АНУ-ын Тэнгисийн цэргийн хүчинд харьяалагддаг F18 Super Hornet сөнөөгч онгоц (бас F/A-18 Super Hornet гэж нэрлэдэг) хачирхалтай ослын улмаас USS Harry S. Truman нисэх онгоц тээгчээс унаж, далайд алдагдлаа. АНУ-ын Тэнгисийн цэргийн хүчин уг ослыг баталж, осолд орсон онгоц нь Super Hornet-ийн F/A-18E хувилбар байсан болохыг мэдэгдсэн байна. CNN агентлагийн мэдээлснээр, тухайн үед алдагдсан F18 онгоц нисэх онгоц тээгчийн онгоц хадгалах хэсэгт байрлаж байсан бөгөөд чирэгдэж явж байсан аж.
Гэхдээ алдагдсан нь зөвхөн F18 онгоцоор хязгаарлагдсангүй. Мөн онгоцыг чирч байсан чирэгч техник ч далайд алдагдсан байна. Хохирогчийн талаарх мэдээлэл байхгүй бөгөөд Тэнгисийн цэргийн хүчин бүх багийн гишүүдийг тоолж, бүгд аюулгүй байгааг баталжээ. Гэсэн хэдий ч нэг усан цэрэг бага зэргийн гэмтэл авсан байна.
CNN-ийн мэдээлснээр уг хэрэг явдал Ойрхи Дорнодын ойролцоох Улаан тэнгист болсон бөгөөд Truman Carrier Strike Group хэдэн сарын турш энэ бүсэд байрлаж байгаа юм. Мөн тайланд дурдсанаар, Йемений Хути босогчид USS Harry S. Truman руу гал нээсэн үед хөлөг онгоц огцом эргэлт хийсэн нь осолд хүргэсэн байж магадгүй гэжээ. F18 онгоцыг алдсан хэдий ч уг нисэх онгоц тээгчийн цохилтын бүлэг үүргээ хэвийн үргэлжлүүлж байгаа гэж Тэнгисийн цэргийн хүчин мэдэгдсэн байна.
Хэдий хүний амь эрсдээгүй ч, энэ бол маш өндөр өртөгтэй осол гэдэг нь тодорхой. Урьдчилсан тооцоогоор нэг ширхэг F18 онгоцны өртөг $60 саяас давдаг байна. Үүн дээр чирэгч техник нэмэгдэхээр нийт хохирлын хэмжээ $60 саяас давна гэж үзэж байгаа юм.
F18 онгоц нисэх онгоц тээгчээс унасан анхны тохиолдол биш
Энэ удаагийн $60 саяын өртөгтэй F18 онгоцны 2025 оны осол анхны тохиолдол биш юм. 2022 оны долдугаар сард мөн адил USS Harry S. Truman хөлөг онгоцноос өөр нэгэн F18 онгоц “гэнэтийн” муу цаг агаарын улмаас далайд унасан тохиолдол гарч байжээ.
Тэр үед АНУ-ын Тэнгисийн цэргийн хүчин CURV-21 хэмээх алсаас удирддаг төхөөрөмж ашиглан алдагдсан онгоцыг далайгаас гарган авсан байна. Аврах ажиллагаа ослын дараа 27 хоногийн дараа амжилттай болж, онгоцыг АНУ дахь нисэх хүчний бааз руу тээвэрлэсэн байна.
Харин энэ удаагийн ослын хувьд Тэнгисийн цэргийн хүчин онгоцыг сэргээх төлөвлөгөөтэй эсэх нь тодорхойгүй байна. Учир нь Truman Carrier Strike Group дайсагнасан бүсийн ойролцоо байрлаж байгаа тул аврах ажиллагаа явуулах нь тун хүндхэн сорилт болж мэдэх юм. 2025 оны ослын онцлог нь F18 онгоц хадгалах хэсэгт байрлаж байхдаа унасан явдал бөгөөд өмнөх ижил төрлийн ослууд ихэвчлэн муу цаг агаар, хүчтэй давалгаа, эсвэл буух, хөөрөх үеийн алдаанаас болж гардаг байжээ.
slashgear.com
