PFAS химийн бодисууд хорт хавдартай холбоотой болохыг судалгаа харууллаа
Нийтийн ундны усанд илэрсэн “Мөнхийн химийн бодисууд” хорт хавдрын эрсдэлийг нэмэгдүүлж болзошгүй
PFAS буюу “Мөнхийн химийн бодисууд” гэж нэрлэгддэг синтетик нэгдлүүд нь ус, тос, дулаанд тэсвэртэй шинж чанараараа олон арван жил хэрэглэгдсээр ирсэн. Тэдгээрийг наалддаггүй бүрхүүл, толбоноос хамгаалсан даавуу, гал унтраах хөөс зэрэгт өргөн ашигладаг.
Гэвч PFAS нь байгальд амархан задардаггүй тул хөрс, ус, хүн болон амьтанд удаан хугацаанд хуримтлагддаг. Саяхны судалгаагаар АНУ-ын зарим бүс нутгийн ундны усанд PFAS илэрсэн нь хорт хавдрын түвшин нэмэгдэж байгаатай холбоотойг тогтоожээ.
Хорт хавдрын тохиолдол 33 хувиар нэмэгдэж болзошгүй
Өмнөд Калифорнийн Их сургуулийн Keck анагаах ухааны сургуулийн судлаачид улс орон даяарх усны систем дэх PFAS болон хорт хавдрын тархалтын уялдааг судалсан байна. Судалгаанд орсон бүс нутгуудад хорт хавдрын зарим төрөл тэр дундаа бамбай булчирхай, хоол боловсруулах эрхтэн, амьсгалын зам, зөөлөн эд, бөөр, цус зэрэгт хамаарах хорт хавдар — PFAS-ийн нөлөөтэй хамааралтай байж болзошгүйг харуулжээ.
Эдгээр бүс нутгийн заримд хорт хавдрын тохиолдол 33 хувиар нэмэгдсэн байх магадлалтай гэж судлаачид анхааруулж байна.
Судалгааны аргачлал ба үр дүн
Судалгааны баг насны ялгаа болон газар зүйн хүчин зүйлсийг харгалзан үзэж, тухайн бүс нутгийн ундны усны системд PFAS илэрсэн эсэхийг шалгасан. Судалгаанд 2010-аад оны эхээр хэрэгжсэн холбооны хяналтын хөтөлбөрийн усны шинжилгээний үр дүнг ашигласан бөгөөд энэ нь өнөөгийн илүү нарийвчлалтай туршилтын суурь болсон байна.
Эрэгтэй, эмэгтэй хүний ялгаа
Эрэгтэйчүүдийн хувьд бөөр, давсаг, цус, зөөлөн эд болон мэдрэлийн тогтолцооны хорт хавдрууд PFAS-тай холбоотой байх хандлага ажиглагдсан бол эмэгтэйчүүдийн хувьд бамбай булчирхай, амны хөндий, зөөлөн эдийн хорт хавдрын тохиолдол өндөр байжээ.
Цаашдын арга хэмжээ
Судлаачид хувь хүний түвшинд нотолгоо өгөх боломжгүй ч PFAS хүний биед хэрхэн үйлчилдэг талаарх өмнөх судалгаатай нийцэж буйг онцолж байна. Иймээс илүү нарийвчилсан шинжилгээ, орчин үеийн хязгаарлалт, ус цэвэршүүлэлтийн арга хэмжээ, орон нутгийн иргэдийн эрх мэдлийг нэмэгдүүлэх шаардлагатай гэж үзэж байна.
Энэхүү судалгаа нь Journal of Exposure Science & Environmental Epidemiology сэтгүүлд нийтлэгдсэн.
Эх сурвалж: www.earth.com
