Германы “Боруссиа Дортмунд” клуб Английн “Сандерлэнд” багийн хагас хамгаалагч Жоуб Беллингхэмийг сонирхож байгаагаа илүү тодорхой харууллаа. Лхагва гарагт тус багийн төлөөлөгчид, тэр дундаа ахлах дасгалжуулагч Нико Ковач багтсан бүрэлдэхүүн Англид ирсэн байна.
19 настай Беллингхэм энэ улиралд “Сандерлэнд”-ийн Чемпионшипийн плей-оффт шалгарах тэмцэлд голлох үүрэг гүйцэтгээд байгаа бөгөөд Дортмундын зүгээс түүнийг удаан хугацаанд сонирхож буй. Германы Kicker сайтад мэдээлснээр, Ковач, спортын захирал Себастиан Кель, менежер Ларс Риккен, тэргүүн скаут Себастиан Круг нар өчигдөр Ньюкасл хот руу хувийн онгоцоор нисч очсон гэнэ.
Starkes BVB-Interesse an Jobe Bellingham – Hochkarätig besetzter Kurztrip nach England #BVB #BVB09 #BorussiaDortmund https://t.co/FqsRgxPBeW
— kicker ⬢ Borussia Dortmund (@kicker_BVB) May 8, 2025
Kicker: Беллингхэм бол тэдний “илт” зорилтот тоглогч
Клубийн албаны хүмүүс аяллын зорилгыг тодруулалгүй байгаа ч Kicker-ийн мэдээлснээр, энэ нь “Сандерлэнд”-тэй хэлэлцээр хийх зорилготой нь илт гэжээ. “Боруссиа Дортмунд” Жоубыг ах Жүүд Беллингхэмийнхээ адил амжилтад хүрнэ гэж найдаж байгаа бөгөөд Жүүд нь 2020 онд 25 сая фунт стерлингийн эхний үнэлгээгээр Дортмундтай нэгдэж байсан юм.
Жүүд Беллингхэм 2022 онд 88.5 сая фунтийн гэрээгээр “Реал Мадрид”-тай нэгдсэн билээ.
Өрсөлдөгчид нэмэгдэж байна
Гэхдээ “Боруссиа Дортмунд”-ын хувьд Жоубын төлөөх өрсөлдөөн амаргүй байх төлөвтэй. “Манчестер Юнайтед” болон “Реал Мадрид” багууд мөн сонирхож буй талаар мэдээлэгдэж байгаа бөгөөд Дортмундын хувьд дараа улиралд Европын тэмцээнд оролцох эсэх нь одоогоор тодорхойгүй хэвээр байна.
Бундеслигийн сүүлийн гурван тоглолтод дараалан хожсоноор Дортмунд 5-р байрт бичигдэж буй ч, дөрөвдүгээр байрны “Фрайбург”-оос ердөө нэг онооны зөрүүтэй яваа тул Аваргуудын лигт оролцох боломж нь нээлттэй хэвээр байна.
Беллингхэм хямд биш
Жоуб Беллингхэмийг авахын тулд багууд өндөр төлбөр төлөхөд бэлэн байх хэрэгтэй. Тэрээр “Сандерлэнд”-тэй 2028 он хүртэл хүчин төгөлдөр гэрээтэй бөгөөд өнгөрсөн долоо хоногт Чемпионшипийн “Улирлын шилдэг залуу тоглогч”-оор нэрлэгдсэн.
Мөн тэрээр өнгөрсөн арваннэгдүгээр сард Английн 21-ээс доош насны шигшээд дебют тоглолтоо хийж, тус шигшээ багийн ахлах дасгалжуулагч Томас Тухелийн анхаарлыг татсан гэх мэдээлэл байна. Тухел нь өөрөө “Боруссиа Дортмунд”-ын хуучин дасгалжуулагч билээ.
Жоуб Беллингхэм “Сандерлэнд”-ийн хувьд плей-оффын тоглолтуудад голлох үүрэг гүйцэтгэхээр байгаа бөгөөд тэд маргааш шөнө “Ковентри Сити”-гийн талбайд зочилж плей-оффын эхний тоглолтоо хийнэ.
101greatgoals.com
