Лондонд болсон эхний тоглолтыг 3:1-ээр хожсон “Тоттенхэм” давамгай байдалтай ирсэн ч Бодо-гийн сүүлчийн гоол нутгийн талбайд нь эргэн ирэх найдлага төрүүлсэн. Тус баг сүүлийн таван гэрийн тоглолтоо бүгдийг нь хамгийн багадаа хоёр гоолын зөрүүтэйгээр хожиж байсан.
Гэсэн ч энэ удаад англичууд алдаа гаргасангүй. 63 дахь минутад Доминик Соланке тоог нээж, хэсгийн хувь заяаг үндсэндээ шийдсэн бол удаахан Педро Порро тоог 2:0 болгож, “Тоттенхэм”-ийг Европын зургаа дахь шигшээ тоглолтод хүргэлээ.
Хоосон бөмбөг эзэмшил Бодо-г аварч чадсангүй
Тоглолтын эхэнд “Бодо” бөмбөг илүүтэй эзэмшиж, эргэн ирэлтийн итгэл тээж байсан ч аюултай боломжуудыг бий болгож чадсангүй. Педро Поррогийн чөлөөт цохилтыг хаалгач Хайкин хааж чадсан бол, эсрэг талд Викарио Патрик Бергийн цохилтыг зайлуулсан.
Хоёрдугаар хагаст “Бодо/Глимт” илүү эрчимтэй довтолсон ч, хамгаалалтад гаргасан анхааралгүй байдал үнэтэй тусав. Матис Тэлийн өнцгийн дамжуулалтыг Кристиан Ромеро толгойгоор буулгасан бөгөөд түүнийг хамгаалалт дундаас зүгээр шахам олсон Соланке ойроос гоол оруулсан.
Хэдхэн минутын дараа баруун жигүүрээс ирсэн Поррогийн дамжуулалт шонг олоод хаалгачийг хуурч, тооны харьцаа 2:0 болжээ.
Тоглолтын төгсгөлд “Бодо”-д нэг боломж гарсан ч, Сондре Сёрлигийн уналтыг шүүгч VAR ашиглан дахин хянасны эцэст хамгаалагчтай огт хүрэлцээгүйг тогтоож, пенальти оноосон шийдвэрээ цуцалсан юм.
Ийнхүү Европын тавцанд бахархам амжилт үзүүлж байсан “Бодо/Глимт”-ийн үлгэр өндөрлөж, Арктикийн хүйтэн бороон дунд зориглон цугласан “Тоттенхэм”-ийн хөгжөөн дэмжигчдэд хэзээ ч мартагдашгүй шөнө болов.
101greatgoals.com
