Найдвартай, хариуцлагатай хамтрагч байгаарай
Харилцаан дахь итгэлийг та ихэвчлэн итгэл алдарсан эсвэл сорьсон үйл явдлаас хойш дахин сэргээхтэй холбож ойлгодог. Итгэлийн асуудал үүсэх нийтлэг шалтгаанууд нь худал хуурмаг, найдвартай бус байдал, урвалт зэргийг агуулдаг.
Гэхдээ итгэлийн бат бөх үндэс суурийг харилцааны эхнээс л тавих нь чухал. Дээрх асуудлуудаас урьдчилан сэргийлэхийн тулд итгэлийг бий болгож, хадгалах дөрвөн практик, тодорхой арга замыг хүргэж байна.
Өдөр тутмын итгэлийг бий болгох нь
Үг чинь үйлдэлтэйгээ нийцдэг байх хэрэгтэй
Та хэлсэн үгэндээ хүрэх нь итгэлийг бий болгох үндэс суурь юм. Амласан зүйлийнхээ ард зогсож, түүнийг биелүүлэх нь чухал. Жишээ нь: “Би Бямба гарагт нүүхэд чинь тусална” гэж хэлсэн бол заавал очиж туслах хэрэгтэй. Шинэхэн харилцаанд хүмүүс нэгэндээ анхаарал хандуулж, сэтгэл татахыг хичээдэг тул биелүүлэх боломжгүй амлалт өгчих тохиолдол их гардаг. Гэхдээ ийм байдлаар амлалтаа биелүүлээгүй нь илүү их хохирол учруулдаг.
Үүнээс гадна бодлоо өөрчилж болно, гэхдээ үүнийгээ хамтрагчдаа хэлж, тайлбарлах нь чухал. Хэлсэндээ хүрдэг байх нь таны үгэнд найдаж болохыг хамтрагчид тань ойлгуулдаг.
Санаагаа тодорхой, ойлгомжтой илэрхийлж бай
Үр дүнтэй, ойлгомжтой харилцаа нь ажил дээр, найз нөхөд болон гэр бүлийн хүрээнд амжилттай харилцааг бий болгоход чухал. Харин романтик харилцаанд бүр ч чухал үүрэгтэй. Таны хамтрагч таны бодлыг унших боломжгүй тул санаа, зорилгоо илэрхийлж байх хэрэгтэй.
Жишээ нь: Хэрэв та Лхагва гарагт киноны үдэшлэг хийхийг хүсэж байгаа бол үүнийгээ хамтрагчдаа хэлэх. Эсвэл томоохон амьдралын өөрчлөлт хийх талаар бодож байгаа бол түүнийгээ ярилцах (зөвшөөрөл авах шаардлагагүй ч мэдээлэл өгөх нь чухал). Ийм байдлаар харилцах нь хамтрагч тань таны бодлыг ойлгож, таамаглаж, гэнэтийн зүйлд өртөхөөс сэргийлдэг.
Алдаагаа хүлээн зөвшөөр
Найдвартай байдал, хариуцлага нь бүх төрлийн харилцаанд чухал. Таны хамтрагч та алдаагаа хүлээн зөвшөөрч чадах уу гэдгийг мэдэхийг хүсдэг. Бид бүгд алдаа гаргадаг. Харилцаанд итгэл бий болгохын тулд алдаагаа хүлээн зөвшөөрч, хэрхэн засах талаар асууж, дахин давтахгүй байх амлалт өгөх нь чухал. Энэ нь тэр алдаагаа засах төлөвлөгөө гаргахыг ч багтаана.
Үргэлж үнэнээ хэлж бай
Энэ нь маш энгийн санагдах боловч олон хүн жижиг худал хэлдэг. Хүмүүс зөрчилдөөнөөс зайлсхийх, асуудлаас мултрах, эсвэл бусдыг баярлуулахын тулд худал хэлдэг. Гэвч жижиг зүйл дээр худал хэлэх нь том асуудлуудад итгэл алдрахад хүргэдэг.
Худал хэлэхийн оронд бодох хугацаа аваарай: “Би одоохондоо сайн мэдэхгүй байна, дараа хариулж болох уу?” эсвэл “Энэ талаар бодох хугацаа хэрэгтэй байна, дараа илүү тайван үедээ ярилцъя” гэж хэлэх нь дээр. Үргэлж үнэнээ хэлэх нь харилцаанд өдөр тутмын итгэлийг бий болгох эхний алхам юм.
Тогтвортой байдал чухал
Эдгээр дөрвөн зөвлөгөө нь харилцааг бат бөх суурь дээр эхлүүлэхэд тусална. Хэрэв та одоо харилцаатай бол эдгээрийг хэрхэн хэрэгжүүлж байгаагаа өөрөөсөө асуугаарай. Хэрэв хэрэгжүүлж чадахгүй байгаа бол нэгийг нь сонгон хоёр долоо хоногийн турш дадал болгон хэвшүүлээрэй.
Итгэл бий болгох нь марафон бөгөөд хурдны уралдаан биш. Тэвчээртэй байж, цаг хугацаа зарцуулаарай. Үр дүн нь таны харилцаанд эерэг өөрчлөлт авчрах болно.
gottman.com
