Маурисио Руффи UFC-д анхны ялагдлаа хүлээлээ
Парисын дэвжээн дээр Маурисио Руффигийн од гялалзсангүй. UFC Парис эвентийн дэд оргил тулаанд тэрбээр Францын тулаанч Бенуа Сент Денист хоёрдугаар үед өчиг боолтоор ялагдаж, UFC-д анхны ялагдлаа хүлээлээ.
Руффи өнгөрсөн жил Contender Series-ээр дамжин UFC-д орж, богино хугацаанд гурван тулаанд дараалан ялалт байгуулан, хөнгөн жингийн ангиллын хамгийн сонирхолтой залуу тулаанчдын нэг болоод байсан юм. Ялангуяа UFC 313-д Кинг Гринийг эргэлдэх толгойн өшиглөлтөөр нокаут хийсэн нь олон хүний анхаарлыг татсан. Ирээдүйн аварга хэмээн үнэлэгдэж байсан түүнийг энэ ялагдал газарт буулгасан хэрэг боллоо.
Бенуа Сент Денис эхнээс нь тулааныг удирдаж, Руффиг хамгаалалтад шахаж, хүчтэй өшиглөлт, дараалан ирсэн толгойн цохилтоор түүнийг сэтгэлзүйн хувьд эвдэж эхэлсэн. Хоёрдугаар үеийн төгсгөлд Сент Денис өчиг боолт амжилттай хийж, шүүгч тулааныг зогсоосноор ялалтыг бүрэн өөртөө авсан юм.
Энэ тулааны дараа MMA шинжээч Дин Томас Руффиг хатуу шүүмжилж, “Тэр тэнд байх ёсгүй хүн шиг харагдсан. Тулаанд орох хүсэлгүй байсан нь илт байлаа” хэмээн мэдэгдлээ. Өмнө нь Руффиг Конор МакГрегортой зүйрлэн, UFC-ийн дараагийн супер од болно хэмээн үнэлж байсан Томас энэ удаа гүнээ урам хугарсан байлаа.
“Руффи эхний цохилтуудад сандарсан. Тэрний анхны хариу үйлдэл нь өөртөө итгэлгүй байдлыг илтгэж байсан. Энэ бол сэтгэлзүйн хувьд бүрэн бэлэн биш гэдгийн шинж” хэмээн тэр нэмж хэлжээ.
Гэсэн ч Томас Руффиг бүр мөсөн орхисонгүй. Өмнө нь Ллонтофыг ялсан тулааныг нь шүүмжилж байсан ч, дараа нь Кингийг нокаутаар ялснаар өөрийгөө баталсан хэмээн дурдлаа. “Түүний дараагийн тулаан чухал. Тэр дахиад л хэн бэ гэдгээ харуулах хэрэгтэй” гэж тэрээр дүгнэлээ.
"It seems like this moment is a bit big for him ….. This is a big moment, big stage in front of President Trump." -Din Thomas on Mauricio Ruffy (a guy from SAO PAULO BRAZIL)
— 🏆🥇 (@fsh733) November 17, 2024
LMAOOOO c'mon man…. 🤣 pic.twitter.com/UrlQXdo9pV
Бенуа Сент Денисийн хувьд энэ ялалт түүнийг дахин өрсөлдөөний оргил руу түлхэж байна. Өмнө нь Дастин Пойрье, Ренато Мойкано нарын эсрэг ялагдал хүлээсэн ч, эх орондоо дахин мандаж, Парисын үзэгчдийг баярлуулж чадлаа.
Эх сурвалж: MMA Fighting
