Реал Мадрид энэ улирлын сүүлийн тоглолтоо Сантъяго Бернабеу цэнгэлдэхэд хийж, Реал Сосьедадыг 2-0-ээр буулган авлаа. Энэ тоглолт нь клубийн домогт тоглогч Лука Модрич, дасгалжуулагч Карло Анчелотти нарын сүүлчийн тоглолт болж, сэтгэл хөдөлгөм салах ёсны уур амьсгалтайгаар болж өнгөрлөө.
Талбайн гол баатар нь Франц довтлогч Килиан Мбаппе байв. Тэрбээр хоёр гоол оруулж, багтаа итгэлтэй ялалт авчирсан бөгөөд үзэгчдийн талархлыг хүлээв.
Эхний хагаст Реал Мадрид бөмбөгийн ихэнхийг эзэмшиж, Гүлер болон Вальверде нар хагас хамгаалалтын шугамаас довтолгоог урагшлуулж байв. Мбаппе хоёр ч удаа гоолд дөхсөн боловч хаалгач Ремиро түүнийг зогсоож чадсан. Харин Сосьедадын хувьд хамгийн боломжит үе нь Серхио Гомес хаалгачтай нүүр тулсан довтолгоо байсан ч Лүнин гайхалтай хаалтаар хааж чадсан.
Тоглолтын онцлох мөч 38 дахь минутад тохиов. VAR-ийн тусламжтайгаар Мариний гарын алдааг илрүүлж, Реал Мадрид торгуулийн цохилт авах эрхтэй болсон. Мбаппе анхны цохилтоо хаалгачаар хаалгасан ч, өөрөө бөмбөгийг эргүүлэн авч, дахин довтолж гоолдсон нь багтаа 1-0-ийн давуу талыг авчирсан юм.
2-р үед Сосьедад сэлгээ хийж, хариу арга хэмжээ авахыг оролдсон ч Мадрид тоглолтын хэмнэлийг үргэлжлүүлэн атгаж байв. Анчелоттигийн удирдсан баг тэвчээртэй тоглож, Вальверде, Гүлер нар довтолгооны боломжийг тасралтгүй эрэлхийлсэн хэвээр байлаа. Диааз бэртлийн улмаас талбайг орхиж, түүний оронд Винисиус Жуниор орж ирэн, зүүн жигүүрийн довтолгоонд эрч хүч нэмэв.
🏁 @RealMadridEn 2-0 @RealSociedadEN
⚽ 38′ @KMbappe
⚽ 83′ @KMbappe
👉 @Emirates pic.twitter.com/hPmPwM0K1e— Real Madrid C.F. 🇬🇧🇺🇸 (@realmadriden) May 24, 2025
Хоёр дахь гоол 83 дахь минутад төрөв. Винисиус Жуниор, Килиан Мбаппе нарын төгс уялдаа энэхүү гоолыг бүтээлээ. Винисиус бөмбөгийг хамгаалагчдыг дагуулан авч явсны дараа Мбаппегийн гүйх чиглэлд таарсан, ухаалаг дамжуулалт өгсөн бөгөөд франц довтлогч ойрын буланд цохиж, тоглолтын хувь заяаг нэг мөр шийдсэн юм.
Гэсэн ч энэ үдэш зөвхөн спортын үр дүнгээр бус, сэтгэл хөдлөл, дурсамжаар дүүрэн байлаа. Сүүлийн минутуудад сэлгээнд гарахдаа Лукас Васкес болон Лука Модрич нар Бернабеу дүүрэн үзэгчдийн алга ташилт дунд талбайг орхив.
Ялангуяа Модрич талбайг орхихдоо хөгжөөн дэмжигчдийн хайр хүндлэлийн дуулал дор үдэгдэж, хоёр багийн тоглогчид түүнийг хүндэтгэлийн хонгилоор үдсэн нь энэ үдэш нэгэн түүхэн үеийн хаалгыг хааж буйг бэлгэдэж байв. Тэр бол Реал Мадридын түүхэн дэх хамгийн аугаа хагас хамгаалагчдын нэг байсаар үлдэх нь гарцаагүй.
Мөн энэ тоглолт Карло Анчелоттигийн Реал Мадридыг удирдсан сүүлийн тоглолт байв. Тэрбээр одоо Бразилын шигшээ багийг удирдахаар зэхэж байгаа бөгөөд Испанид өнгөрүүлсэн хоёр удаагийн бүрэн эрхийн хугацаанд багтаа тоолж баршгүй олон сайхан мөчүүдийг авчирсныг нь дурсан, өөрт нь зориулсан онцгой салах ёслол ч болж өнгөрлөө.
