Бостон Селтиксийн аваргын төлөөх найдвар Нью-Йорк Никсийн эсрэг ялагдлаар дууслаа. Никс цувралын зургаа дахь тоглолтод ялалт байгуулж, 2000 оноос хойших анхны Конференцийн финалдаа шалгарсан бол Нью-Йоркийн фэнүүд баяраа нижгэр тэмдэглэсэн юм. Харин Селтиксийн домогт тоглогч Пол Пирс энэ талаар тийм ч баяртай байгаагүй бөгөөд Нью-Йорк хотын багийг дахин шүүмжиллээ.
Никс яагаад ялсан бэ? Багийн нийт гишүүдийн хамтын сайн тоглолт уу? Тийм. Гэхдээ Пирс тэдний амжилтад “АЗ” ч бас чухал нөлөө үзүүлсэн гэж үзэж байна.
Цувралын эхний хоёр тоглолт Бостонд болж, Селтикс тус бүрт 20-оос дээш онооны зөрүүгээр тэргүүлж байсан ч тоглолтын сүүл хэсэгт шидэлт тааруу болж, Никс эргэн ирж ялалт байгуулсан. Пирсийн хэлснээр, энэ нь азтай давхацал байсан гэнэ.
.@paulpierce34 says the New York Knicks got lucky against his Celtics. 😅 #Celtics #Knicks #NBAPlayoffs pic.twitter.com/RWvYzbEV6v
— Speak (@SpeakOnFS1) May 19, 2025
“Би жил бүр плейоффт л хэлдэг: Аварга авахын тулд чи сайн байх хэрэгтэй, бас азтай байх хэрэгтэй. Хэрвээ би та нарт ‘Бостон эхний хоёр тоглолтод 20 оноогоор тэргүүлнэ, гэхдээ хоёуланг нь хожигдоно’ гэж хэлсэн бол энэ бол цэвэр аз,” гэж Пирс ярьжээ.
Түүнчлэн, тэрээр Селтикс энэ цувралд NBA-ийн түүхэн дэх хамгийн олон 3 онооны шидэлт алдаж (45 удаа) рекорд тогтоосныг онцолсон. Энэ нь тэдний довтолгооны хэмнэлийг бүрэн алдагдуулж, Никс эргэн ирэх боломжийг олгосон байна.
Түүний үзэж байгаагаар Никс Селтиксээс илүү сайн тоглоогүй, зүгээр л илүү шаргуу хичээсэн. Мөн тэрээр иймэрхүү “Авч болохгүй байсан ялалтууд” нь аваргын төлөө өрсөлдөх чадвартай багийг тодорхойлдог гэж хэлсэн. Тэрээр 2008 оны NBA-ийн финалыг дурсаж, Селтикс Лэйкерсийн эсрэг гурав дахь тоглолтод 20 онооны зөрүүтэй хожигдож байсан ч ялж чадсан гэдгийг жишээ татсан юм.
Индианаг түрүүлэхийг зөгнөв
Цувралын зургаа дахь тоглолтод Селтикс 119-81 харьцаатайгаар бут ниргүүлсний дараа Пирс өөрийн сошиал хуудсаар дамжуулан Никсийн фэнүүдийг шүүмжилж, Жэйсон Тэйтум байхгүй Бостонг ялсан гэж доромжилсон.
Тэрээр итгэл төгсөөр Индиана Пэйсерс Никсийг ялна хэмээн мэдэгдсэн. “Юу гэж дээ, Пэйсерс та нарыг бут цохино. Та нар өөрсдийгөө юу гээд бодчихов оо. Селтиксийн бүрэн бүрэлдэхүүн биш багийг ялчихсан байж,” гэж 10 удаагийн бүх оддын тоглогч хэлжээ.
Индиана Пэйсерс энэ улирлын плейоффын хамгийн халуухан, чанга багуудын нэг бөгөөд дорнод бүсийн тэргүүн баг Кливлэнд Кавальерсыг ердөө таван тоглолтод буулган авсан юм.
Тайрис Халибёртоны удирдсан энэ багийг Нью-Йорк үнэхээр хожиж чадах уу? Никс хамгийн сайн тоглолтоо гаргах шаардлагатай болно.
