Кевин Де Брюйни клубийн төлөө Этихад цэнгэлдэхэд хийх сүүлчийн тоглолтдоо оролцож, Манчестер Сити Борнмутыг 3-1-ээр буулган авлаа. Энэхүү ялалт нь Ситиг хүснэгтийн 3-р байрт гаргаж, Аваргуудын лигийн эрхээ баталгаажуулахын тулд Фулхэмийн эсрэг сүүлчийн тоглолтод ердөө нэг оноо авахад хангалттай болгож байна.
Кристал Паласт хожигдсон Английн цомын финалын дараах урам хугарал Ситигийн хувьд удаан үргэлжлэсэнгүй. Харин ч тэд Де Брюйнигийн гэртээ хийх сүүлчийн тоглолтыг ялалтаар үдэж, улирлыг өөдрөгөөр үргэлжлүүлэх боломжийг өөрсдөдөө нээв.
Тоглолтын эхнээс Сити давамгайлж, 14 дэх минутад Омар Мармуш хаалганаас 30 ярдын зайнаас гайхалтай цохилт хийж, тооны харьцааг нээв. Удалгүй Де Брюйне итгэмээргүй байдлаар хоосон хаалганы өмнөөс боломж алдсан ч, 38 дахь минутад Бернарду Силва хоёр дахь гоолыг нэмлээ.
Хоёрдугаар хагас улаан хуудас, сэлгээ, сэтгэл хөдлөлөөр дүүрэн байв. 67 дахь минутад Ковачич сөрөг довтолгоог зогсоох гэж Эванилсоныг унагааж, талбайг орхисон. Харин зургаан минутын дараа Борнмутын Льюис Күүк Гонсалестай ширүүн мөргөлдөж, мөн улаан хуудас авснаар хоёр багийн тоглогчийн тоо тэнцлээ.
Бэртлийн улмаас найман сар талбайд гараагүй байсан Родригог Пеп Гвардиола Хааландын оронд сэлгээнд гаргаж, хөгжөөн дэмжигчдийн халуун алга ташилтаар хүлээн авлаа. Удалгүй Нико Гонсалес 89 дэх минутад гоол оруулж, тоглолтын хувь заяаг бүрэн шийдэв.
Нэмэлт цагт Борнмутын довтлогч Жеббисон Ситигийн хамгаалалтын алдааг ашиглан нэг гоол хийсэн ч энэ нь зүгээр л нэр төрөө хамгаалсан төдий байлаа. Тэдний Европын тэмцээнд оролцох найдвар нэг мөр унтарсан бол Сити Де Брюйнигийн үдэлтэд ялалтаар хариулж, улирлаа Аваргуудын лигийн эрхээр үргэлжлүүлэх босгон дээр ирээд байна.
