Сансрын “зомби” хиймэл дагуул гайхалтай радио дохио илгээжээ
Жилийн өмнө, Австралийн эрдэмтэд сансраас ирсэн хүчтэй цахилгаан соронзон цацрагийг илрүүлсэн. Энэ импульс бусад бүх дохиог дарж, гарал үүсэл нь тодорхойгүй байв. Датагаа судалсны дараа, багийнхан энэ дохионы эх үүсвэр нь алс холын одон орны биет биш, харин дэлхийг ямар ч зориулалтгүйгээр тойрч буй “зомби” хиймэл дагуул болохыг илрүүлжээ.
NASA-ийн Relay-2 хиймэл дагуул 1964 оны 1-р сарын 21-нд хөөргөсөн ба үүнээс хоёр жилийн өмнө түүний өмнөх Relay-1 хиймэл дагуул ч мөн тойрог замд ороод байсан билээ. Эдгээр нь Ван Аллены радиацын бүсийг зураглах туршилтын харилцаа холбооны хиймэл дагуулууд байлаа. Relay-2 1967 оны 6-р сарын 9-н хүртэл ажиллаж байсан ч хоёр дамжуулагч нь ажиллахаа больсноос хойш дохио илгээж чадаагүй юм. Харин бараг 60 жилийн дараа богино хугацааны дохио илгээжээ.
2024 оны 6-р сарын 13-нд Австралийн Square Kilometer Array Pathfinder одон орны судалгааны төвд маш богино буюу 30 наносекунд үргэлжилсэн хурдан радио тэсрэлт (FRB) илрүүлсэн. Куртин их сургуулийн судлаач Клэнси Жэймс энэ тухай New Scientist-д ярилцлага өгөхдөө, “Бид шинэ пульсар эсвэл өөр одон орны биетийг илрүүлсэн гэж догдолж байсан” гэжээ. Энэ нь тэнгэрт бусад бүх зүйлийг хэдхэн хоромд дарахуйц хүчтэй радио тэсрэлт байсан гэв.
Эхэндээ эрдэмтэд уг дохио сансар огторгуйгаас ирсэн гэж таамагласан ч дараа нь урьд нь ажиллагаагүй болсон Relay-2 хиймэл дагуулаас ирсэн болохыг arXiv дээрх судалгааны ажлаас олж мэджээ. Хурдан радио тэсрэлтүүд нь сансар огторгуйгаас ирдэг богино хугацааны хүчтэй радио долгионууд бөгөөд хэдхэн миллисекунд үргэлжилдэг. NASA-ийн мэдээлснээр, эдгээр тэсрэлтүүд нь тэр богино хугацаанд бүхэл бүтэн галактикийг давж гарахуйц хэмжээний энерги ялгаруулж чаддаг. 2024 оны 6-р сард илэрсэн FRB нь маш хүчтэй байсан бөгөөд NASA-ийн хиймэл дагуул яг тэр үед дээгүүр нь нисэж байжээ. Мөн энэ дохио маш тод, сайн тодорхойлогдсон байсан байна.
Relay-2 гэнэт энэ дохиог яагаад илгээсэн нь одоогоор тодорхойгүй байна. Судлаачид хиймэл дагуул олон жилийн турш цахилгаан хуримтлуулж, нэгэн зэрэг хүчтэй тэсрэлтээр гаргасан байж магадгүй гэж үзэж байна. Өөр нэг боломжит таамаглал нь Relay-2-д микрометеорит эсвэл тойрог зам дахь бусад биет мөргөснөөс болж плазмын жижиг үүл үүссэн байж болох юм.
Сансар огторгуйд олон тооны ажиллагаагүй хиймэл дагуулууд явж байгаа бөгөөд эдгээр нь төрөл бүрийн ер бусын дохио гаргаж байгаа тул эрдэмтэд сансрын дохио болон ажиллагаагүй төхөөрөмжийн хооронд ялгаа гаргахад улам хэцүү болно.
Эх сурвалж:
NASA Satellite That’s Been Dead for 57 Years Sends Mysterious Signal to Earth
Relay-2 emitted a powerful fast radio burst that lasted for less than 30 nanoseconds.
