Тоттенхэм Хотспурын шинэ эрин үе эхэллээ

Тоттенхэм Хотспурын урт удаан хугацааны удирдагч Даниэл Леви албан тушаалаасаа бууж, клуб шинэ эрин үеийн босгон дээр ирлээ. Бараг 25 жилийн турш гүйцэтгэх захирлаар ажилласан тэрээр зөвхөн Лондонгийн багийн биш, Английн хөлбөмбөгийн ертөнцөд ч томоохон нөлөө үзүүлсэн удирдагч байв.

2001 онд ENIC групп клубыг худалдан авснаас хойш Леви Тоттенхэмийг санхүүгийн хувьд дунд түвшний клубээс дэлхийн хэмжээнд үнэлэгдэх арилжааны брэнд болгож чадсан. Түүний хамгийн том бүтээл бол 1.2 тэрбум фунт стерлингийн өртөгтэй, орчин үеийн шаардлагад нийцсэн цэнгэлдэх хүрээлэн. Тус байгууламж нь зөвхөн хөлбөмбөг гэлтгүй NFL тоглолт, хөгжмийн тоглолт зэрэг олон төрлийн арга хэмжээг хүлээн авах хүчин чадалтай.

Гэвч бизнесийн амжилтын цаана спортын талбар дахь бүтэлгүйтлүүд нуугдаж байлаа.

Цомоор бус, цуурайгаар тодорсон 23 жил

Левигийн удирдлага дор Тоттенхэм зөвхөн хоёр том цом хүртсэн — 2008 оны Лигийн цом, 2025 оны Европын лигийн цом. Энэ хугацаанд Манчестер Сити, Ливерпүүл, Челси, Арсенал зэрэг өрсөлдөгчид дэвшил гаргаж, олон удаа аваргын цом өргөсөн бол Тоттенхэм амжилтын ирмэгт хүрсэн ч хэзээ ч тэр цэгийг алхаж чадсангүй.

Ялангуяа Маурисио Почеттино-г халсан шийдвэр, түүнээс хойш томилсон Жозе Моуриньо, Нуну Эспирито Санто, Антонио Конте нарын менежментийн сонголтууд шүүмжлэл дагуулсан. Эдгээр нь тогтвортой байдал бус, эргэлзээ дагуулсан өөрчлөлт болж хувирсан юм.

“Амжилтын түлхүүр” биш, “саад” болсон нь

Сүүлийн жилүүдэд хөгжөөн дэмжигчдийн бухимдал эрчимжиж, “Леви-г гарга” гэсэн уриа цэнгэлдэх хүрээлэнд байнга сонсогдох болсон. Түүнийг шилжүүлгийн цонхны сүүлчийн мөчид хямд наймаа хийх, өндөр цалинтай тоглогчдыг татахгүй байх, шилдэг тамирчдаа тогтоон барьж чадахгүй байна гэж буруутгаж байв.

Кайл Уокер, Кристиан Эриксен нарын явсан түүх, мөн Эберечи Эзе, Гиббс-Уайт нарыг алдах зэрэг нь энэ шүүмжлэлийг улам лавшруулсан. Хямд зардлаар ашиг олох бодлого нь багийн өрсөлдөх чадварыг хязгаарлаж эхэлсэн гэж олон хүн үздэг.

Хүчирхэг бизнесмен — сул довтлогч

Гэсэн ч Леви Тоттенхэмийг 100 сая фунт стерлингийн үнэлгээтэй багаас 2.5 тэрбум фунт стерлингийн үнэтэй дэлхийн брэнд болгосон нь маргашгүй үнэн. Түүний удирдлага дор Тоттенхэм зургаан удаа Аваргуудын лигт оролцож, 2019 онд шигшээд шалгарч байсан.

Цэнгэлдэх хүрээлэн, арилжааны өсөлт, олон улсын фанатын тоо зэрэг нь түүний стратегийн амжилтыг илтгэнэ. Гэвч хөлбөмбөг гэдэг зөвхөн тоо баримт биш — сэтгэл хөдлөл, ялалт, цомын амт юм.

Tottenham Hotspur announces departure of Executive Chairman Daniel Levy.

— Tottenham Hotspur (@SpursOfficial) September 4, 2025

Итгэл хөсөрдсөн үеэс шинэ эхлэл рүү

Левигийн явалт нь Тоттенхэмийн өмчлөлд ч тодорхойгүй байдал үүсгэж байна. ENIC групп клубыг эзэмшсэн хэвээр байгаа ч Саудын Арабын хөрөнгө оруулалтын сан, АНУ-ын хувийн хөрөнгө оруулалтын компаниуд сонирхол илэрхийлэх магадлалтай.

Цэнгэлдэх хүрээлэнгийн нэрийн эрх, брэндийн шинэчлэл, спортын удирдлагын бүтцэд өөрчлөлт хийх зэрэг олон ажил шинэ удирдлагыг хүлээж байна.

Нэгэн үеийн төгсгөл, шинэ боломжийн эхлэл

Даниэл Леви Тоттенхэмийг орчин цагийн клуб болгосон ч түүний ард үлдээсэн өв бол ээдрээтэй, маргаантай. Заримынх нь хувьд тэр домог; нөгөөд нь — хөгжилд саад болсон этгээд.

Гэвч нэг зүйл тодорхой байна. Тоттенхэм шинэ замдаа орж байна. Энэ зам нь зөвхөн бизнес биш, ялалт руу хөтөлдөг зам байхыг дэмжигчид хүсэж байна. Шинэ удирдлага энэ хүслийг биелүүлж, Тоттенхэм Хотспурыг жинхэнэ амжилтын төлөө тэмцдэг баг болгож чадна гэдэгт итгэх нь л үлдлээ.

Эх сурвалж: 101 Great Goals – Daniel Levy and a complicated legacy