Bloomberg-ийн мэдээлснээр, Audi-д ойр эх сурвалжууд Q5-ийн эдийн засгийн үр ашгийг Трампын худалдааны олон давхар татварууд эргэлзээтэй болгоно гэж анхааруулжээ. Үнэ нь 45,400 ам.доллараас эхэлдэг энэхүү компакт кроссовер нь дараах гурван төрлийн татварт нэгэн зэрэг хамрагдаж байгаа нь асуудал үүсгэж байна:
- Гадаадаас оруулж ирж буй автомашин, сэлбэгт ноогдуулах 25%-ийн татвар
- Мексикоос импортолж буй бүх бүтээгдэхүүнд оногдох тусдаа 25%-ийн татвар
- АНУ–Мексик–Канадын гэрээний (USMCA) шаардлагыг хангаагүй автомашинд ногдох 2.5%-ийн татвар
Эдгээр татварууд нийлбэл, Audi-д Мексикийн Сан-Хосе Чиапа хотоос оруулж ирж буй нэг бүр Q5 автомашинд нийт 52.5%-ийн татвар ноогдох эрсдэлтэй болж байгаа нь АНУ дахь хэрэглэгчдэд үнэтэй цохилт болох юм.
“Q5 бол сайн машин. Гэхдээ хэрэв түүнийг тэнд үйлдвэрлэж байгаа бол АНУ-д зарах боломжгүй болно” хэмээн автомашины зөвлөх компанийн захирал Амброуз Конрой Bloomberg-т ярьжээ.
Q5 анх чөлөөт худалдааны нөхцөлийг ашиглахаар бүтээгдсэн байв, харин одоо бүх зүйл өөрчлөгдөж магадгүй
Audi-ийн Хойд Америк дахь цорын ганц үйлдвэр болох Мексикийн Сан-Хосе Чиапа хот дахь үйлдвэр нь Q5 загварын гол үйлдвэрлэлийн төв бөгөөд 2016 онд ашиглалтад орсон. Энэ үйлдвэр нь АНУ-ын зах зээлийг чиглэсэн, хөдөлмөрийн хямд өртөг бүхий стратегийн байрлалтай байв. Түүнээс хойш Audi энэ үйлдвэрт 1 сая гаруй Q5 үйлдвэрлэж, АНУ-д дэлхийн нийт борлуулалтынхаа гуравны нэгийг хийжээ. 2024 онд АНУ-д 56,799 Q5 борлогдсон нь тус бүс нутгийн Audi-ийн нийт борлуулалтын дөрөвний нэгийг эзэлсэн үзүүлэлт юм.
Эх сурвалжуудын хэлснээр, уг үйлдвэр нь зөвхөн АНУ төдийгүй Европоос бусад зах зээлд Q5 нийлүүлэх зорилготой байсан. АНУ-д чиглэсэн Q5 машинууд Мексикт эцсийн угсралт хийгддэг ч, хөдөлгүүр нь Унгарт, хурдны хайрцаг нь Германд үйлдвэрлэгддэг бөгөөд бусад сэлбэгийг Мексикоос хангадаг.
Үүний улмаас, Мексикт үйлдвэрлэсэн Q5 машинууд USMCA гэрээний шаардлагыг хангадаггүй. Үндэсний Хурдны Замын Аюулгүй Байдлын Захиргаанаас (NHTSA) гаргасан Америкийн Автомашины Шошгоны Хууль-ийн мэдээллээр, Q5-ийн эд ангийн ердөө 2% нь АНУ болон Канад улсад үйлдвэрлэгддэг тул энэ загвар татварын хамгийн өндөр эрсдэлтэйд тооцогдож байна.
Volkswagen шинэ гарц хайж байна
Трампын 25%-ийн татвар 4-р сарын 3-наас хүчин төгөлдөр болсноос хойш Audi АНУ-д ирсэн машинуудыг агуулахдаа хадгалж байгаа аж. Одоогоор Audi АНУ-ын агуулахдаа 37,000 тээврийн хэрэгсэл хадгалж байгаа нь хоёр сарын нөөцтэй тэнцэнэ. Q5 нь татварт өртөж болзошгүй цорын ганц загвар биш. Унгарт үйлдвэрлэсэн жижиг оврын Q3 кроссовер нь 2024 онд 45%-иар өссөн ч $39,800 үнээ хадгалах боломж эргэлзээтэй болоод байна.
Үүний зэрэгцээ, Volkswagen групп Хойд Америк дахь стратегиа дахин боловсруулж эхэлсэн. Volkswagen-ийн Гүйцэтгэх захирал Оливер Блюме өмнө нь аливаа томоохон шийдвэр гаргахаас өмнө нөхцөл байдлын тодорхой болохыг хүлээж байгаагаа мэдэгдсэн. 4-р сарын 9-нд компанийн зүгээс татварын нөлөөллийг жилийн орлогодоо хэрхэн тооцохоо хараахан шийдээгүй байгааг мэдэгдсэн байна.
Дүгнэлт
Өмнө нь Reuters агентлагийн мэдээлснээр, Audi нь 3-р сарын 18-нд жилийн тайлангаа танилцуулах үеэр АНУ-ын импортын татварын зардлыг хэрэглэгчдэд үнээр дамжуулан шилжүүлэх талаар хэлэлцэж буйгаа мэдэгдсэн. Санхүү хариуцсан захирал Юрген Риттерсбергер “Үнэ нэмэх, үйлдвэрлэлийн тоо хэмжээг өөрчлөх хоёрын тэнцвэрийг хайж байна. Зарим зардлыг хэрэглэгчдэд үнээр дамжуулж магадгүй” хэмээжээ.
Тайлангийн үеэр Audi-ийн Гүйцэтгэх захирал Гернот Дёллнер АНУ-ыг Audi-ийн “гол өсөлтийн зах зээл” хэмээн тодорхойлж, улс төрийн нөхцөл байдлаас үл хамааран энэ зах зээлд байр сууриа тэлэхийг зорьж байгаагаа онцолсон. “Бид энэ зорилгоо баримталж байна. АНУ дахь улс төрийн нөхцөл байдал өөрчлөгдсөн ч бид энэ чиглэлээ хадгална” хэмээн хэлэхдээ, Audi-ийн зарим үйлдвэрлэлийг одоо байгаа Volkswagen-ийн үйлдвэр эсвэл шинэ байгууламж руу шилжүүлэх боломжтойг нэмж дурдсан.
autoblog.com
