Реал Мадридын ерөнхийлөгч Флорентино Перес Италийн дасгалжуулагч Карло Анчелоттигийн клубээс явах нь албан ёсоор батлагдсаны дараа түүнийг “Мадридистагийн гэр бүлийн гишүүн хэвээр үлдэнэ” хэмээн хүндэтгэлтэйгээр үдлээ.
Анчелотти маргааш Сантъяго Бернабеуд Реал Сосьедадын эсрэг хийх тоглолтод Реал Мадридыг сүүлчийн удаа талбайд гаргана. Энэхүү тоглолт хөгжөөн дэмжигчдийн хувьд сэтгэл хөдөлгөм үйл явдал болж, тэд Анчелотти болон Лука Модрич хоёрт үдэлтийн алга ташилтаа хүргэх боломжтой юм.
🤍 THANK YOU.#GraciasCarlo
— Real Madrid C.F. 🇬🇧🇺🇸 (@realmadriden) May 23, 2025
Перес хэлэхдээ:
“Карло Анчелотти Реал Мадридын агуу гэр бүлийн гишүүн хэвээр үлдэнэ. Тэр бидэнд зөвхөн амжилт төдийгүй, клубийн үнэт зүйлсийг үлгэр жишээтэйгээр илэрхийлж өгсөн. Тиймээс бид түүнийг хамт байсан азтай мөчүүдээр нь үргэлж дурсах болно” гэжээ.
Анчелотти хоёр удаа Реал Мадридыг удирдаж, нийт 15 цом хүртсэн. Үүнд гурван удаагийн Аваргуудын лигийн түрүү, хоёр удаагийн Ла Лигийн аварга цол багтаж байна.
Гэсэн ч энэ улирал түүний хувьд тааруухан өнгөрчээ. Барселонатай хийсэн дөрвөн Класико тоглолтод бүгдэд нь ялагдсан бөгөөд Хааны цомын шигшээд ч мөн Барсад дийлджээ. Түүнчлэн Реал Мадрид Ла Лигийн түрүүг Барселонад алдан хоёрдугаар байрт бичигдсэн бол Аваргуудын лигийн хамгаалал ч Арсеналд хожигдсоноор шөвгийн наймд өндөрлөв.
Анчелотти улирлын төгсгөлөөр, Клубуудын дэлхийн аваргын өмнө Реал Мадридаас явна гэдгээ өмнө нь баталсан билээ. Тэрбээр зургадугаар сард Бразилын шигшээ багийн дасгалжуулагчаар ажиллаж эхлэх бөгөөд 2026 оны АНУ, Канад, Мексикт болох ДАШТ-д “Селесао”-г удирдан оролцоно.
