Даниел Леви албан тушаалаа өгч, Томас Франк талархлаа илэрхийллээ
Тоттенхэмийн удаан хугацааны дарга Даниел Леви клубээсээ явж буйгаа зарласны дараа шинээр ирсэн дасгалжуулагч Томас Франк түүний бүтээлд талархал илэрхийллээ. 24 жилийн турш клубийг удирдсан Леви цөөнгүй шүүмжлэл хүлээж байсан ч 2008 онд EFL цомд түрүүлсэн бөгөөд өнгөрсөн улиралд Европын лигт амжилт гаргасан юм.
Франк бол Левигийн томилсон 15 дахь дасгалжуулагч бөгөөд сүүлийн дөрвөн жилийн хугацаанд дөрөв дэх нь болж байна. Гэсэн ч тэрээр Левиг “дэлхийн түвшний бэлтгэлийн төв, цэнгэлдэх хүрээлэнг бий болгосон, үнэлж баршгүй хүн” хэмээн онцлон тэмдэглэжээ. Тэр мөн хувиараа уулзаж, талархал илэрхийлсэн байна.
Хави Симонс, Коло Муани нар гараанд орж магадгүй
Франкийн удирдлага дор Тоттенхэм гурав дахь тоглолтоо Вест Хэмтэй хийх гэж байна. Тэд өмнөх тоглолтдоо Борнмутад 1-0 харьцаагаар хожигдсон ч Манчестер Ситигийн эсрэг хожил байгуулж, гурван тоглолтоос зургаан оноо авсан нь Франкийн хувьд хүчтэй эхлэл болж байна.
Шинэ тоглогчид болох Хави Симонс, Рандал Коло Муани нар гараанд орох боломжтой хэмээн Франк мэдээлсэн. Хави сүүлийн үед Лейпциг болон Нидерландын шигшээд тоглосон тул бэлтгэл сайтай байгаа бол Коло Муани Клубын дэлхийн цомоос хойш тоглоогүй, ПСЖ-д ч бүрэн бэлтгэл хийгээгүй аж.
Харин довтлогч Доминик Соланке шагайн гэмтлээс болж энэ тоглолтод оролцохгүй. Франкийн хэлснээр түүний бие сайжирч байгаа ч энэ долоо хоногт талбайд гарахгүй гэдгийг баталжээ.
Эх сурвалж: 101 Great Goals
