Nintendo компани шинэ үеийн тоглоомын консол болох Switch 2-ын борлуулалт ирэх оны гуравдугаар сарын эцэс гэхэд 15 сая ширхэгт хүрнэ гэж таамаглаж байна. Энэхүү тооцооллыг АНУ-ын ерөнхийлөгч асан Дональд Трамп-ын хэрэгжүүлсэн тарифын түвшин хэвээр хадгалагдана гэж үзэн гаргажээ.
Switch 2 нь 2025 оны 6-р сарын 5-нд 450 ам.долларын үнээр худалдаанд гарна. Тус төсөөллийг пүрэв гарагт нийтэлсэн Nintendo-ийн сүүлийн санхүүгийн тайланд багтаасан байна.
Өмнө нь, 2024 оны 2-р сард Nintendo одоогийн Switch консолын борлуулалт нийт 11 сая ширхэг, тоглоомын борлуулалт 150 сая ширхэг байна гэж тооцоолж байсан. Харин тайлангаар, 2024 оны 4-р сараас 2025 оны 3-р сар хүртэлх хугацаанд Switch консолын 10.8 сая ширхэг, тоглоомын 155.4 сая ширхэг борлуулсан байна.
2025 оны 4-р сараас эхэлсэн 2026 оны санхүүгийн жилд Nintendo дараах борлуулалтыг хүлээж байгаа:
- Switch 2: 15 сая ширхэг консол, 45 сая ширхэг тоглоом
- Оригинал Switch: 4.5 сая ширхэг консол, 105 сая ширхэг тоглоом
Nintendo-ийн мэдээлснээр, 2017 оны 3-р сард анх танилцуулснаас хойш Switch консолын дэлхий даяарх нийт борлуулалт 150 саяд дөхөж байгаа ба 2025 оны 1-р сард Switch 2-ийн трейлер гарснаас хойш ч борлуулалт тогтвортой хэвээр байсан гэнэ. Мөн сүүлийн 12 сарын хугацаанд Nintendo Switch-ийг тоглосон нийт идэвхтэй хэрэглэгчийн тоо 128 сая хүрчээ.
2024 оны 2-р сард тус компани 2024 оны 4-р сараас 2025 оны 3-р сарын хооронд 1.190 их наяд иенийн орлого олно хэмээн тооцоолж байсан бөгөөд энэ нь өмнөх 11-р сард гаргасан 1.28 их наяд иенийн төсөөллөөс буурсан үзүүлэлт байв. Харин пүрэв гарагт зарласан тайлангаар Nintendo-ийн жилийн нийт орлого 1.164 их наяд иен байжээ.
Мөн компанийн цэвэр ашиг 278.8 тэрбум иенд хүрсэн нь анх таамаглаж байсан 270 тэрбум иенээс давсан дүн болсон байна.
variety.com
