Сам Рэйми Batman хийхийг хүссэн ч эрх нь олдоогүй гэв
Spider-Man, Spider-Man 2, мөн Doctor Strange in the Multiverse of Madness киногоороо супербаатрын кинонд өөрийн гэсэн хэв маяг, харанхуй уур амьсгалыг бий болгосон найруулагч Сэм Рэйми DC-ийн хамгийн нэр хүндтэй дүрүүдийн нэг болох Batman-ыг найруулах хүсэлтэй байснаа илэрхийлжээ. Тэрээр өмнө нь Batman кино хийхийг оролдсон ч эрхийн асуудлаас болж бүтэлгүйтсэн тухайгаа Movieweb-д ярьсан байна.
Рэймигийн хэлснээр, тэр Batman-аас гадна The Shadow дүрийг ч сонирхож байсан ч мөн адил эрхийг нь авч чадаагүй аж. Харин Superman-ыг өөрийн хамгийн дуртай супербаатруудын нэг гэж нэрлээд, DC-ийн аль ч дүр дээр ажиллахад нээлттэй гэдгээ илэрхийлсэн байна. Гэхдээ үүний тулд “дүрийн мөн чанарт үнэнч, фэнүүдийн хүлээлтийг эвдэхгүй, баатарт бодит сорилт, жинхэнэ аялал өгч чадах хүчтэй зохиол” хамгийн чухал хэмээн онцолжээ.
Тэрээр Reddit AMA (Ask Me Anything) үеэр супербаатрын киноны өнөөгийн чиг хандлагыг шүүмжлэх эсэх талаар асуухад, “надад илүү олон ийм кино санал болгодоггүй нь л хамгийн том асуудал” хэмээн хошигнон хариулсан нь энэ төрлийн кинонд дахин ажиллах сонирхол нь хэвээр байгааг илтгэсэн юм.
Нийтлэлд мөн “эрхийг нь авч чадаагүй” гэх тайлбар нь бодит байдал дээр Warner Bros. болон DC тухайн үед Batman төслийг өөр баг, өөр чиглэлд төлөвлөж байсан үеүүдтэй давхцсан байж болзошгүйг дурджээ. Batman киноны эрх, төлөвлөлт олон жилийн турш дараалсан найруулагчдын төслүүдээр “дүүрэн” явсан тул Рэймигийн хувьд цаг хугацааны хувьд таараагүй байх магадлалтай аж.
Сэм Рэймигийн дараагийн кино болох Send Help 2026 оны 1-р сарын 30-нд кинотеатруудад нээлтээ хийхээр төлөвлөгдсөн байна.