Хиймэл оюун ухааны хэдэн зуун судлаачдын оролцсон хэлэлцүүлгийн дүгнэлтээр, AGI-ийг хөгжүүлэх өнөөгийн арга барил нь зөв зам биш гэж үзсэн байна.
Энэхүү дүгнэлт нь 2025 оны Хиймэл оюун ухааны судалгааны ирээдүйн талаархи AAAI (Хиймэл Оюун Ухааны Дэвшлийн Холбоо)-ийн Ерөнхийлөгчийн хэлэлцүүлгийн үеэр ил боллоо. Тайланг AI-ийн дэд бүтцээс эхлээд хиймэл оюун ухааны нийгмийн үр нөлөө хүртэлх чиглэлээр мэргэшсэн 24 судлаач бэлтгэсэн байна.
Тайланд тус бүрийн хэсэгт гол санааг тодотгон харуулсан бөгөөд судалгаанд оролцогчдоос тухайн сэдвийн талаар өөрсдийн бодлыг илэрхийлэх боломж олгожээ.
MIT-ийн компьютерийн ухааны эрдэмтэн Родни Бруксийн ахалсан “AI-ийн хүлээлт ба бодит байдал” хэсэгт технологийн хөгжлийн хөөсрөлтийн таван үе шатыг тодорхойлдог Гартнерийн Хөөсрөлтийн Мөчлөгийг дурдсан байна. 2024 оны 11-р сард Гартнер “Үүсгэгч AI-ийн хөөсрөлт оргил цэгээ давж, уруудаж эхэлсэн” хэмээн таамаглажээ.
Судалгаанд оролцсон хүмүүсийн 79% нь олон нийтийн AI-тай холбоотой хүлээлт бодит хөгжлөөс зөрүүтэй гэж үзсэн бол 90% нь энэ зөрүү нь AI судалгаанд саад болж байна гэж хариулжээ. Үүнээс 74% нь “AI судалгааны чиглэл хөөсрөлтөөс хамаарч байна” гэжээ.
“Гартнерийн Хөөсрөлтийн Мөчлөгийг оруулсан нь олон салбарт ажиглагддаг хандлагыг харуулдаг. Тиймээс одоогийн AI-ийн хэт хүлээлтэд болгоомжтой хандах нь зүйтэй” хэмээн Брукс Gizmodo-д илгээсэн и-мэйлдээ дурджээ.
AGI гэдэг нь хүний түвшний оюун ухаан, өөрөөр хэлбэл, мэдээллийг хүн шиг ойлгон, суралцах чадвартай машиныг хэлдэг. Энэ бол хиймэл оюун ухааны салбарт хамгийн чухал зорилтуудын нэг бөгөөд автоматжуулалт, үр ашгийн хувьд олон салбарт хувьсгал авчрах боломжтой.
Гэсэн хэдий ч 475 оролцогчдын 76% нь одоогийн AI хөгжүүлэлтийг масштабжуулах нь AGI бий болгоход хангалтгүй гэж үзжээ.
“Ерөнхийдөө, судалгаанд оролцогчид аюулгүй байдал, ёс зүй, тэгш хүртээмжийг чухалчилж, хариуцлагатай хөгжүүлэлтийг дэмжих хандлагатай байна” гэж тайланд дурдсан байна.
Хэдийгээр AI-ийн хөгжилд хөөсрөлт нөлөөлж, AGI-д хүрэх зөв замаар явж чадахгүй байгаа ч энэ технологи сүүлийн жилүүдэд хурдацтай хөгжиж байна.
“Тавхан жилийн өмнө ийм яриа өрнүүлэх боломжгүй байсан. AI зөвхөн алдаа ихтэй байж болох салбаруудад, жишээлбэл, бүтээгдэхүүн санал болгох эсвэл тодорхой хүрээнд ажиллах чадвартай байсан. Гэтэл одоо ChatGPT зэрэг чатботуудын ачаар AI нийтэд танигдсан” гэж Виржиниагийн Их Сургуулийн компьютерийн ухааны профессор, тайлангийн “Бодит байдал ба Найдвартай байдал” хэсгийн ахлагч Хенри Каутц тайлбарлажээ.
Тайланд дурдсанаар, AI-ийн бодит мэдээллийг боловсруулах чадвар “одоо ч бүрэн шийдэгдээгүй” бөгөөд 2024 оны нэгэн шалгалтад хамгийн шилдэг хэлний загварууд зөвхөн 50%-ийн зөв хариулт өгчээ. Гэхдээ шинэ сургалтын арга барилууд эдгээр загваруудын найдвартай байдлыг нэмэгдүүлэх боломжтой.
“Миний бодлоор, AI-ийн итгэлцлийг нэмэгдүүлэх дараагийн шат бол нэгэн бие даасан AI систем биш, харин бие биенээ шалгаж, үнэн зөв байдлыг хангасан AI агентуудын хамтран ажиллах систем байх болно” гэж Каутц хэлсэн байна.
AI нь хаашаа ч алга болохгүй. Гартнерийн Хөөсрөлтийн Мөчлөг “мартагдах” гэсэн шатлалтай бус, харин “үр бүтээмжийн тавцанд хүрэх” гэсэн төгсгөлтэй. AI-ийн хэрэглээний талбар бүр өөр өөр хөөсрөлттэй байгаа ч энэ технологийн эргэн тойрон дахь хэлэлцүүлэг—төр, хувийн хэвшил, тэр ч байтугай гэр бүлийн хүрээнд ч—маш өргөн цар хүрээтэй хэвээр байна.
Тиймээс AI судлаачид өөрсдийн салбарын ирээдүйг маш нухацтайгаар авч үзэж байгаа нь сайшаалтай. AI системүүдийг хэрхэн бүтээж, хэрхэн ашиглаж байгаа нь хөгжлийн шинэ боломжийг бий болгож байна. Бид AI-гүй цаг үе рүү буцахгүй учраас цорын ганц зам бол урагшлах юм.
gizmodo.com
