Хятадын Шинжлэх ухааны академиас хийсэн судалгаа нэгэн өндөр настай, эрүүл хүний туршлага дээр тулгуурлан SIK3 нэртэй генийг судалжээ. Энэ генийн хувилбар байгалиасаа цөөн цаг унтдаг хүмүүст илэрдэг бөгөөд тэд хангалттай амарсан мэт өглөө сэрдэг байна. Тус генийн нөлөөгөөр хүний тархи, бие махбодын сэргэлт богино хугацаанд явагдаж чаддаг байж болзошгүй ажээ.
Ихэнх хүмүүсийн хувьд хангалттай нойр авч, өглөө бүр сэргэг сэрэх нь хүсэл тэмүүлэл мэт байдаг. Гэвч зарим хүмүүс өдөр бүр цөөн цаг унтаад л хэвийн амьдралдаа төвөггүй ордог нь бусдад гайхал төрүүлдэг. Хятадын Шинжлэх ухааны академийн доктор Хао Чен болон түүний судалгааны баг ийм хүмүүсийн нууцыг тайлах шинэ ололтод хүрчээ.
Тэд “байгалиасаа бага унтдаг” нэгэн настай, эрүүл оролцогчийг судалж үзэхэд түүний генийн зураглалд SIK3 нэртэй генийг онцолж, унтах хугацаанд нөлөөлдөг байж болзошгүй хувилбарыг тогтоосон байна. Энэхүү ген нь тархины эсүүдэд дохио дамжуулах kinase уураг үүсгэдэг бөгөөд энэ уургийн өөрчлөлт нь нойрны үргэлжлэлд шууд нөлөөлж болох юм.
Судалгаанд оролцогч эмэгтэй шөнөдөө дунджаар 6.3 цаг унтдаг хэдий ч анхаарал төвлөрөл болон биеийн байдал нь маш сайн байжээ. Энэ нь түүнийг нойргүйдэлтэй хүмүүсээс огт өөр, байгалиасаа бага унтдаг хүн болохыг илтгэсэн. Тэрээр өглөө бүр сэргэг сэрдэг бөгөөд ядарч сульддаггүй байна.
Эрдэмтэд уг генийг лабораторийн хулганад туршихад тэд ч бас хоногт арай бага унтдаг болжээ. Түүнчлэн тархины амралт-сэрүүн үеийг удирддаг бүсүүдэд фосфоржуулалтын хэв маяг өөрчлөгдөж, нойрны хэмнэл богиноссон нь ажиглагдсан байна.
Одоогоор байгалиасаа бага унтдаг хүмүүст холбоотой таван өөр генийн өөрчлөлтийг тогтоогоод байгаа ба үүнд SIK3, DEC2, ADRB1, NPSR1, GRM1 зэрэг багтдаг. Эдгээр нь хүний нойрны үргэлжлэл, хэмнэл, сэргэлттэй холбоотой тархины сүлжээнүүдэд тус бүр өөр өөрөөр нөлөөлдөг ажээ.
Ийм судалгаанууд цаашид нойрны эмгэгтэй хүмүүст туслах боломжтой. Хэрэв эдгээр генийг ашиглан тархины сэргэлтийн үр ашгийг нэмэгдүүлж чадвал унтах хугацааг богиносгож, сэргэлтийг илүү үр дүнтэй болгох боломжтой болох юм.
Гэсэн ч мэргэжилтнүүд эдгээр ололтыг зөвхөн тусгай мутацтай хүмүүст хамаатай гэж анхааруулж байна. Энгийн хүмүүсийн хувьд унтах цагаа багасгах нь эрүүл мэндэд сөрөг нөлөө үзүүлэх өндөр эрсдэлтэй. Иймд байгалиасаа бага унтдаг хүмүүсийн амьдралын хэв маягийг шууд дуурайх нь зохимжгүй гэдгийг онцолжээ.
Сан Францискогийн их сургуулийн мэдрэл судлаач, генетикч Инг-Хүй Фү “Эдгээр хүмүүсийн бие организм унтаж байх үед явагддаг үйл явцыг бусдаас хамаагүй хурдан гүйцэтгэж чаддаг байж болзошгүй” хэмээн дурдсан байна.
Энэхүү судалгаа PNAS (Proceedings of the National Academy of Sciences) сэтгүүлд нийтлэгдсэн бөгөөд байгалиасаа бага унтдаг хүмүүсийн генийг судалсаар байгаа олон улсын багийн анхаарлыг татсаар байна. Цаашид эдгээр судалгаа нь нойрны архаг асуудалтай хүмүүст туслах цоо шинэ эмчилгээ, арга замыг нээх боломжтой юм.
earth.com
