Италийн аваргуудын нэг “Интер Милан” баг шинэ дасгалжуулагч хайж байгаа энэ үедээ Сеск Фабрегасыг удирдагчаар авахаар зорьсон ч Комо клубын татгалзсан хариугаар уг оролдлого зогсоод байна.
Симоне Инзаги Саудын Арабын “Аль Хилал”-тай ашигтай гэрээ байгуулан явсны дараа түүнийг орлох гол сонголтоороо “Интер” Фабрегасыг нэрлэжээ. Энэ улирлын эхэнд Комогийн бүрэн эрхтэй дасгалжуулагчаар томилогдсон тэрбээр багийг Сери А-д 10 дугаар байрт хүргэж, олон нийтийн анхаарлыг татсан юм.
Харин Комо клубын ерөнхийлөгч Мирван Суварсо “Интер”-ийн саналыг албан ёсоор няцааснаа илэрхийлжээ. Түүний хэлснээр:
“Бид өөрсдийн шийдвэрээ ‘Интер’-ийн ерөнхийлөгчид шууд мэдэгдсэн. Харилцан хүндэтгэлтэй хоёр клубын хооронд ийм ил тод байдал байх ёстой. Ийм тодорхой хариултын дараа дахин санал тавих нь утгагүй хэрэг. Тэр тусмаа ‘Интер’ шиг нэр хүндтэй клубт бол бүр ч тийм” хэмээн онцолсон байна.
Виейра, Чиву нар анхаарлын төвд орлоо
Италийн хэвлэлүүдийн мэдээлснээр, одоо Патрик Виейра болон Кристиан Чиву нар “Интер”-ийн дараагийн боломжит сонголтуудын тоонд багтаж байна. Виейра одоогоор Геног удирдаж байгаа бол Чиву саяхан Пармагийн дасгалжуулагчаар томилогдоод байгаа бөгөөд өмнө нь “Интер”-ийн залуучуудын багийг удирдаж байв.
Хэн ч энэ албан тушаалд томилогдсон бай, Инзагигийн үлдээсэн амжилтыг давтах нь амаргүй сорилт байх болно. Тэрбээр “Интер”-ийг удирдсан дөрвөн жилдээ Сери А-гийн аварга цол, хоёр Италийн цом, гурван Супер цом хүртсэн. Гэвч Аваргуудын лигийн цом л түүнд дутаж үлдсэн.
Инзаги багийг хоёр ч удаа финалд хүргэж байсан ч 2023 онд “Манчестер Сити”-д, харин өнгөрсөн амралтын өдрүүдэд “ПСЖ”-д ялагдсан. Мюнхенд болсон сүүлийн финалын тоглолтод “Интер” Францын багт 5:0-ээр бут ниргүүлжээ.
101greatgoals.com
