Netflix интерактив контентуудаас татгалзах шийдвэрийн хүрээнд энэ оны эхээр Black Mirror: Bandersnatch-ийг устгасан ч, үзэгчдэд дахин сонголт хийх боломж гарч магадгүй байна. Цувралын бүтээгч Чарли Брукерийн хэлснээр, тусгай ангийг дахин гаргах ажил өрнөж байгаа аж.
Брукер Hollywood Reporter-т өгсөн ярилцлагадаа:
“Нэгэнт бүр мөсөн алга болсон гэх яриа хэтрүүлэг байсан. Анхаараад байгаарай, зүйлс өрнөж байна. Энэ үгүй болоогүй. Цаашдаа кино, тоглоомын хил бага багаар уусна” гэж хэлжээ.
Тэрээр өгүүлэмжтэй контент болон тоглоомуудын уялдаа холбооны талаар ярьж, хамгийн сүүлийн улирлын Plaything ангийг жишээ татсан байна. Энэ ангид “Thronglets” нэртэй дэлхийг эзлэхийг зорьсон видео тоглоом гардаг бөгөөд Netflix түүнд зориулан тусгай дагалдах тоглоом гаргажээ. “Энэ нь 90-ээд оны тоглоом шиг боловч шоунаас ч илүү өргөн хүрээтэй. Тоглоомын дотор нээж болох тусгай бичлэгүүд бий” хэмээн Брукер тайлбарлав.
Мөн жүжигчин Уилл Поултер өөрийн дүр болох галзуу суут Колин Ритманыг дахин бүтээсэн нь Bandersnatch-тай холбоог улам баталжээ.
“Уилл Поултер амьд Easter egg шиг гарч ирсэн нь бид формат эвдэж, хуучин дүрүүдийг дахин амилуулах боломжтойг харуулсан. Bandersnatch-ийн гүйцэтгэл Netflix-ийн инженерүүдийн ачаар үнэхээр гайхалтай болсон. Хэрэглэхэд маш хялбар, яг л шидэт үзүүлбэр шиг байлаа” гэж Брукер онцолсон юм.
Тэрээр цаашдаа илүү олон интерактив анги хийхэд нээлттэй гэдгээ ч илэрхийлэв.
“Bandersnatch-ийн интерактив үргэлжлэл хийх бүтэн санаа надад байсан. Ерөнхийдөө интерактив хэлбэрийг бүрмөсөн орхино гэж би хэзээ ч хэлэхгүй. Гэхдээ энэ нь үзэгч тоглоом тоглох уу, эсвэл түүх үзэж шингэх үү гэдэг хоёр өөр туршлага тул зөвхөн сайн өгүүлэмжийн үндэслэлтэй байж л ажиллана” гэжээ.
Одоогоор Black Mirror-ийн 1-7 дугаар улирал Netflix дээр гарч байгаа ч, Bandersnatch тусгай ангийг түр хугацаанд хассан хэвээр байна.
Эх сурвалж: gizmodo
