Жин нэмэхийг хүсдэг хүмүүсийн асуудал: Төрөлхийн туранхай байдлын ард байгаа шинжлэх ухаан
Жин нэмэх зөвлөх Белла Барнс шинэ үйлчлүүлэгчидтэйгээ уулзахаасаа өмнө тэдний юу хэлэхийг барагцаалдаг. Эдгээр эмэгтэйчүүд илүүдэл жингээс айдаггүй, харин жин нэмэхийг хүсдэг.
Тэд өөрсдийгөө хэт туранхай гэж үздэг бөгөөд энэ нь тэдэнд сэтгэл зүйн дарамт, бие махбодын хүндрэл дагуулдаг. Барнсын хэлснээр, нэг үйлчлүүлэгч нь өгзөг том харагдуулахын тулд тусгай дэвсгэртэй леггинс өмсдөг бол, өөр нэг нь зун өөрийгөө “бүдүүн” харагдуулахын тулд гурван давхар хувцасладаг гэнэ.
Дэлхий нийтээр таргалалтын эсрэг кампанит ажил өрнөж байгаа ч эсрэг туйлд — төрөлхийн туранхай хүмүүс — бас оршин байдаг. Судалгаагаар дэлхийн хүн амын 1.9 хувь нь “төрөлхийн туранхай” буюу хэвийн хэмжээнд хооллодог ч биеийн жингийн индекс (BMI) нь 18.5-аас доогуур байдаг. Зөвхөн АНУ-д л гэхэд 6.5 сая хүн энэ ангилалд багтдаг байна.
Зарим тохиолдолд тэдний BMI 14 хүрдэг нь 150 см өндөртэй хүн 32 кг жинтэйтэй дүйцэх аж. Энэ үзэгдэл нь хүний энергийн тэнцвэр, бодисын солилцооны талаарх суурь ойлголтуудад сорилт тулгадаг гэж Annual Review of Nutrition сэтгүүлд бичжээ.
Бие махбодын онцлог ба генийн нөлөө
Сүүлийн жилүүдэд судлаачид эдгээр хүмүүсийн бие махбод хэрхэн ялгаатай ажилладгийг илүү гүнзгий судалж эхэлжээ. Тэдний зорилго нь төрөлхийн туранхай хүмүүсийн бодисын солилцооны нууцыг тайлснаар жин нэмэхэд нь туслах, улмаар илүүдэл жинтэй хүмүүсийн эмчилгээнд ч шинэ гарц олох явдал юм.
1933 онд анх ийм туранхай хүмүүсийн талаар эрдэмтэд анхаарал хандуулсан бол 1990 онд хийгдсэн туршилтаар ижил ихрүүдийн биеийн хариу үйлдэл хэрхэн ялгаатай байгааг баталжээ. 12 хос ихэрт долоо хоногт зургаан өдөр 1000 илчлэг илүү хоол өгч, 3 сарын дараа дунджаар 8 кг нэмсэн ч зарим нь 13 кг, зарим нь 4.5 кг нэмсэн байв. Энэ нь генетикийн нөлөөг илтгэсэн хэрэг.
Бусад судалгаагаар туранхай хүмүүс жин нэмэхээс “эсэргүүцэх” хандлагатай болохыг харуулсан. Илүүдэл илчлэг авсан ч хэвийн хооллолтдоо шилжих үедээ хурдан жин хасдаг аж.
Нийгмийн дарамт ба сэтгэл зүйн нөлөө
Туранхай хүмүүсийн бүлэг ч мөн адил олон янз. Зарим нь бага иддэг ч зарим нь өдөрт 300 гаруй илчлэг илүү авдаг боловч жин нэмдэггүй байна.
Нийгмийн зүгээс ирэх дарамт ч багагүй. Туранхай эрчүүд өөрсдийгөө хангалттай хүчтэй биш гэж мэдэрдэг бол эмэгтэйчүүд биеийн хэлбэртээ сэтгэл хангалуун бус байдаг. Тэднийг хоолны дуршилгүй гэж буруутгах тохиолдол ч бий.
Белла Барнс өөрөө энэ бүлэгт багтдаггүй ч “туранхай шившиглэл”-ийг мэдэрч байсан гэдэг. Гэр бүлийнхэн нь түүний жингийн талаар байнга сэтгэгдэл хэлдэг ч түүний сэтгэл зүйн байдалд ач холбогдол өгдөггүй байжээ.
Илчлэг хаашаа алга болдог вэ?
Туранхай хүмүүсийн бие махбод илчлэгийг хэрхэн зарцуулдаг нь судлаачдын сонирхлыг татаж байна. Тэдний булчингийн масс харьцангуй бага байдаг ба бодисын солилцооны түвшин нь онцгой байж болзошгүй. Зарим нь бага дасгал хийдэг ч өдрийн турш илүү хөдөлгөөнтэй байдаг, мөн илчлэгийг дулаан байдлаар илүү ихээр ялгаруулдаг байх магадлалтай.
Бодисын солилцооны онцлогийг ойлгох зорилгоор Копенгагений их сургуульд туранхай хүмүүсийн энергийн хэрэглээ, зарцуулалт, алдагдлын судалгаа эхлүүлжээ. Судалгаагаар тэдний 74 хувь нь ижил биеийн бүтцтэй хамаатан садантай байдаг нь уг байдлын удамшлын шинжтэй болохыг харуулж байна.
Генетикийн шинж чанарууд
Генетикийн судалгаагаар ALK гэх ген таргалалттай холбоотой үйл явцад оролцдог болохыг тогтоожээ. Энэ генийг хулганад устгаснаар жин нэмэхээс хамгаалагддаг нь тогтоогдсон бөгөөд энэ нь цаашдын эмчилгээний шинэ гарц нээж болзошгүй юм.
Жин нэмэх амжилт, урам зориг
Белла Барнс өөрөө зохистой хооллолт, хүчний дасгалыг хослуулан 18 кг жин нэмэж чадсан байна. Тэрээр 100 гаруй эмэгтэйд жин нэмэх арга барилыг зааж өгч, TikTok платформ дээр олон мянган дагагчтай болжээ.
Тэр хэлэхдээ:
“Би таван кг илүү нэмбэл хамгийн аз жаргалтай байх байсан” хэмээн онцолсон юм.
Энэхүү нийтлэл анх Knowable Magazine сэтгүүлд нийтлэгдсэн бөгөөд шинжлэх ухааны ойлголтыг өргөн олон нийтэд хүргэх зорилготой.
📚 Эх сурвалж: LiveScience.com – Extreme Thinness
