Хиймэл оюун ухаан болон эрчим хүчний салбарт 90 тэрбум ам.долларын хөрөнгө оруулалт хийгдэнэ
АНУ-ын Ерөнхийлөгч Дональд Трамп Пенсильвани мужид болсон арга хэмжээний үеэр хиймэл оюун ухаан болон эрчим хүчний салбарт 90 тэрбум ам.долларын хөрөнгө оруулалт хийгдэх талаар зарлалаа.
Эдгээр хөрөнгө оруулалтын дотор Google компаниас хийгдэх олон тэрбум ам.долларын амлалт багтаж байна. Тус компани PJM бүсийн цахилгаан сүлжээний хиймэл оюун ухааны дэд бүтцийг байгуулахад 25 тэрбум ам.доллар зарцуулахаар төлөвлөж байгаа бөгөөд Brookfield Energy-тэй хамтран 3 тэрбум ам.долларын усан цахилгаан станцын гэрээ байгуулж байна гэж тус компанийн ерөнхийлөгч Рут Порат мэдэгдлээ.
Cloud computing компани болох CoreWeave Пенсильвани мужид хамгийн сүүлийн үеийн хиймэл оюун ухааны хэрэглээг дэмжих шинэ дата төв байгуулахад 6 тэрбум гаруй ам.долларын хөрөнгө оруулалт хийхээр төлөвлөж байгаагаа зарлалаа. Meta компани Пенсильвани мужийн хөдөө орон нутгийн гарааны бизнесүүдийг дэмжихэд 2.5 сая ам.доллар зарцуулах бөгөөд жижиг бизнесүүдэд зориулсан нийгмийн хурдасгуур сургалтыг зохион байгуулах юм. Anthropic компани Карнеги Меллон их сургуульд эрчим хүчний судалгааг дэмжихэд 3 жилийн хугацаанд 1 сая ам.доллар, мөн кибер аюулгүй байдлын боловсролыг дэмжихэд 1 сая ам.доллар зарцуулахаар амлалаа.
Эдгээр хөрөнгө оруулалтад зарим хийн компаниудын хөрөнгө оруулалт ч багтсан байна. Enbridge компани Пенсильвани мужид хийн хоолойг өргөжүүлэхэд 1 тэрбум ам.доллар зарцуулахаар төлөвлөж байгаа бол Equinor компани Пенсильвани муж дахь хийн үйлдвэрлэлийг нэмэгдүүлэхэд 1.6 тэрбум ам.доллар зарцуулах бөгөөд дата төвүүдэд зориулсан уян хатан эрчим хүчний үйлдвэрлэлийг судлах боломжийг хайж байна.
Эдгээр хөрөнгө оруулалтууд нь Пенсильвани мужид болсон “Эрчим хүч ба инновацийн дээд хэмжээний уулзалт”-ын үеэр зарлагдсан юм. Пенсильвани муж нь АНУ-ын хийн үйлдвэрлэлийн тэргүүлэгч муж бөгөөд фракинг технологийн төв юм. Ерөнхийлөгч Трамп энэ үеэр “өрөмд, өрөмд, өрөмд” хэмээн уриаллаа.
Эх сурвалж:
Trump announces billions in investments to make Pennsylvania an AI hub
President Donald Trump announced billions in investments in AI and energy at an event in Pennsylvania. Google is among the companies making investments.
