Оскарын шагналд нэр дэвшигч зохиолч Майкл Манн 1995 оны Аль Пачино, Роберт Де Ниро нарын гол дүрд тоглосон гэмт хэргийн драмын үргэлжлэл болох “Heat 2” киноны шинэ мэдээллийг хуваалцжээ.
Одоогоор тус төсөлд албан ёсны жүжигчдийн бүрэлдэхүүн хараахан тодроогүй байгаа ч Оскарын шагналд нэр дэвшигчид болох Адам Драйвер болон Остин Батлер нар залуу Нейл МакКоли, Винсент Ханнагийн дүрд тоглох талаар яригдаж байсан. Батлерээс гадна Аль Пачино өмнө нь өөрийн дүрийг үргэлжлүүлэн бүтээх хамгийн тохиромжтой жүжигчин хэмээн Тимоти Шаламе-г санал болгож байжээ. Энэхүү кино нь 1989 болон 2002 онд өрнөх үйл явдлуудыг харуулсан, өмнөх ба үргэлжлэл гэсэн хоёр хэсэгтэй бүтээл байх аж.
Майкл Манн “Heat 2”-ын талаар юу хэлэв?
Саяхан өгсөн ярилцлагадаа Майкл Манн “Heat 2”-ын кино зохиолыг бараг дуусгасан гэж баталжээ. Энэ зохиол нь 2022 онд гарсан ижил нэрт түүний романаас сэдэвлэсэн байна. Гэсэн хэдий ч тэрээр Уорнер Брос. Пикчерс уг төслийг батлаагүй тул үргэлжлэх эсэх нь хараахан тодорхойгүй байгааг хүлээн зөвшөөрсөн юм.
“Би зохиол дээрээ ажиллаж байна. Өнөө өглөө 2:30 цагт гэнэт сэрчихсэн,” гэж Манн (Collider-т өгсөн ярилцлагадаа) хэлжээ. “Тиймээс би шөнө дунд кино зохиолоо бичиж байгаад 3 цагт Лос Анжелесийг машинаар тойрон давхисан. Үнэхээр гайхалтай, машин ч алга. Эцэст нь 24 цагийн турш нээлттэй байдаг Canter’s Delicatessen-д очсон.”
Тэрээр мөн нэмж хэлэхдээ: “Юу ч баталгаатай биш, учир нь тэнгэр нурж ч магадгүй. Гэхдээ “Heat 2” Уорнер Брос. студид байгаа. Би тэдэнд зориулж кино зохиол бичиж байна, тэгээд аль болох хурдан урагшилна гэж найдаж байна.”
Heat кинонд мөн Вал Килмер, Натали Портман, Диана Венора, Том Сайзмор, Хэнк Азариа, Эшли Жадд, Дэнни Трехо зэрэг жүжигчид тоглосон. 1995 онд бүтээгдсэн энэ кино нь Аль Пачино, Роберт Де Ниро нарын хамтран дэлгэцнээ анх удаа тоглосон бүтээл бөгөөд тэд өмнө нь 1974 оны алдарт “The Godfather Part II”-ын үргэлжлэлд тус тусдаа дүр бүтээсэн байдаг.
comingsoon.net
