Вест Хэм Брайтонтой 2:2 тэнцэж, аюулгүй бүс рүү дөхөх боломжоо алдлаа.
Вест Хэм өөрийн талбайдаа Брайтонтой 2:2 тэнцэж, Премьер лигт үлдэх өрсөлдөөндөө чухал хоёр оноо алдав. Ноттингэм Форест Эвертонд 0:2-оор хожигдсон тул Вест Хэм хожсон бол аюулгүй бүсээс хоёрхон онооны зайд очих боломж байлаа. Гэвч тоглолтын явцад хоёр удаа тэргүүлсэн ч тоглолтыг барьж чадсангүй. Харин Эвертон энэ ялалтаар хүснэгтийн дунд хэсэг рүү ахилаа.
Тоглолт эхлээд удалгүй Жаррод Бөүэн Лукас Пакета-гийн араар тавьсан дамжуулалтыг хөөж гүйцэн хамгаалалтыг цөмлөөд тооны харьцааг нээв. Дараа нь Макс Килман болчимгүй мөргөлдөөн хийж, Брайтон торгуулийн цохилт авч Дэнни Уэлбек пенальтигоор тэнцүүллээ. Үүний дараа Пакета Льюис Данкыг бүдүүлгээр унагаснаар дахин пенальти өгөгдсөн ч Уэлбек “паненка” маягийн цохилтоо хөндлөвчөөс буцаалгав. Эхний үеийн төгсгөлд VAR удаан шалгасны эцэст Данкын гаранд хүрсэн үйлдлийг пенальти гэж үзэж, Пакета энэ удаа алдаагүй гүйцэтгэн Вест Хэмийг дахин тэргүүлүүлэв.
Гэвч Вест Хэмийн стандарт байдлын хамгаалалт суларч, Жоэл Фелтман булангийн цохилтоос гоол оруулан 2:2 болгож тоглолтыг тэнцүүллээ. Үүнээс цааш талбайн эзэд довтолгооны хэмнэлээ барьж, Брайтон сөрөг довтолгоогоор боломж хайсан ч шийдвэрлэх гоол гараагүй. Ийнхүү Вест Хэмийн онооны алдагдал Форесттой зайгаа багасгах боломжийг үгүй хийж, ирэх долоо хоногт хоёр багийн шууд уулзалт илүү халуун уур амьсгалтай болох нөхцөл бүрдлээ.
Өөр тоглолтуудад Ньюкасл зочлон тоглохдоо Бёрнлиг 3:1-ээр хожиж, онооны цангаагаа тайлав. Жоэлинтон 65 дахь секундэд гоолдож, Йоане Висса удаах бөмбөгнөөс тоог нэмсэн бол Бёрнли Жош Лорантын волей цохилтоор тэмцэлд эргэн орж ирсэн. Гэвч Бруно Гимараеш алсын цохилтоор асуудлыг бүрэн хааж, Бёрнлигийн хожигдлын цувааг үргэлжлүүлэв.
