Paramount+ платформын алдартай гэмт хэргийн драм “Тулса Кинг” цувралын гол дүрийн жүжигчин Сильвестер Сталлоне шинэ улирлын тухай сэтгэл хөдөлгөм мэдээллийг ил болгов.
“Тулса Кинг” цувралд Сильвестер Сталлоне шоронгоос дөнгөж суллагдсан, мафийн ертөнцөөс хөөгдсөн Двайт “Генерал” Манфреди гэх хуучин гэмт хэрэгтний дүрийг бүтээдэг. Манфреди Тулса, Оклахомад нүүж ирэн шинэ гэмт хэргийн сүлжээг бий болгохыг оролддог.
Сильвестер Сталлоне “Тулса Кинг”-ийн 3-р улирлын талаар юу хэлэв?
Сталлоне өөрийн албан ёсны Instagram хуудсаараа дамжуулан цувралын 3-р улирал хөгжүүлэлтийн шатанд орсон тухай мэдэгдсэн. Тэрбээр “Тулса Кинг”-ийн зохиолын хуудаснаас зураг хуваалцаж, дээр нь олон зураас, тэмдэглэлүүд байгааг харуулсан. Гэхдээ энэ нь 3-р улирлын ангид хамааралгүй бөгөөд “Ep. 206” буюу 2-р улирлын 6-р ангийн зохиол байв.
Сталлоне уг зургийг нийтлэхдээ:
“За, дараагийн улиралдаа бэлтгэх цаг ирлээ … Багтаа амжилт хүсье!” хэмээн бичиж, 3-р улирлыг баталсан мэт сэтгэгдэл төрүүлсэн юм.
2024 оны арваннэгдүгээр сард Deadline сайтын мэдээлснээр “Тулса Кинг”-ийг 3 болон 4-р улиралдаа шинэчлэн захиалсан байна. Мөн Сильвестер Сталлоне нэг ангид 1.5 сая ам.доллараас давсан цалин авах болсон гэж уг эх сурвалж дурджээ.
Цувралын үзүүлэлтүүд өсөж байна
“Тулса Кинг”-ийн 2-р улирал Paramount+ платформ дээр томоохон амжилт үзүүлжээ. Улирлын нээлтийн анги эхний өдөртөө хоёр сая үзэлттэйгээр дээд амжилт тогтоосон бол нийтдээ 35 хоногийн дотор 10 сая өрх үзсэн үзүүлэлтээр 1-р улирлыг 8%-иар давсан байна.
Иймд Paramount+ платформ уг цувралыг дараалсан хоёр улиралд шинэчилсэн нь гайхах зүйл биш юм.
“Тулса Кинг” 3-р улирал хэзээ гарах вэ?
3-р улирлын албан ёсны нээлтийн огноо хараахан зарлагдаагүй байгаа. Хэрэв 2025 оны эхээр зураг авалтаа эхлүүлбэл, цуврал 2025 оны сүүл эсвэл 2026 оны эхээр үзэгчдийн хүртээл болох магадлалтай.
2023 оны Холливудын ажил хаялт нь “Тулса Кинг”-ийн үйлдвэрлэлийг хойшлуулж, улирлуудын хоорондох хугацааг уртасгасан билээ.
Гол дүрүүд болон зохиолын талаар
Сильвестер Сталлоне Двайт Манфредигийн дүрд эргэн ирэх нь тодорхой болсон бөгөөд гол дүрийн жүжигчид болох Андреа Савидж, Мартин Старр нар ч мөн цувралд үргэлжлэн тоглохоор хүлээгдэж байна. Харин 3-р улирлын зохиол болон бусад дүрүүдийн талаар мэдээлэл хараахан гараагүй байгаа юм.
thedirect.com
