World of Warcraft хуучин хэв маягаа хадгалсан ч танигдахын аргагүй өөрчлөгдөж байгаа ч энэ нь зориудын шийдэл юм.
World of Warcraft өнөөдөр, 2024 оны 11-р сарын 23-нд 20 жилийн ойгоо тэмдэглэж байна. Доорх нийтлэлд бид тус тоглоомыг өнөөгийн түвшинд хүргэх замнал болон ирээдүйн төлөвлөгөөнүүдийн талаар гол хөгжүүлэгчидтэй ярилцлаа.
20 жилийн өмнө World of Warcraft гарч ирсэн нь тоглоомын ертөнцийг үүрд өөрчилсөн билээ. Анх зөвхөн цөөн хүрээнд танигдсан MMORPG жанр нэг шөнийн дотор өргөн хүрээнд тархсан. Blizzard өмнөх тоглоомуудаас, тухайлбал Everquest-ээс санаа авч, тэдгээрийг илүү боловсронгуй, нарийн, тоглогчдод илүү сонирхолтой болгож хөгжүүлсэн. Үүний үр дүнд WoW нэрээр алдаршсан энэхүү тоглоом өрх бүрт танигдсан соёлын үзэгдэл болж, өнөөдрийг хүртэл олон сая тоглогчид сард 15 доллар төлөн Азеротын уран зөгнөлт ертөнцөд өөрсдийн цахим адал явдлаа үргэлжлүүлэхийг сонгосоор байна.
2004 оны 11-р сарын 23-нд анх гарсан WoW өнөөг хүртэл техникийн хувьд адилхан тоглоом хэвээр ч, өнөөгийн хувилбартайгаа харьцуулахад асар их өөрчлөгдсөн нь гайхах зүйл биш юм. Хамгийн сүүлийн өргөтгөл болох The War Within дансанд суурилсан ахиц дэвшил, ганцаар тоглох шинэ төгсгөлийн агуулгыг нэмж оруулсан. Энэ нь арван жилийн өмнө төсөөлөхөд ч бэрх санаа байсан ч тоглогчдын зүгээс бараг бүх нийтийн сайшаал хүлээгээд байна.
Орчин үеийн WoW тоглоом настайгаараа хэрхэн ялгарч байгааг 2019 онд Blizzard Classic хувилбаруудыг гаргаж эхэлснээс харж болно. Тоглогчид анхны хувилбар болон эхний хэдэн өргөтгөлүүдийг албан ёсны бус хувилбараар тоглож байсан бол одоо тэдгээрийг албан ёсоор дахин турших боломжтой болсон. Одоогоор WoW тоглоомын таван өөр хувилбарыг сонгох боломжтой: WoW Classic, Season of Discovery, Cataclysm Classic, WoW Classic Hardcore, болон The War Within. Энэ нь Blizzard-ын MMORPG тоглоомын хэмжээ, соёлд үзүүлсэн нөлөө ямар байсныг харуулж байна. 2024 онд олон амьд үйлчилгээтэй тоглоомууд хэдхэн сар тогтох нь элбэг байхад Blizzard нэгэн зэрэг таван өөр хувилбарыг ажиллуулж, тэдгээрийг амжилттай удирдаж байна.
YouTube хэрэглэгч SpecialAgentSqueaky-ийн нийтэлсэн WoW-ийн эхний үеийн бичлэг
World of Warcraft: The War Within
WoW-ийн 20 жилийн ойн хүрээнд GameSpot WoW хөгжүүлэлтийн багийн тэргүүлэх гишүүдтэй ярилцаж, Азеротын виртуал ертөнцийг онцгой болгодог зүйлс, WoW яагаад ийм удаан хугацаанд оршин тогтнож ирсэн тухай болон баг ирэх 20 жилийн төлөвлөгөөг хэрхэн боловсруулж байгаа талаар тэдний бодлыг хуваалцсан юм.
Гүйцэтгэх продюсер Холли Лонгдейлийн хувьд, тоглоомын танил мэдрэмж нь—олон жилийн өмнө тоглож байсан тоглогчид буцаж ирэхэд тоглоомоо таньж чаддаг байдал—тоглоомын урт хугацааны амжилтад чухал хувь нэмэр оруулдаг гэж үздэг. Энэ шалтгаанаар баг WoW-ийн харагдах байдал, сэдэв, эсвэл хөгжилтэй, энгийн хошин агуулга бүхий даалгаврын текст зэрэг жижиг зүйлсээрээ ч тогтвортой байхын төлөө хичээдэг.
Гэртээ эргэн ирэх мэдрэмж үнэхээр хүчирхэг зүйл байдаг,” хэмээн Лонгдейл хэлжээ. “Хэрэв та зургаа, долоо, эсвэл бүр арван таван жил тоглоогүй байсан ч буцаж ирэхэд яг таньдаг, дурлаж байсан тэр л газар байлгах нь бидний гол зорилго юм.
Энэ шалтгааны улмаас WoW график эсвэл урлагийн хэв маягтаа огцом томоохон өөрчлөлт хийхгүй гэж Лонгдейл хэлэв. Энэ талаар Blizzard-ээс олон асуулт ирдэг ч энэ нь “эрсдэлтэй бөгөөд хийх хэрэггүй алхам” гэж тэр үзжээ.
Мөн тэрээр WoW өнөөдрийн MMORPG тоглоомуудтай харьцуулахад тодорхой нэг давуу талтай гэдгийг нээлттэй хүлээн зөвшөөрсөн юм—WoW олон талаар анхдагч байсан.
Үнэндээ, ийм төрлийн анхны тоглоом байж, цөөн хүрээнд танигдсан жанраас гаралтай мөртлөө өргөн хүрээнд алдаршсан бол та тодорхой давуу талтай байдаг,” гэж Лонгдейл хэлсэн. “Бид үүнийг хэзээ ч өөрөөр ойлгож, дутуу үнэлдэггүй. Бид энэ давуу талынхаа үнэ цэнийг маш сайн мэддэг.
Blizzard тоглогчдыг хэзээ ч хоцроохгүй байхыг зорилго болгосон ‘leave no player behind’ уриан дор WoW-ийн олон янз, өргөн хүрээтэй тоглогчдын хүсэл, хэрэгцээг хэрхэн биелүүлэх талаар судалж байна. Үүний нэг хэсэг нь 2022 оны Dragonflight өргөтгөлөөс хойш тогтмол шинэчлэлт гаргах явдал болжээ (Лонгдейл өнгөрсөн 20 жилийн хугацаанд шинэчлэлт завсарлагатай байсан үед үр дүн тааруу байсан талаар дурдсан). Мөн тоглогчид тоглоомтой хэрхэн харилцаж буйг ойлгохын тулд өгөгдөлд суурилсан хандлагад хөрөнгө оруулахын зэрэгцээ тэдний саналыг сонсох ажлыг чухалчилж байна.
Тэрээр тоглоомын дүрд тоглох (roleplaying) тоглогчдын нийгэмлэгийг Blizzard илүү сайжруулах ёстой жишээ болгон дурдсан юм. Тэрбээр саяхан гарсан Netflix-ийн The Remarkable Life of Ibelin баримтат кино багийнханд урам зориг өгснийг онцолжээ. Энэхүү кино нь Duchenne булчингийн дистрофи өвчнөөр шаналж байсан ч Азеротын дүрд тоглох нийгэмлэгийн нэг хэсэг болж тайвшралыг олсон WoW тоглогч Матс Стин-ийн тухай өгүүлдэг. Киноны ихэнх хэсэг нь WoW-ийн тоглоомын дүрслэлээр хийгдсэн боловч кинонд гарч буй зарим үйлдэл (тэврэлт, гар барилт гэх мэт) одоогийн WoW-д боломжгүй байгаа. Тэрээр баг эдгээр төрлийн харилцан үйлдлийг ирээдүйд нэмэх боломжийг туршиж байгааг дурдсан.
Тоглоомын удирдагч Ион Хаззикостас WoW олон жилийн турш хэрхэн оршин тогтнож байгаа тухай өөрийн бодлоо хуваалцсан. Тэрээр тоглоом хэрхэн хөгжиж ирснийг factions буюу бүлгүүдээр тайлбарлажээ. Тоглоомын ихэнх хугацаанд Horde эсвэл Alliance бүлгийн нэгийг сонгох нь тоглогчийн туршлагыг бүхэлд нь тодорхойлж байсан—тоглогч хэнтэй тоглох, хаана даалгавар биелүүлэх, ямар түүхийг мэдрэх зэрэгт нөлөөлдөг байв. Харин 2024 онд энэ хязгаарлалт ихээхэн багассан. Хаззикостас орчин үеийн тоглоомд Horde болон Alliance тоглогчид тодорхой үйл ажиллагаанд хамтран оролцож чадаж байгааг дурдан, өмнө нь энэ нь “төсөөлөхийн аргагүй” зүйл байсан гэдгийг онцлов.
Хэрэв та хөгжүүлэлтийн багийнхнаас өмнө нь асуусан бол тэд ‘Үгүй, хэзээ ч болохгүй. Хэрэв тийм зүйл болбол энэ Warcraft байхгүй болно’ гэж хэлэх байсан байх,” хэмээн Хаззикостас хэлжээ. “Өнөөдөр Alliance болон Horde тоглогчид олон тохиолдолд хамтран тоглож байна, гэхдээ энэ нь одоо ч Warcraft хэвээр байгаа.
Тэрээр Азеротод бий болсон нийгэмлэг—найз нөхөрлөл, гэр бүл, холбоо харилцаа—WoW-ийг амжилттай оршин тогтнох гол шалтгаан гэж үзсэн. Энэхүү нийгэмлэг л тоглоомыг урагш ахиулж, Blizzard-ийг тоглогчдын өөрчлөгдөж буй хэрэгцээнд нийцэхэд түлхэц өгдөг гэж тэрээр хэллээ.
“Бид 20 жилийн ойгоо тэмдэглэж, 10 өргөтгөл гаргаж, тоглоомоо хөгжүүлж, бие даан орших, өөр өөр уур амьсгал, хэмнэлтэй, өөр өөр үзэгчдэд зориулсан хэд хэдэн Classic хувилбар гаргах хүртэл өөрчилж чадсан нь WoW тоглоом тоглогчидтойгоо хамт хэрхэн хувьсан өөрчлөгдөж, насанд хүрснийг харуулж байна гэж би бодож байна” хэмээн Хаззикостас хэлжээ. “2004 оны 11-р сарын 23-нд World of Warcraft-ийг гаргасан мөч үнэхээр ид шидийн байлаа. Тэр үед сая сая хүн энэ ертөнцийг нээж, бусадтай холбогдох боломжийг мэдэрсэн. Гэвч хэрэв бид тоглогчидтойгоо хамт хөгжиж чадаагүй бол өнөөдөр 20 жилийн ойн дээрээ байхгүй байх байсан.”
Хоёр арван жилийн дараа Лонгдейл WoW-г нийгэмлэгийнхээ зүгээс өөрчлөх цаг болсныг дурджээ. Blizzard тоглогчдоо ойлгох, тэдний хүсэл сонирхлыг сонсоход илүү анхаарах болсон байна. Лонгдейл өөрийн үүргийнхээ хүрээнд ирэх 10, 15, бүр 20 жилийн төлөвлөгөөг аль хэдийн бодож эхэлсэн бөгөөд тоглоомоо ирээдүйд хүргэхийн тулд ямар суурь ажлуудыг одооноос эхлэн хийх шаардлагатайг анхаарч байгаа гэлээ. WoW 20 жил тоглогчдод танигдсан ч энэ нь удааширна гэсэн үг биш бөгөөд MMORPG жанрын тэргүүлэгчийн байр сууриа алдах бодол ч алга.
“Бид илүү сайжрахыг хүсэж байна… бидний зорилго бол өсөн дэвжих явдал” гэж Лонгдейл хэлжээ. “Дэлхийн бүх хүмүүсийг ямар нэгэн цагт Азеротод байлгахыг хүсэж байна.
