлөө тэмцсэн түүхийг өгүүлдэг ч, үнэн хэрэгтээ өнөөгийн Америк нийгэм, улс төрийн тогтолцооны тухай өгүүлж байна. Энэ бол дүрэм журмаар дамжин шударга ёсыг олохыг хичээж буй энгийн иргэний түүх юм.
Энэ кино бидэнд нэгэн чухал зүйлийг сануулж байна: Хууль, тогтолцоо, улс төр хэчнээн төвөгтэй байсан ч өөрийн доторх шударга ёсны мэдрэмжээ дагаснаар хэн ч нийгэмд эерэг өөрчлөлт авчирч чадна. Патриша Кларксоны Лиллигийн дүр бол бидний дотоод хүчний тусгал юм.
variety.com
