Tesla Cybertruck: Хүлээлтэд хүрсэнгүй

Анхны Кибертрак хэрэглэгчдэд хүргэгдэхээс хэдэн сарын өмнө Тесла компанийн гүйцэтгэх захирал Илон Маск хөрөнгө оруулагчидтай хийсэн ярилцлагын үеэр энэ маргаантай тээврийн хэрэгслийн талаар хүлээлтээ бууруулахыг зөвлөжээ.

“Энэ бол гайхалтай бүтээгдэхүүн. Гэхдээ санхүүгийн хувьд эерэг үр дүн үзүүлэхэд нэг жилээс 18 сар хүртэл хугацаа шаардагдана гэж би бодож байна” гэж Маск 2023 оны аравдугаар сард болсон хурлын үеэр хэлсэн юм. Гэхдээ Маск өөрийн шоу маягийн хэв маягийг хадгалж, хэтрүүлсэн магтаал нэмэхээ зогсоосонгүй.

“Эрэлт маш өндөр байна,” гэж тэр хэлэв. “Бидэнд 1 сая гаруй хүн захиалга өгсөн.”

Гэвч түүнээс хойш нэг жил гаруй өнгөрөхөд уг эрэлт буурсан бололтой.

Өчигдөр Тесла компани 2024 оны дөрөвдүгээр улирлын үйлдвэрлэл, нийлүүлэлтийн тайлангаа танилцуулж, Кибертракийн борлуулалтын анхны бүтэн жилийн бараг л бүрэн дүр зургийг харуулав. Тесла Кибертракийн тоог тусгайлан заадаггүй бөгөөд “бусад загварууд” гэсэн ангилалд Model S болон Model X-ийн хамт багтаадаг.

Тесла 2024 онд энэ ангилалд нийт 94,105 тээврийн хэрэгсэл үйлдвэрлэснээс 85,133-ыг нь хэрэглэгчдэд нийлүүлжээ. CarGurus-ийн эдийн засаг, зах зээлийн мэдээллийн захирал Кевин Робертсийн тооцоолсноор, эдгээр “бусад загварууд”-ын дунд 35,000–50,000 нь Кибертрак байжээ.

“Кибертракын талаар таны хандлага эхэндээ ямар байсан бэ гэдгээс бүх зүйл шалтгаална” гэж Робертс онцолжээ. “Хэрэв та үүнийг Ford F-150 шиг томоохон хэмжээний өрсөлдөгч болно гэж бодож байсан бол үгүй л боллоо. Гэхдээ амьдралын хэв маягт зориулсан пикап эсвэл Ford F-150 Lightning-тэй харьцуулахад сайн борлуулалттай байна гэж үзэж болох юм.”

Гэсэн хэдий ч Кибертрак 2024 онд Теслагийн өсөлтөд бодитой хувь нэмэр оруулсангүй. Компани сүүлийн 10 гаруй жилийн хугацаанд анх удаа жилийн борлуулалтын бууралттайгаа хүлээн зөвшөөрчээ.

Маск 1 сая гаруй хүн Кибертрак захиалсан гэж мэдэгдсэн ч энэ нь 1 сая Кибертракийг замд гаргасан гэсэн үг биш бололтой. Хэдийгээр одоо бол эхний үе шат боловч энэ загвар амжилттай борлуулалттай болно гэж үзэхэд эрт байна. Түүнчлэн Тесла захиалгын барьцааг эхлээд $1,000 байсан бол $100 болгон бууруулсан нь захиалагчдын тоог нэмэгдүүлсэн ч ихэнх нь худалдан авалт хийх сонирхолгүй байжээ.

Мөн эхний үе шат асуудалтай эхэлсэн: Цас, элснээс гарч чадахгүй байгаа Кибертракийн видео бичлэгүүд интернэтээр цацагдаж, долоон удаа буцаалт хийсэн (үүний нэг нь акселераторын педальтай холбоотой); Маскын улс төрийн хандлага олон нийтэд ил болсон гэх мэт.

Хэдийгээр тийм байсан ч Кибертрак анхны саруудад хүчтэй гарч ирсэн. Энэ нь 2024 оны хоёрдугаар улиралд АНУ-ын хамгийн их борлуулалттай цахилгаан пикап, гуравдугаар улиралд АНУ-ын хамгийн их борлуулалттай цахилгаан машин, мөн жилийн эхний хагаст $100,000-аас дээш үнэтэй хамгийн их борлуулалттай автомашин болжээ.

Гэвч зарим шинжээчдийн үзэж байгаагаар Тесла хуучин захиалгуудаа гүйцээж байсан тул эдгээр борлуулалтын тоо өсөлтийн эрэлтийн үр дүн биш байж магадгүй гэж үзжээ.

Он дуусахтай зэрэгцэн Кибертракын оргил үе өнгөрсөн байж болзошгүй гэсэн нотолгоо гарч ирсэн. Уг машиныг хэрэглэсэн автомашины худалдаанд их хэмжээгээр байршуулж буй талаар мэдээлэл гарчээ. Теслагийн Кибертракийн үйлдвэр ажилчдаа 12-р сард гурван өдрийн амралтад гаргажээ.

Нөгөөтэйгүүр, Foundation Series хязгаарлагдмал хувилбарын Кибертрак автомашиныг зарах боломжгүй болж, уг загварын логог арилгах хүртэл арга хэмжээ авч эхэлсэн тухай мэдээлжээ. Хэрэглэсэн Кибертракийн дундаж үнэ ч буурсаар байна: 12-р сарын 30-ны байдлаар $104,300 болж, өмнөх сард байсан $107,800-тай харьцуулахад багассан байна.

“Хэрэглэсэн Кибертракийн дундаж үнэ буурч, автомашин зогсоол дээр урт хугацаагаар үлдэж буй нь анзаарагдаж байна” гэж Робертс хэлжээ.

Шинэ Кибертрак нь одоог хүртэл үнэтэй хэвээр байна: Түрээсийн төлбөр сард $900 орчим бөгөөд бүх дугуй хөтлөгчтэй үндсэн загварыг худалдан авахад дор хаяж $90,000 шаардагдана.

Кибертракын ирээдүй бүрхэг хэвээр байна

Кибертрак саяхан холбооны $7,500-ын EV татварын хөнгөлөлтөд хамрагдахаар болсон ч энэ хөнгөлөлт удаан үргэлжлэхгүй бололтой. Учир нь Трамп уг хөнгөлөлтийг цуцална гэсэн хүлээлттэй байгаа бөгөөд Маск үүнийг дэмжиж буй. Маск 2023 онд хэлсэн “Кибертрак 18 сарын дотор компанийн санхүүгийн урсгалд чухал хувь нэмэр оруулна” гэсэн амлалтаа биелүүлэхэд хэдхэн сар үлдээд байгаа ч нөхцөл байдал тийм ч өөдрөг харагдахгүй байна.

Тесла Model Y загварын асар амжилтыг үргэлжлүүлж, илүү хямд өртөгтэй цахилгаан машиныг танилцуулж болох байсан. Шинжээчид болон хөрөнгө оруулагчид ч үүнээс ийм зүйл хүлээж байв. Гэвч үүний оронд Маск олон нийтийн дунд маргаан дагуулсан, чанарын асуудалтай, амьдралын хэв маягийн онцлог багатай тээврийн хэрэгслийг зах зээлд гаргасан нь өмнөх загварууд шиг их борлуулагдахгүй байх магадлалтай.

Тесла их хэмжээгээр борлуулагддаг загваруудыг үйлдвэрлэх туршлагатай, жишээлбэл, Model Y нь АНУ-д хамгийн их борлуулагддаг таван машины нэг” гэж Робертс хэлжээ. “Тэд томоохон хэмжээний борлуулалт хийх боломжтой. Харин Кибертрак үүнийг хийж чадаагүй. Түүнчлэн 2025 онд Кибертракын борлуулалтад нөлөөлж болзошгүй хэд хэдэн саад тулгарч, их хэмжээний борлуулалт хийхэд бэрхшээлтэй байж магадгүй.

theverge.com