Porsche Macan цахилгаан загвар: Бүх автомашинд байх ёстой шинэ зогсоолын функцтэй боллоо
Нарийн зайд ухрах нь туршлагатай жолооч нарт ч гэсэн үргэлж хэцүү байдаг. Жилд хэдэн арван шинэ машин жолооддог хүмүүс ч ухрах үед мэдрэгчийн дуу чимээнд бухимдаж, камерын өнцгөөс гүнзгийрэлтийг зөв ойлгоход бэрхшээлтэй тулгардаг. Харин Porsche 2026 оны Macan Electric загварт энэ асуудлыг шийдэх ухаалаг шинэ функц нэвтрүүлжээ.
Reversing Assist: Зорьсон чиглэлээ автоматаар ухрах шинэ шийдэл
Шинэ Macan Electric автомашинд 3D Surround View системийн нэг хэсэг болох Reversing Assist хэмээх функц нэмэгдсэн. Энэ нь автомашин таны өмнө нь давсан замыг санаж, ухрах үед тухайн замыг автоматаар даган чиглүүлдэг ухаалаг систем юм. Porsche-ийн мэдээлснээр, энэхүү систем нь 160 метр хүртэлх замыг тогтоон санаж, жолоодлого болон хурдасгуурын оролтыг өөрөө удирдах боломжтой.
Reversing Assist нь BMW-ийн зогсоолын туслах системтэй төстэй ажиллагаатай бөгөөд ялангуяа мушгирсан зогсоолын гараж, нарийн гудамжны нөхцөлд үр ашигтай. Мөн Macan-ийн бас нэг шинэ функц болох Trained Parking-тай хослон ажиллах чадвартай. Энэ нь жолоочид сонгосон зогсоолын маршрутыг нэг удаа жолоодоод хадгалж, дараагийн удаад автомашин хурдасгуур, тоормос болон жолоодлогыг автоматаар давтан гүйцэтгэх боломжийг олгодог. Хэрэглэгч таван хүртэлх маршрутыг хадгалах боломжтой.
Ухаалаг түлхүүр ба зорчигчдод зориулсан тоглоомын систем
Macan Electric загварт нэмэгдсэн өөр нэг ухаалаг шийдэл бол дижитал түлхүүрийн дэмжлэг. Тодруулбал, жолооч нар автомашинаа iPhone, Apple Watch болон Android төхөөрөмжөөр онгойлгож, асаах боломжтой болжээ. Үүний зэрэгцээ зорчигчдод зориулсан AirConsole нэртэй тоглоомын систем нэмэгдсэн бөгөөд зорчигчийн дэлгэцээр тоглоом тоглох боломжийг бүрдүүлсэн нь машины дотоод орчныг улам сонирхолтой болгож байна.
Мөн шинэ Macan загвар өмнөхөөсөө илүү ачаа чирэх хүчин чадалтай болж, 2,500 кг хүртэлх чиргүүлийг тээвэрлэх боломжтой болсон нь аялал, амралтад илүү уян хатан шийдэл болж өгчээ.
Үнэ ба хүргэлт
2026 оны Porsche Macan Electric загварын үнэ 78,000 ам.доллараас (~271 сая төгрөг) эхэлж байгаа бөгөөд одоогоор захиалга авах эхэлжээ. Харин автомашиныг 2026 оны хавар хэрэглэгчдэд хүргэхээр төлөвлөж байгаа бөгөөд 2,350 ам.долларын (~8.2 сая төгрөг) хүргэлтийн зардлыг нэмэлтээр тооцох юм.
Хэдий үнэ өндөр боловч Porsche Macan цахилгаан загварын энэхүү шинэчлэлтүүд нь жолоодлогын тав тух, ухаалаг ажиллагаа, аюулгүй байдлын хувьд дараагийн түвшинд хүрснийг илтгэж байна.
Эх сурвалж: Autoblog – The 2026 Porsche Macan Electric Has A New Feature Every Car Should Have
