2024 оны 12-р сарын 26-нд Netflix дээр гарсан “Squid Game” цувралын 2-р улирал үзэгчид болон шүүмжлэгчдийн зүгээс эерэг үнэлгээ авч, Rotten Tomatoes болон Metacritic платформ дээр өндөр оноо цуглуулжээ.
Шүүмжлэгчдийн үнэлгээ: “Squid Game” 2-р улирал өндөр магтаал хүртэв
“Squid Game” цувралын 2-р улирал шүүмжлэгчдийн зүгээс өндөр үнэлгээтэй байна. San Francisco Chronicle сонины Майкл Ордоня энэхүү Өмнөд Солонгосын триллер цувралыг “Ухаалаг,” “Провокатив,” “Сэтгэл хөдөлгөм” хэмээн тодорхойлжээ. Тэрээр цааш нь “Энэ улирал дүрүүдийг гүнзгийрүүлж, үйл явдлыг илүү өрнөлтэй болгож, эхний улирлын хар бараан, абсурд уур амьсгалыг хадгалсан” хэмээн тэмдэглэсэн байна.
The Wrap-ийн Уильям Гудман Ли Бён Хоны “Front Man” дүрийн тоглолтыг онцгой магтаал хүртэхүйц хэмээн онцолжээ. Тэрээр 2-р улирлыг “Илүү харгис, айдас төрүүлэм, үр дүнтэй, мөн гайхалтай зугаатай” гэж дүгнэжээ.
Харин IndieWire-ийн Бен Трэверсын үнэлгээ арай даруухан байлаа. Тэрээр 1-р улирал бол нээлт байсныг дурдсан бол “2-р улирал илүү нууцлаг зүйл бага ч үзэгчдийн хүлээлт дээр тулгуурлаж, хааяа гэнэтийн эргэлттэй үйл явдлаар гайхшруулдаг ч голдуу үзэгчдийн хүссэн зүйлд нийцэж байна” гэж тэмдэглэжээ.
The Guardian-ийн Ребекка Николсон 2-р улирлыг заримдаа жигд бус гэж дүгнэсэн бөгөөд ялангуяа “Жинхэнэ үйл явдлууд” эхлэхээс өмнө сул талаа харуулдаг гэжээ. Гэсэн хэдий ч тэрээр “Үнэхээр гайхалтай эргэлттэй” болохыг онцолж, “Гэхдээ энэ нь эхний улирлын үйл явдлуудаас хангалттай ялгарч байгаа эсэх нь эргэлзээтэй” хэмээн үргэлжлүүлжээ.
The Independent-ийн Аннабел Нюжент эхний улирлын адил “Гайхшруулсан” биш гэдгийг хүлээн зөвшөөрсөн ч “Тэгэх л учиртай биш гэж үү?” хэмээн асуулт тавьжээ. Нюжент 2-р улирлыг “Эхний улирлын хязгаараас давж чадсан” гэж магтсан байна.
“Squid Game” 2-р улирал Rotten Tomatoes сайт дээр 42 шүүмжийн дараа 86%-ийн батламжтай үнэлгээ авсан байна. Харин Metacritic платформ дээр 23 мэргэжлийн шүүмжийн дараа 100-аас 61 оноо авч, “Ерөнхийдөө эерэг” хэмээн дүгнэгджээ.
Эхний улирал гарсны дараа “Squid Game” Netflix-ийн хамгийн их үзсэн цувралуудын нэг болсон билээ. Харин 2-р улирал уг амжилтыг давтаж чадах эсэх нь хараахан тодорхойгүй байгаа ч шүүмжлэгчдийн өгч буй эерэг хандлагаас харахад өндөр амжилт үзүүлэх боломжтой гэж үзэж байна.
comingsoon.net
