Esports Integrity Commission (ESIC) буюу Цахим спортын шударга байдлыг хянах хорооноос ATOX багийн тоглогч Ган-Эрдэнэ “dobu” Батболд, Бат-Энх “kabal” Батбаяр, Тэмүүлэн “MiQ” Бямбадалай, Отгонлхагва “AccuracyTG” Батжаргал, Мөнхсайхан “Zesta” Эрдэнэбаатар, мөн ахлах дасгалжуулагч Төгөлдөр “FlyNN” Гансүх болон шинжээч Ана-Эрдэнэ “nuka” Баасантохт нарын долоон хүнд шударга ёсны эсрэг үйлдэл гаргасан үндэслэлээр 8 сараас насан туршийн хүртэлх хугацаатай хориг тавьжээ.
Тэднээс dobu, kabal болон nuka нар хамгийн хүнд зөрчил гаргасан гэж дүгнэгдсэн бөгөөд 2024 оны сүүлээс 2025 оны гуравдугаар сар хүртэл нийт 70 гаруй сэжигтэй мөрийтэй холбоотой хэрэгт оролцож, Хятадын зохион байгуулалттай гэмт бүлэглэлүүдтэй холбогдсон тул насан туршид нь тэмцээнд оролцохыг хориглосон байна.
ESIC энэ хэргийн талаар анх удаа албан ёсоор мэдэгдэл хийсэн нь энэ юм. Үүнээс өмнө BLAST, PGL, ESL зэрэг тэмцээний зохион байгуулагчид гуравдугаар сард ATOX багийг түр хугацаагаар тэмцээнд оролцох эрхийг нь түдгэлзүүлж байсныг зарласан ч тодорхой мэдээлэл өгөлгүй байсан.
ATOX баг BLAST Open Lisbon болон MESA Asian Masters тэмцээнд оролцохоор байсан ч түдгэлзүүлэлт хүчин төгөлдөр болсны дараа BLAST Rising Asia тэмцээний хоёрдугаар байрт орсон The Huns баг тэдний оронд BLAST Open-д, харин Eruption баг MESA-д нөхөн дуудагдсан юм.
ESIC-ын пүрэв гарагт нийтэлсэн дэлгэрэнгүй тайланд тэмдэглэснээр, тус байгууллага 2024 оны есдүгээр сарын 12-нд ESL Pro League 20 тэмцээний ATOX болон Falcons багуудын тоглолттой холбоотой тоглолт тохиролцсон гэх мэдээллийг хүлээн авсны дараа мөрдөн шалгалт эхлүүлжээ. Тухайн тоглолтод Данийн Falcons баг 2-0 харьцаагаар ялсан бөгөөд ATOX баг тэмцээний Сүүлчийн боломж шат руу шилжиж, эцэст нь 21-28-р байрт орсон юм.
Урьдчилсан шалгалтаар бооцооны баримтууд болон IP хаяг, бүртгэлтэй холбоотой статистик мэдээлэлд тулгуурлан dobu, kabal, MiQ, FlyNN нарыг буруутган мэдэгдэл илгээсэн байна. Гэвч шалгалтын явцад ATOX багийн зүгээс гаргасан тоглолт тохиролцох үйлдэл нь илүү өргөн хүрээтэй байсан нь тогтоогджээ.
Нэмэлт баримтууд болох чат бичлэг, гэрчийн мэдүүлэг, утасны болон дуу хоолойн бичлэгүүдэд үндэслэн дараах зүйлсийг илрүүлсэн байна:
- Анх мэдээлэгдсэн тоглолтоос гадна удаан үргэлжилсэн тоглолт тохиролцсон түүх байсан;
- Энэ нь зөвхөн шалгагдаж буй хүмүүсээр хязгаарлагдахгүй, багийн төвшинд явагдсан;
- Үйл ажиллагаа нь Хятадын зохион байгуулалттай гэмт бүлэглэлүүдтэй холбогдсон байсан.
Үүний дараа AccuracyTG, Zesta, nuka нарт ч мөн мэдэгдэл илгээжээ.
Мөрдөн шалгалтын явцад ESIC “урт хугацаанд, зохион байгуулалттай явагдсан мөрийтэй тоглоомын схем” илрүүлсэн бөгөөд 2024 оны сүүлээс 2025 оны гуравдугаар сар хүртэл 70 гаруй бооцоо нь авлигын шинжтэй байсан гэж дүгнэжээ.
Шалгалтаар nuka ихэнх бооцоог өөрөө тавьсан эсвэл бусдаар тавиулсан болох нь тогтоогдсон бөгөөд чат бичлэгт “тоглолтын үйл явцыг бооцооны байрлалтай тааруулахын тулд санаатайгаар буруу тактик зааж өгсөн” нь тэмдэглэгдсэн байжээ.
“Мөрийтэй тоглолтод ашиглагдсан дансууд нь ATOX багийн гишүүд, тэдний ойрын хүрээллийн хүмүүсийн төхөөрөмж, IP хаяг, төлбөрийн хэрэгсэл болон сошиал бүртгэлтэй давхцаж байв” хэмээн ESIC мэдэгдсэн.
Түүнчлэн эдгээр дансууд нь өмнө нь хууль сахиулах байгууллагаас Хятадын зохион байгуулалттай гэмт хэргийн бүлэглэлүүдийн урд талд ашиглагддаг гэж тогтоогдсон бүртгэлүүдтэй холбоотой байсан нь ATOX багийн мөрийтэй тоглоомын ажиллагаа илүү гүнзгий гэмт хэргийн сүлжээнд хамаарч байсныг илтгэж байна.
Харин AccuracyTG болон Zesta нар ESL Pro League 20 тэмцээнд оролцоогүй бөгөөд баг 2024 оны арваннэгдүгээр сард Ази тивийн RMR шалгаруулалтад тэнцээгүй тул бүрэлдэхүүндээ хоёр өөрчлөлт хийж байхад багт элссэн байна.
ESIC-ийн мэдээлснээр, AccuracyTG болон Zesta нарын цорын ганц зөрчил нь шударга ёсны зөрчлийг илрүүлсэн даруйдаа ESIC-д мэдэгдээгүй явдал байсан бөгөөд энэ нь тэдэнд хамгийн бага шийтгэл буюу 8 сарын хориг оноох шалтгаан болсон байна.
Харин Yalalt “yAmi” Оюунбилэг болон Төвшинтөгс “Annihilation” Нямдорж нар ESL Pro League 20 тэмцээнд оролцсон ч энэ хэрэгт ямар ч шийтгэл хүлээгээгүй цорын ганц хоёр гишүүн болж байна. Гэсэн ч ESIC тэднийг Хятадын ахмад тоглогч Пэн “xiaosaGe” Сонгийн хамт тусдаа, одоогоор үргэлжилж буй мөрдөн шалгалтад хамруулсан гэдгийг онцолсон. XiaosaGe нь өмнө нь dobu, kabal нарын хамт 5POWER болон Steel Helmet багуудад тоглож байсан юм.
“2025 оны гуравдугаар сарын 5-нд түр хугацааны түдгэлзүүлэлт оноох үед эдгээр оролцогчдод хамаарах нотлох баримт хангалтгүй байсан тул түдгэлзүүлэлтийн босгыг давсангүй” гэж ESIC тайлбарласан байна.
“Харин дараагийн мөрдөн шалгалтаар нэмэлт мэдээлэл цуглуулсан бөгөөд одоогоор үнэлгээ, дүгнэлт хийгдэж байна” гэжээ.
ESIC-ээс ATOX багийн долоон гишүүнд оноосон шийтгэл
Доорх жагсаалтад шийтгэл хүлээсэн долоон хүний нэр болон холбогдох зөрчлийн дэлгэрэнгүй мэдээлэл:
Ган-Эрдэнэ “dobu” Батболд – Насан туршийн хориг
- Тоглолт тохиролцох ажиллагааг удирдан зохион байгуулсан, өөрийн багийн эсрэг бооцоо тавих, авлига зохион байгуулахад оролцсон;
- Багийн гишүүдийг шахалт үзүүлж эсвэл хуурч, тоглолтын үр дүнг зориуд өөрчлөхөд хамтруулахыг оролдсон;
- Бусад гишүүдийг мөнгөөр урамшуулж, тэднийг дуугүй байлгах, авлигад хамруулахыг оролдсон;
- ESIC-тэй хийсэн ярилцлагын үеэр тоглолт тохиролцох үйл ажиллагаанд оролцсон болон БНХАУ-д төвтэй зохион байгуулалттай гэмт бүлэглэлүүдтэй хамтран ажилласан гэдгээ хүлээн зөвшөөрсөн.
Бат-Энх “kabal” Батбаяр – Насан туршийн хориг
- “dobu”-гийн хамтаар тоглолтын үр дүнг зориудаар өөрчлөх, бооцоо тавих стратегид идэвхтэй оролцсон;
- Авлигын үйлдлийг мэдээлэлгүй орхисны төлөө мөнгөн урамшуулал авсан;
- Бусад тоглогчдод мөнгөн төлбөр хийж, тэдний дуугүй байдлыг хадгалах, хамтран ажиллуулахыг оролдсон.
Ана-Эрдэнэ “nuka” Баасантохт – Насан туршийн хориг
- Шинжээчийн үүрэг гүйцэтгэж байхдаа ATOX багийн тоглолттой холбоотой 70 гаруй сэжигтэй бооцоо тавьсан эсвэл тавиулсан;
- Тоглолтын явцад зориудаар худал, төөрөгдүүлсэн тактик өгч, бооцооны ашиг сонирхолд нийцсэн үр дүн гаргуулахыг зорьсон.
Төгөлдөр “FlyNN” Гансүх – 3 жилийн хориг
- ATOX багийн дасгалжуулагч бөгөөд албан бусаар гүйцэтгэх захирагч (CEO)-ийн үүрэг гүйцэтгэж байсан тул илүү өндөр хариуцлагатай байсан;
- Тоглолт тохиролцох зөрчлийг илрүүлэх, зогсоох үүргээ биелүүлээгүй нь зөрчлийг үргэлжлүүлэх боломж олгосон.
Тэмүүлэн “MiQ” Бямбадалай – 1 жилийн хориг
- Авлигын үйлдлийг мэдээлэхгүй, дуугүй байх нөхцөлтэй мөнгөн санал хүлээн авсан;
- ESIC-ийн шударга байдлын дүрмийг зөрчсөн тухайгаа хууль бусаар мэдээлэлгүй орхисон.
Отгонлхагва “AccuracyTG” Батжаргал – 8 сарын хориг
- ESIC-ийн шударга байдлын дүрмийг зөрчсөн тухай мэдээгүй мэт аашилж, тайлагнаагүй.
Мөнхсайхан “Zesta” Эрдэнэбаатар – 8 сарын хориг
- ESIC-ийн шударга байдлын дүрмийг зөрчсөн тухай мэдээлээгүй.
ESIC байгууллагаас мэдээлснээр, насан туршийн хориг авсан гурван оролцогч (dobu, kabal, nuka) бүгд буруугаа хүлээн зөвшөөрсөн байна. ATOX багийн хуульчдаас ирүүлсэн зарим мэдээлэл нь энэхүү мөрдөн шалгалтад ач холбогдолгүй гэж үзсэн ч тусдаа шалгалт эхлүүлэхэд ашигласан гэж тайлбарлажээ.
Тайлангийн төгсгөлд, ESIC энэхүү мөрдөн шалгалт хэдэн сарын турш үргэлжилсэн нь хэрэгт холбогдсон үйлдлүүдийн цар хүрээ, нарийн төвөгтэй байдалтай холбоотой болохыг тайлбарласан байна.
“2025 оны гуравдугаар сарын 5-нд шаардлагатай нотолгооны босгыг давсан даруйд ESIC хариуцлагатай, шийдэмгий арга хэмжээ авч, шалгагдаж буй бүх ATOX гишүүдийг тэмцээнд оролцохоос түдгэлзүүлсэн,” гэж мэдэгдэлд дурджээ.
“Гэвч цаашдын мөрдөн шалгалтаар илүү өргөн цар хүрээтэй, зохион байгуулалттай зөрчлүүд илэрсэн бөгөөд энэ нь одоо нийтэд танилцуулсан шийтгэлүүдийг дагуулсан юм. 2024 оны сүүлээс 2025 оны тавдугаар сар хүртэл үргэлжилсэн хугацаа нь энэхүү ATOX хэргийн нарийн, өргөн хүрээтэй шинж чанарыг илтгэж байна. Мөн хууль ёсны журмыг чанд мөрдөхийн чухлыг харуулж байна.”
ESIC Issues Public Report detailing outcome of investigation into ATOX Esports Participants resulting in seven sanctions and an ongoing investigation into three additional participants.
— ESIC (@ESIC_Official) May 15, 2025
Read the full report: https://t.co/Nvt5BAyCQn
Read the summary: https://t.co/agwHdnPYSj pic.twitter.com/8hopxxJnx1
hltv.org
