Ясукегийн тайлагдашгүй түүхийн эхлэл
Самурай нар Японы түүхийг хэдэн зууны турш тодорхойлж, тэдний адал явдлууд домог болон үлджээ. Эдгээрийн дунд хамгийн сонирхолтой, нууцлаг нэгэн бол 16-р зуунд самурай болсон гэх Африк гаралтай Ясуке юм.
Одоо Ясуке Assassin’s Creed Shadows хэмээх самурай сэдэвт видео тоглоомд дүр бүтээж буй. Гэхдээ тэр үнэхээр хэн байсан бэ? Түүний тухай түүхчид юу өгүүлдэг вэ?
Ясукегийн амьдралын эхэн үе тодорхойгүй хэвээр. Зарим судлаачид түүнийг 16-р зууны дунд үед Мозамбикт төрсөн гэж үздэг бол зарим нь Африкийн өөр газар төрсөн байж болзошгүй гэж таамагладаг. Тэрээр Японд хүрэлцэн ирснийхээ дараа л “Ясуке” гэх нэрийг авчээ.
Ясуке 1570-аад оны сүүлээр Африк эсвэл Энэтхэгт иезуит номлогч Алессандро Валиньянотой уулзсан байх магадлалтай. Азийн католик номлолыг удирдах үүрэгтэй байсан Валиньяно түүнийг хамгаалагчаараа авч, Энэтхэг, Хятад, Японыг дамжин аялжээ.
Тэр 180 см-ээс өндөр биетэй байсан нь Японы хүмүүсийн дунд түүнийг содон харагдуулж байв. Түүний хүч чадал гайхалтай байсан гэж тухайн үеийн “Нобунага эзний тууж” номд тэмдэглэж, “арван эр хүний хүчтэй тэнцэнэ” хэмээн дүрсэлжээ.
Ясуке Японд ирсэн анхны Африк гаралтай хүн биш байсан ч, тэр маш их анхаарал татсан байна. Түүнийг харахын тулд хүмүүс гудамжинд олноор цугларч, Сакай хотод түүнийг харах гэсэн үймээнээс болж барилгууд эвдэрч байжээ.
Ясуке самурай байсан уу?
1581 онд Ясуке Японыг нэгтгэхийг зорьж байсан хүчирхэг жанжин Ода Нобунагагийн анхаарлыг татжээ. Энэ үед Япон улс Сенгокүгийн үе буюу “Дайтаж буй улс төрүүдийн эрин”-д байсан бөгөөд язгууртнуудын хоорондын тэмцэл тасралтгүй үргэлжилж байв.
Нобунага анх Ясуке-г хараад арьсыг нь хар будагтай гэж бодон угаахыг тушааж байсан гэх яриа бий. Гэхдээ удалгүй Ясуке түүнийг гайхшруулж, япон хэлний мэдлэгтэй болохоо харуулсан тул Нобунага түүнд гэр, мөнгө, үйлчлэгч өгч, өөрийн албандаа авсан байна.
Ясуке-д католик номлогч Луис Фройсын тэмдэглэснээр Нобунага өндөр зэрэглэл хүртээх магадлалтай гэж хүмүүс үзэж байжээ. Түүхчид түүнийг албан ёсны самурай байсан эсэх дээр санал зөрдөг. Учир нь самурай гэдэг зүгээр нэг дайчин бус, харин язгууртны давхаргад төрж, бага наснаасаа эхлэн тулааны урлаг, соёл, философи зэрэгт суралцдаг байв. Гэхдээ Нобунага түүнд сэлэм бэлэглэсэн нь Ясуке-г самурай хэмээн тооцож байсны нотолгоо болж магадгүй.
Самурай байсан эсэхээс үл хамааран Ясуке Нобунагагийн талд үнэнчээр тулалдаж байв. Гэвч 1582 онд Нобунагагийн вассал Акетчи Мицүхидэ тэрсэлж, түүнийг Киотогийн нэгэн сүмд бүслэжээ. Ясуке эрэлхэгээр тэмцсэн ч эцэст нь Нобунага ялагдаж, сэппүкү (ёс журмын дагуу амиа егүүтгэх) үйлджээ.
Дараа нь Ясуке баригдсан боловч япон хүн биш гэдэг шалтгаанаар Акетчи түүний амийг өршөөсөн гэдэг.
Ясуке хэрхэн алга болов?
Нобунагагийн дараа Ясуке ямар хувь заяа туулсан нь тодорхойгүй. Зарим түүхчид түүнийг Японд үлдсэн гэж үздэг бөгөөд 1590-ээд онд өндөр нуруутай Африк хүн Японд байсан тухай бичсэн тэмдэглэл байдаг. Гэхдээ энэ хүн үнэхээр Ясуке байсан уу гэдэг нь одоог хүртэл оньсого хэвээр байна.
nationalgeographic.com
