Деклан Райсын гайхалтай гоол “Арсенал”-д Премьер лигийн хоёрдугаар байрыг бараг баталгаажуулж өглөө. Тэд “Ньюкасл Юнайтед”-ыг 1-0-ээр хожсон юм.
Энэ улиралд “Арсенал”-ыг гурван удаа буулган авч, Английн лигийн цомын төлөөх замдаа ч ялалт байгуулсан Ньюкасл энэ тоглолтод итгэл төгс орж ирсэн. Хөлөндөө бэртэл авсан Александр Исак оролцоогүй ч эхний хагасын аюултай довтолгоонуудын дийлэнхийг тэд хийсэн.
Гэвч Давид Раягийн 5 удаагийн хаалга руу хийсэн цохилтыг гайхалтай хааж “Ньюкасл”-ын бүх оролдлогыг зогсоосон бол хоёрдугаар хагасын эхэнд Райс торгуулийн талбайн гаднаас хүчтэй цохиж, ялалтын гоолыг оруулсан юм.
Энэхүү ялалтаар “Их буучид” ирэх улирлын Аваргуудын лигт оролцох эрхээ баталгаажуулсан бөгөөд хоёрдугаар байраа хадгалах нь бараг тодорхой боллоо. Харин Ньюкасл Европын элит тэмцээнд оролцохын тулд ирэх ням гарагт “Эвертон”-ыг заавал хожих шаардлагатай болж байна.
Тоглолтын дэлгэрэнгүй
Ньюкасл “Арсенал”-д бөмбөгийн эзэмшлийг өгсөн ч эхний хагасын турш илүү аюултай довтолгоонуудыг хийж, гоол оруулахад ойртсон. Гэвч Испани хаалгач Давид Раягийн гайхалтай сэргийлэл тэднийг тогтмол зогсоож байв.
Тоглолтын эхэнд Раягийн алдаатай дамжуулалт Сандро Тоналигийн гарт орсон ч тэр даруй Бруно Гимараешийн ойроос цохисон хоёр дараалсан цохилтыг шүүрч, алдаагаа зассан юм.
Удалгүй Тино Ливраменто сөрөг довтолгооны үеэр цохисон ч Рая амархан зогсоосон. Харин “Арсенал”-ын хувьд эхний хагас дахь хамгийн ойрын боломж нь Томас Партигийн булангаас ирсэн дамжуулалтад хийсэн толгойн цохилт байв. Ник Поп түүнийг шонгийнхаа дэргэд сэргийлсэн.
Удалгүй Харви Барнсын чиглэлээ өөрчилсөн цохилтыг Рая буланд гаргасан бол дараа нь Дан Бөрны толгойн цохилт, Свен Ботманы дараах оролдлогыг мөн зогсоож, эхний хагасыг гол баатар нь болж дуусгасан.
Харин хоёрдугаар хагасын 55 дахь минутад Энтони Гордон бөмбөгөө алдаж, Мартин Эдегоордын дамжуулалтад Райс ирж, бөмбөгийг гулгуулан шонгийн ойролцоо цохиж, гоолын салхийг хагалсан юм.
Ньюкаслын дасгалжуулагч Эдди Хау тактикаа өөрчилж, гурван төвийн хамгаалагчаас татгалзан дөрвөн хамгаалагчтай схем рүү шилжсэн бөгөөд Эмил Крафт, Льюис Майли, Уильям Осула нарыг талбайд оруулсан.
Удалгүй Бен Уайт алсаас хүчтэй цохисон ч бөмбөг шонгийн хажуугаар өнгөрсөн. Тоглолтын төгсгөлд Ньюкасл илүү түрэмгий болсон ч Харви Барнс, Жо Уиллок нарын цохилт хаалга руу чиглээгүй.
Хэдийгээр сүүлийн минутуудад ихээхэн дарамт үзүүлсэн ч Ньюкасл гоол оруулж чадалгүй, улирлын сүүлчийн тоглолтод бүх зүйл шийдэгдэхээр үлдлээ.
Харин “Арсенал”-ыг хоёрдугаар байрнаас унагахын тулд “Манчестер Сити” хоёр тоглолтоо хожиж, “Их буучид” “Саутгемптон”-д хожигдохоос гадна гоолын зөрүү үлэмж өөрчлөгдөх шаардлагатай. Гэхдээ ийм магадлал бага тул Микель Артетагийн баг улирлыг амжилттай дуусгаж байна.
