Сүүн зам ба Андромеда галактикуудын мөргөлдөөн ойрын үед болохгүй байж магадгүй
Сүүн зам ба түүний ойрын том хөрш галактик болох Андромеда хоёрын мөргөлдөөн заавал тохиолдохгүй ч байж магадгүй гэж эрдэмтэд үзэж байна. Өмнө нь энэ хоёр галактик ирэх 5 тэрбум жилийн дотор нэгдэн, “Милкомеда” нэртэй шинэ галактик үүсгэнэ гэсэн таамаглал байсан юм.
Гэвч шинэ судалгааны дүнгээс үзэхэд Сүүн зам ба Андромеда галактикууд ирэх 10 тэрбум жилийн хугацаанд мөргөлдөх магадлал илүү бага байгааг харуулжээ. Судалгааны багийн ахлагч, Хельсинкийн их сургуулийн судлаач Тил Савала хэлэхдээ, эдгээр хоёр спираль галактикуудын мөргөлдөх магадлал ердөө 50 хувьтай байна гэжээ. Өөрөөр хэлбэл, бараг л баталгаатай байсан магадлал одоо зоос шидэхтэй адилхан болжээ.
Савала болон түүний хамтрагчид Сүүн замын ирэх 10 тэрбум жилийн аялалыг шинээр загварчилсан байна. Энэ загварчлал нь Хаббл сансрын дуран болон Европын сансрын агентлагийн Гайя сансрын дурангийн шинэ мэдээллүүдийг ашиглажээ. Түүнчлэн Сүүн замын орчим дахь жижиг оддын массыг шинэчлэн тооцож, тэдгээрийн таталцлын нөлөөг харгалзан үзжээ.
Савалагийн хэлснээр, тэдний судалгаа нь өмнөх судалгаануудаас илүү нарийвчлалтай мэдээлэлд тулгуурласан бөгөөд Сүүн замын хамгийн том дагуул галактик болох Их Магелланы үүлний нөлөөг ч мөн харгалзан үзсэн байна. Мөн энэ судалгаагаар Сүүн зам ба Андромеда галактикуудын ирээдүйд ямар байдалд хүрч болох янз бүрийн хувилбаруудыг танилцуулжээ.
Судлаачид энэ мөргөлдөөн хэрхэн өрнөхийг тодорхойлж чадахгүй байгаа ч, хэрэв энэ хоёр галактик ойртон таталцалд орвол нэгдэх магадлалтай гэж үзжээ. Гэхдээ хэрэв тэдгээр нь 500,000 гэрлийн жилийн илүү хол зайд ойртвол мөнхийн салсан чигээрээ үлдэж болно гэж үзжээ.
Судалгааны багийнхан Их Магелланы үүлний нөлөөг харгалзан үзэхэд, Сүүн зам Андромеда галактиктай нэгдэх магадлал буурснаар барахгүй, харин энэ дагуул галактикийг “идэх” магадлал нэмэгдсэн байна. Тэдний үзэж байгаагаар Сүүн зам ирэх 2 тэрбум жилийн дотор Их Магелланы үүлтэй нэгдэх магадлалтай байна.
Энэхүү судалгааны үр дүнг “Nature Astronomy” сэтгүүлд 6-р сарын 2-нд нийтэлжээ. Савала хэлэхдээ, Сүүн зам ба Андромеда галактикууд мөргөлдөх эсэхийг илүү нарийвчлалтай мэдээллээр тодорхойлох шаардлагатай байгаа бөгөөд ирээдүйд Гайя сансрын дуран болон Хаббл сансрын дурангийн шинэ мэдээллүүд тус болно хэмээн найдаж байна.
Эх сурвалж:
