Канад реппер Дрэйкийн шүүмжлэл дагуулсан нэхэмжлэлтэй холбогдуулан Universal Music Group (UMG) шинэчилсэн гомдлыг нь хэрэгсэхгүй болгох хүсэлтээ шүүхэд хүргүүллээ. Энэ нь түүний Кендрик Ламарын “Not Like Us” дууны хүрээнд нэр төрд нь халдсан гэх асуудлаар өрнөж буй хуулийн маргааны сүүлийн үеийн хөгжил юм.
Дрэйк анх нэгдүгээр сард UMG-г уг дууг зориудаар сурталчилж, түүнийг гутаасан хэмээн шүүхэд өгсөн бол UMG гуравдугаар сард гомдлыг хүчингүй болгох хүсэлт гаргаж байв. Гэсэн ч Дрэйкийн өмгөөлөгчид дөрөвдүгээр сард шинэчилсэн нэхэмжлэл гаргаж, Супербоул болон Грэммигийн тайзан дээрх тоглолтуудаар дамжуулан уг дууг UMG санаатайгаар дэмжсэн гэж үзсэн байна.
UMG-ийн өмгөөлөгчид Лхагва гарагт шүүхэд дахин хандаж, “шинэ мэдэгдлүүд нь өмнөхөөс ч илүү үндэслэлгүй, гайхмаар” гэж мэдэгджээ. Тэдний үзэж байгаагаар, Супербоулын тоглолтод Дрэйк болон түүний хамтрагчдыг “бэлгийн гэмт хэрэгтэн” хэмээн шууд нэрлэсэн үг байгаагүй нь Дрэйкийн нэхэмжлэлийн үндсэн хэсгийг няцааж буй хэрэг юм.
Түүнчлэн UMG мэдэгдэлдээ, “Дрэйк өөрөө ч урлагийн өрсөлдөөн, хип хоп тулаанд бусад уран бүтээлчдийг өдөөн хатгасан дуу гаргаж байсан. Гэсэн ч одоо өөрөө ижил нөхцөлд гүтгүүлсэн гэж үзэж байна” хэмээн шүүмжилжээ. Мөн тэд Дрэйкийг нотолгоо болгон танигдаагүй хэрэглэгчийн онлайн сэтгэгдэл, устсан пост зэргийг ашигласан нь хуулийн шаардлагыг хангахгүй гэж үзсэн байна.
UMG хэвлэлд өгсөн мэдэгдэлдээ “Бид уран бүтээлчидтэйгээ хамтран дэлхийн тавцанд гаргахын төлөө тууштай ажилладаг. Дрэйктэй хийж буй амжилттай хамтын ажиллагаа маань үүний нэг жишээ. Бид бүх уран бүтээлчдийнхээ уран сайхны илэрхийллийн эрх чөлөөг хамгаалсаар байх болно” гэж онцолсон байна.
Хэдийгээр шүүхийн зүгээс UMG-ийн хүсэлтийг хэлэлцэж байгаа ч мөрдөн шалгах ажиллагаа үргэлжилж байгаа бөгөөд Дрэйк Кендрик Ламар болон UMG-ийн хооронд байгуулсан гэрээнүүдэд хандах эрхтэй болсон юм.
variety.com
