Жоэлинтон Ньюкаслын багийн анд Льюис Майлийг дэмжиж байна
Ньюкаслын хагас хамгаалагч Жоэлинтон багийнхаа залуу тоглогч Льюис Майлийг хамгаалан, түүнийг цахим орчинд шүүмжлэлд өртөж буйг харахад үнэхээр хүнд байсныг онцоллоо. Тэрбээр: “Энэ бол түүний бахархах ёстой мөч. Гэтэл ийм зүйл тохиолдож байгааг харахад сэтгэл өвдөж байна” хэмээн ярьжээ.
Майлэй өнгөрсөн амралтын өдөр Борнмутын эсрэг хийсэн тоглолтод оролцож, Ньюкаслын төлөө 50 дахь тоглолтоо хийсэн бөгөөд энэ амжилтаа X сүлжээнд тэмдэглэн бичсэн ч насны хязгаарлалтаас шалтгаалан хариу сэтгэгдэл бичих боломжийг хязгаарласан байв.
Тоглолт 0-0 харьцаагаар өндөрлөсөн ч Майлийн тоглолт ерөнхийдөө эерэг үнэлгээ авсан. Гэвч зарим үзэгчид түүнийг үндсэн бүрэлдэхүүнд тоглоход хангалттай туршлагатай эсэх талаар асуулт тавьсан нь шүүмжлэл дагуулжээ.
Харин энэ байдлын дараа олон фенүүд Майлийг дэмжиж, багийн ахлагч Бруно Гимараес түүнийг “дээд зэрэглэлийн тоглогч, сайн залуу” гэж тодорхойлсон юм.
Майлэй лхагва гарагт Брэдфорд Ситиг 4-1 гоолын харьцаатай хожсон Карабао цомын тоглолтод оролцож, Жоэлинтонтой хамт хагас хамгаалалтын шугамд тоглосон. Бразил тоглогч тоглолтын дараа “Багийн анд чинь шүүмжлэлд өртөж байгааг харахад хэцүү байдаг. Би өөрөө ч бас ийм үед байсан. Яг ямар мэдрэмж гэдгийг сайн мэднэ” хэмээн хэлжээ.
UNITED 💪 pic.twitter.com/6YpHpJMlqs
— Newcastle United (@NUFC) September 24, 2025
Тэрбээр цааш нь Льюис Майлийг “сайхан ирээдүй хүлээж байгаа” тоглогч гэдгийг онцолсон байна.
Өөрөө ч мөн Майлэй Ньюкаслын төлөө 50 тоглолт хийсэндээ “Үнэхээр их бахархаж” буйгаа илэрхийлээд, багийн фенүүдийг “гайхалтай” хэмээн тодорхойлжээ.
Түүний ахиц дэвшил богино хугацаанд гарсан ч бүрэн дардан байгаагүй. Нуруу болон хөлний гэмтлүүдээс болж тоглолтоос хэсэг хугацаанд завсарласан бөгөөд Бруно Гимараес, Жоэлинтон, Сандро Тонали зэрэг туршлагатай тоглогчидтой өрсөлдөх шаардлага нь Эдди Хоугийн гарааны бүрэлдэхүүнд багтахад хүндрэлтэй болгожээ.
Гэсэн хэдий ч Майлэй Брэдфордтай хийсэн тоглолтод үнэтэй хувь нэмэр оруулж, дасгалжуулагч түүнийг онцлон магтсан юм. Эдди Хоу:
“Льюис маш сайн тоглосон гэж бодож байна. Тэр эхний хагаст бидэнд үнэхээр тусалсан. Жоэ болон Брунотой хамт хагас хамгаалалтын бүсийг хянахад үнэхээр сайн байлаа” хэмээн онцолжээ.
Тэрбээр цааш нь:
“Тэр багтаа эргэн ирж, дараалсан хоёр тоглолтод сайн тоглосон. Борнмутын эсрэг нэг өөр төрхөөр сайн байсан бол өнөө орой дахиад өөр байдлаар сайн байлаа. Тэр туршлагаа тогтмол ахиулж байгаа бөгөөд би түүгээр үнэхээр бахархаж байна” хэмээн хэлсэн байна.
Эх сурвалж: 101 Great Goals
