Йереми Пино Кристал Паласт нэгдэнэ
Кристал Палас клуб Вильярреалаас Испанийн жигүүрийн тоглогч Йереми Пиног элсүүлэх тохиролцоонд хүрч, тоглогч пүрэв гарагт эмнэлгийн үзлэгт орох гэж байна. Шилжилтийн үнэ 21.5 сая фунт стерлингээс дээш үнэлэгдэж байгаа аж.
22 настай Пино Кристал Паластай таван жилийн гэрээ байгуулахаар тохиролцсон бөгөөд энэ нь түүний Вильярреалд өнгөрүүлсэн бүхэл бүтэн мэргэжлийн замналыг цэглэж буй хэрэг юм. Клуб энэ зун Арсеналд Эберечи Эзег 60 сая фунт стерлингээр алдаад байсан бөгөөд Пиног түүний оронд бүтээлч үүрэг гүйцэтгэх тоглогчоор авч буй нь энэ.
Йереми Пиногийн товч замнал
Йереми Пино 2020 оны 10-р сард тухайн үеийн дасгалжуулагч Унай Эмеригийн удирдлага дор Вильярреалд дебютээ хийж, Европын Лигийн аварга болсон. Тэр цагаас хойш 2021/22 оны улиралд 40 тоглолтод 7 гоол, 4 дамжуулалт хийж, тогтмол гараанд нэрлэгдэх болсон.
2021 онд Испанийн шигшээ багт анх дуудлага авч, Итали улсын эсрэг дебютээ хийсэн тэрээр 2023 оны Үндэстнүүдийн Лигийн финалд гараанд, харин энэ жилийн финалд Португалийн эсрэг сэлгээгээр талбайд гарч байв.
2022/23 оны улиралд гэмтлийн улмаас олон тоглолт өнжсөн ч өнгөрсөн улиралд формоо эргэн олж, нийт 4 гоол, 7 дамжуулалт хийсэн. Сүүлд хийсэн долоон лигийн тоглолтод 6 шууд гоолын хувь нэмэр оруулсан нь онцлох үзүүлэлт болсон.
Статистикийн FBREF сайтын мэдээлснээр Европын таван том лигт түүнийг тоглолтын хэв маягаар хамгийн төстэй тоглогч нь Тоттенхэмийн Деян Кулушевски хэмээн үнэлжээ.
Un pase a la red. Con precisión. Donde no llegan los porteros.
— Villarreal CF (@VillarrealCF) April 29, 2025
🖌️ @santos_yeremy | #VillarrealEspanyol pic.twitter.com/WuGngJjTd1
Паласын зуны наймаанууд ба ирээдүй
Пиногоос өмнө Кристал Палас Аякс клубээс Борна Сосаг 3 сая фунт стерлингээр, ПСВ-гээс хаалгач Вальтер Бенитезийг үнэгүй авч, багийн гүнзгийрлийг нэмэгдүүлээд байна. Харин төвийн хамгаалагч Марк Гуехигийн Ливерпүүл рүү шилжих тухай яриа ид өрнөж байгаа бөгөөд шилжилтийн цонх 9-р сарын 1-нд хаагдана.
Улирлын эхний тоглолтуудад Кристал Палас Челситэй 0-0, Ноттингем Форесттой 1-1 гоолын харьцаатай тэнцэж, тоглолтын хэмнэлээ олоход анхаарч байна. Тэд Норвегийн Фредрикстад клубтэй хийсэн эхний тоглолтдоо 1-0 харьцаатай хожсон бөгөөд Конференцийн Лигийн үндсэн шатанд орох хариу тоглолтоо пүрэв гарагт Улаанбаатарын цагаар 17:00 цагаас хийнэ.
Эх сурвалж: 101 Great Goals
