Valve компани Linux дээр суурилсан SteamOS үйлдлийн системээ зөвхөн Steam Deck-д бус, бусад гар утасны компьютеруудад өргөжүүлэхээр төлөвлөж байгааг бид хэдийн мэддэг болсон. Тухайлбал, Asus ROG Ally-ийн зарим хувилбаруудад SteamOS-ийг туршин ашиглаж эхэлсэн бөгөөд энэхүү шинэ алхмын хүрээнд Valve саяхан Steam платформдоо чухал шинэчлэлт орууллаа.
Хамгийн том өөрчлөлт бол тоглоомын хуудсанд нэмэгдэх “SteamOS Compatible” буюу “SteamOS-той нийцтэй” гэсэн шинэ шошго юм. Энэ нь тухайн тоглоом болон түүний ашигладаг программ хангамж (жишээ нь тоглоом нээгч, хууран мэхлэлтээс хамгаалах систем зэрэг) нь SteamOS дээр бүрэн ажиллах эсэхийг илтгэнэ. Хэрэв эдгээр шаардлагыг хангахгүй бол тухайн тоглоом “SteamOS Unsupported” буюу “SteamOS дэмждэггүй” хэмээн тэмдэглэгдэнэ. Энэ нь тоглоом огт ажиллахгүй гэсэн үг биш ч, тогтвортой ажиллагаанд асуудал үүсэх магадлалтайг анхааруулж буй хэрэг.
Valve-ийн мэдээлснээр эхний ээлжинд Steam дээрх 18,000 гаруй тоглоом уг шошготойгоор “нийцтэй” хэмээн тэмдэглэгдэх бөгөөд хөгжүүлэгчдэд ямар нэгэн нэмэлт өөрчлөлт хийх шаардлагагүй. Steam Deck дээр аль хэдийн ажиллаж буй тоглоомууд энэ шаардлагыг хангана.
SteamOS нь Proton нэртэй технологийг ашиглан Windows-д зориулсан тоглоомуудыг шууд ажиллуулах орчинг бүрдүүлдэг. Энэ нь өмнөх хувилбаруудаас харьцангуй илүү нийцтэй болгосон ч, Windows дээр ажилладаг бүх тоглоомыг бүрэн дэмжих хэмжээнд хараахан хүрээгүй байна.
Valve мөн энэ шинэ шошго нь тухайн тоглоом Steam Deck эсвэл бусад SteamOS төхөөрөмж дээр хэр сайн ажиллахыг илэрхийлэхгүй, харин энэ бол тоглоом ажиллах эсэхийг ойлгоход чиглэсэн “эхний алхам” гэдгийг онцолжээ. Цаашид тоглоом бүр хэрэглэгчийн төхөөрөмж дээр хэрхэн ажиллах талаар илүү дэлгэрэнгүй мэдээлэл өгдөг системийг хөгжүүлэхээр ажиллаж буй гэнэ.
Үүний цаана томоохон өөрчлөлтүүд өрнөж байна. Asus ROG Ally зэрэг Steam Deck-тэй төстэй төхөөрөмжүүд илүү хүчирхэг, шинэ үеийн чип ашиглаж байгаа бол Steam Deck 2022 онд худалдаанд гарснаас хойш зөвхөн 2023 онд бага зэргийн сайжруулалт хийгдсэн. Valve Deck-ийн шинэ хувилбарыг гаргахад яарахгүй байгаа энэ үед зах зээл дээрх бусад төхөөрөмжүүд гүйцэтгэлийн хувьд улам давуу болж байна.
Ирээдүйд Valve SteamOS-ийг бүх төрлийн компьютер дээр суулгаж болох “ерөнхий” хувилбараар гаргах эсэх нь одоогоор тодорхойгүй байна. Өмнө нь 2010-аад оны эхээр ийм хувилбар гаргаж байсан ч энэ удаа зөвхөн компьютер үйлдвэрлэгчдэд хандах ч боломжтой. Харин Bazzite зэрэг олон нийтийн дэмжлэгтэй хувилбарууд Steam Deck-тэй төстэй туршлагыг санал болгож байгаа ч хэрэглэгчдэд багагүй төвөгтэй суулгалтын процесс шаардаж байна.
Valve-ийн дараагийн алхам юу байх бол? SteamOS Windows-д жинхэнэ өрсөлдөгч болох ирмэг дээр ирээд байна.
arstechnica.com
